KUCHING: Entara juluk ti dikemeratka Palan Pugu
Ekonomi Bansa (NKEA), iya nya ngemujurka perengkaguna di menua pesisir
lebih agi ba pekara pengangkut – jalai alun.
Dalam atur Program Ubah Perintah (GTP) enggau Isu
Pengelikun ti diatur Serakup Graduate Dayak Sarawak (SDGA) ba sebengkah hotel
antarabansa ensana, maya awak tanya saut, siku raban SDGA, Jasmy Sadan, nanya
penanggul ke ditapi Perintah Besai ari baruh Opis Menteri Pemansang Menua
Pesisir enggau Kandang Menua (KKLBW) kebuah jalai alun di menua pesisir ke lalu
enda dipelakin.
“Mayuh jalai nuju ngagai rumah panjai datai ke
seharitu agi bebatu-batu. Nitihka statistik, ku jaku urung 1,000km jalai raya
di Sarawak tu ari Kuching ke Miri udah dipelakin.
“Tang enti diperati, jalai raya ba sekeda sitak menua
ngagai rumah panjai lalu bedau digaga. Bakani ku mensia mayuh ke diau di sitak
nya deka ngangkatka ekonomi sida enti nadai penyikap perengkaguna baka nya,” ku
iya.
Iya nambah, tiap kali maya pengawa bepilih, enda ngira
parti Barisan Nasional (BN) tauka penyakal deka mantaika pekara nya belama.
“Sigi tusah kami ke diau di rumah panjai. Enti
dibanding enggau jalai raya di semenanjung, nyau bereringkat. Menua Sarawak ke
seruran meri duit sebagi ari tiga (1/3) ngagai tabung duit bansa (National
Coffers). Lima puluh lima taun udah merdeka, tang jalai raya kami agi bebatu.
Kini tunga duit nya,” ku iya nanya Sapit Menteri, Opis Menteri Pelajar Tinggi,
Dato’ Mohd Saifuddin Abdullah ke nyadi speaker ba forum nya.
Kelimpah ari nya mega, Jasmy nanya isu kompeni besai
baka Petronas ke nadai ngambi orang ari menua Sarawak megai tanggung pengawa ke
besai dalam kompeni nya.
“Mayuh orang ari Sarawak ke landik megai tanggung
pengawa ke besai. Ukai kami ngambi semua pangku pengawa besai ba kompeni
ke besai tang bai meh kami sama enggau kita megai pengawa ke besai,” ku iya.
Dalam saut Saifuddin, iya madah ba pekara jalai alun
nya deka dipejuraika enggau menteri KPLBKT Datuk Seri Shafiee Apdal lalu ba
pekara Petronas mega deka dipejurai enggau Petronas.
Ba siti agi awak tanya saut, siku raban OKU madah,
majoriti raban bansa ke diau di menua Sarawak ditu bansa Dayak tang dalam opis
perintah, enda mayuh ke megai pengawa nyadi Direktor.
“Nyangka Perintah Menua enggau Perintah Besai tau
bejuraika pekara tu,” ku tanya OKU nya.
Ba saut tu, ku Saifuddin, pekara nya deka diserah
ngagai Perintah Menua ngambika ulih dikemutarka ba renggat perintah ditu.
Dibali ari: http://www.theborneopost.com/2012/07/31/bansa-dayak-minta-pemansang-dipedua-enggau-enda-bechiping/
Tiada ulasan:
Catat Ulasan