Penguntung Bisi Pengelandik Gawa

Lebuh agi suba lalu nyangka agi nyadi kemaya hari tu kelebih agi ba kitai ke diau ba menua pesisir, ke ngidupka diri ngena jalai bumai betaun, kitai nya dikearapka bisi mayuh macham pengelandik dikena ngidupka diri.

Ambika chunto lebuh kitai bumai betaun kitai mesti deka nemu nebas, nebang, nugal, menih, mantun, ngetau, nungku, berangin enggau mayuh macham pengawa bukai ti besangkut-paut enggau pekara nya. Kitai ke lebih agi lelaki mega dikearapka landik ngaga keresa ti dikena baka nemu ngambuh, nyepuh, ngaga ulu duku, ulu kapak, ngaga peredah sereta ngarut, sarung duku, bebingkai lanji, sintung, takin enggau perengka bukai. Kitai mega dikearapka landik betukang baka ngaga perau, rumah enggau kereban bukai ti bisi dalam rumah.

Baka nya mega sida ke indu. Sida dikearapka nemu beranyam tikai, perengka ti dima baka tauka raga, baka. Indu ke landik endang dipuji baka orang indu ke tau betenun dikumbai indu tau gar tau takar.

Dunya moden kemaya hari tu bisi mega orang madah kitai tau enda ibuh ngembuan mayuh macham pengelandik baka ke udah disebut tadi. Chukup mih kitai ngembuan meniga bansa pengelandik tang pengelandik nya patut ba tikas ti pemadu tinggi, reti nya ukai tak semina nemu aja. Ukai tak semina naka nemu mimit-mimit tang nemu, mereti, ulih ngaga sereta nyadika tenggau orang lain. Pengelandik ba tikas tinggi ulih nyamin pengidup kitai, lantang bulih gaji ti lebih ari chukup dikena ngidupka diri. Pengelandik ti bansa tu nya pengelandik ti ulih kitai betarak lama ari orang bukai, belatih ba institusyen sereta ngereja pengawa nya empu sepengelama betaun-taun ti udah. Bepelasarka peneleba nya brau kitai bulih pengelandil ti diakun sereta diterima orang.

Sekeda chunto pengelandik ti baka tu nyerangkung pengawa baka mekanik, pengawa nyadi tukang, ngadu sereta miki kereban elektronik, pengawa ba kilang industri gas enggau petroleum, pengawa begagaka rumah, pengelandik nusun batu bata, pengelandik ngechat, pengelandik ngerakit sereta netak besi enggau mayuh agi pengelandik ti bukai. Pengelandik ti baka tu endang munyi ku randau kitai ari pun tadi endang deka dipelajarka, dipetarakka, digaga lalu semampai dikereja nya baru kitai tau nyadi ‘pakar’ tauka landik.

Diatu di menua kitai nyau mayuh bendar palan pelajar tinggi ti udah didirirka perintah tauka peribet alai narak nembiak tauka orang ke deka ngulihka pengelandik. Bansa kus ti diberi endang ditagaka ulih guna nangkup pemansang pengawa ti deka digaga di menua kitai tauka ba endur bukai. Orang ti nempa pelajar enggau kurikulum nya endang ngembuah perening enggau iching ti jauh, ngerunding orang ti udah dilatih enggau iya udah ditarak nya jemah ila deka bulih pengawa ti manah sereta ulih nguna penemu enggau pengelandik ti udah diansah.

Nya alai ngagai raban nembiak rebak baru kemaya hari tu, ngena bendar sida ngerebut peluang ti baka tu endur betarak, alai ngansah pengelandik belajar ke bansa latih ti endang dikerinduka sida. Enti rindu pasal kerita, pasal perengka injin ngena bendar belatih ba pengawa ti besangkut-paut enggau nya. Enti rinduka kereban elektronik, ngena bendar ga belajarka pengelandik tu laban pengawa ti besangkut-paut enggau perengka elektronik tu ari diatu ke jemah ila deka mayuh agi dikemansangka.

Mayuh pengelandik bukai ti enda alah ditiu enggau leka jaku, enda alah dikelukauka enggau leka randau. Nya alai besikap mih kitai ngena pengelandik enggau penemu ti ulih dikena ngidupka diri jemah ila.

Enti kitai bisi pengelandik, minta kereja pan kitai nyamai baik nya ba perintah tauka ba kompeni. Nya alai aram mih kitai sama-sama sedada sama seati nyikap diri ngena pengelandik ngambika ulih enggau orang nangkup pengawa ti bisi disediaka dia. Pilih mih palan ti manah alai betarak ngulihka pengelandik.