Kes Pemakai Berachun

Kitai seruran bendar ninga senentang kes pemakai berachun nyadi ba menua kitai. Bisi nya lalu ngujungka nyawa.

Taja pan entara nemu tauka enda, mayuh ari kitai endang bisi kala tepakaika pemakai berachun sekurang-kurang iya sekali setaun. Ambika banding, dalam taun 1995, ari January nyentuk ngagai bulan August bisi tiga belas kes pemakai berachun udah nyadi aba 801 orang nyengkaum siti kes parai udah bisi diripot. Ari penyampau nya, 601 mansa tu nembiak sekula.

Ari sukut undang-undang, menua kitai endang bisi ngembuan Akta Pemakai 1983 ke dikena nyaga mensia mayuh ari kena tipu lebuh orang nyediaka pemakai, pengawa bejual lalu chara nguna pemakai. Tang jarang amai kitai ninga sida tu didawa ketegal penyalah nya.

Kes pemakai berachun suah nyadi dalam timpuh 48 jam udah ke makai pemakai ke kamah nya. Tanda-tanda tu nyengkaum asai ke engkual, mutah, chirit, ngelu sereta bisi pedis perut.

Mayuh ari kes pemakai berachun tu nyadi ketegal igi penyakit baka bakteria, mikro-organisma, virus, rachun tauka toksin enggau barang-barang kimia. Empas ari penusah ketegal pemakai berachun nya baka lenyau ai dalam tubuh. Enti tubuh kurang ai lalu kelalu serius, iya tau ngujungka mai nyawa. Bisi mega iya ke raya nyau ngujungka  rachun tama ngagai sistem urat.

Entara pun penatai pemakai berachun iya nya bakteria dalam pemakai, ketegal proses nyediaka pemakai ti kamah, pemakai ti enda dipanduk enggau menyana lalu pemakai ti dibantai ba tikas pengangat 30 degree Celsius.

Tu pemakai ke seruran bisi ditepan bakteria;

• Tusu tauka pemakai bansa tusu baka kiju enggau kerim
• Pemakai beminyak baka nasi lemak, nasi beriyani, mi etb
• Ruti enggau kuih
• Pemakai utai idup di tasik baka kerang
• Dagin- sapi, manuk, ikan
• Pemakai dalam put ti udah kebi tauka iya ti kembai ba atas put nya tauka iya ti betegar.

Rampa alai kitai diau enggau chara nyediaka pemakai ti enda teratur ulih ngasuh bakteria nepan sereta ngamahka pemakai. Sekeda ari chunto ke suah nyadi nyengkaum;

• Pemakai ke agi mata
• Dagin, manuk enggau ikan ti enda disimpan ba peti ais
• Pemakai meku ti dilakka `lela' kelalu lama ba endur ke angat
• Pemakai dalam put dibantai ba tikas pengangat bilik sepengudah dibuka
• Pemakai basah enggau ke belai ti dibantai ba endur ke angat
• Buah sereta sayur ti enda dibasu beresi
• Pemakai ke sigi udah kamah maya dipanduk tauka ditungkus
• Pemakai ti enda disimpan enggau jampat

Tanda-tanda pemakai berachun bepanggai ba bansa bakteria tauka organisma iya baka:

Rachun ketegal bakteria 

• Campylobacterosis ketegal bakteria campylobacter ke bisi ditemu ba dalam dagin manuk mata, dagin enggau tusu ti enda dipasteur.  Tanda-tanda rachun berengkah ayan 2-5 hari udah makai. Kelimpah ari tanda-tanda rama, pesakit deka tabin lalu tai iya ngundan darah.

Toksin

• Chirit maya orang ke matau menua ketegal bakteria Escherichia coli tauka E. Coli ti ngasilka toksin.  Penyakit tu nyadi ketegal chara nyediaka pemakai enggau ai ti kamah.
• Cereus nyadi laban bakteria bacillus cereus.  Tanda-tanda rama diasai di antara 1-18 jam udah makai. Taja pia, pemakai berachun bansa tu enda lebih ari 24 jam.
• Cholera ketegal bakteria vibro cholera bisi ditemu ba dalam ikan, kerang, kupang enggau bansa tekuyung ke diulih ba endur ai ti kamah.  Tanda-tanda bepun entara 1-3 hari udah makai lalu ulih bepun enggau bira chirit sereta ngujungka parai ketegal lenyau mayuh ai asil ari ke bira chirit ti raya.
• Gastroenteritis nyadi ketegal Yersinia enterocolitica, sebansa bakteria ti ditemu ba dalam dagin, ai, sayur mata enggau tusu ti enda dipasteur.  Tanda-tanda ayan 2-5 hari udah makan. Kelimpah ari tanda rama, tabin enggau asai lelak nyangka nyadi sama baka rengga. Enti enda diubat pesakit tau raya agi.
• Listeriosis ketegal bakteria Listeria monocytogenes. Taja pan jarang nyadi iya tau munuh nyawa. Tanda penyakit nyengkaum berasai dadam, rachun ba darah enggau beranak enda chukup bulan bagi indu ke betubuh bisi. Dalam kes ti raya, penyakit tu ulih ngerampit ngagai untak enggau tulang belakang.
• Shigeliosis tauka Disenteri nyadi ketegal bakteria Shigella sp., tanda- tanda ayan maya 1-7 jam udah makai. Kelimpah ari tanda-tanda rama, darah, nanah tauka lendir bisi dipeda ba tai pesakit.
• Salmonelosis ketegal bakteria Salmonella ti bisi ditemu ba dalam tubuh manuk. Tanda-tanda rama bisi diasaika udah 24-48 jam.
• Staphylococcus aureus sebansa bakteria ti mar dibunuh taja pan ba tikas pengangat ke tinggi. Kes rachun bansa tu jarang nyadi. Tanda diasai dalam timpuh 1-8 jam udah makai, sereta terus nyentuk ngagai 24-48 jam. Tanda-tanda tu tanda-tanda rama.

Rachun bepun ari virus 

• Hepatitis A nyadi ketegal virus ti bisi ba dalam kerang enggau tekuyung ti diulih ba dalam ai ke kamah datai ari agu enggau sayur mata ti diperesika enggau menyana.
  Tanda-tanda berengkah ayan ari 2-6 minggu udah makai lalu pesakit deka tabin, lemi tulang, nadai ati deka makai enggau jaundis. Ba kes ke raya, iya tau ngujung ati rusak lalu mai nyawa.
• Norwalkvirus nyadi ketegal virus Norwalk ti bisi ditemu ba dalam kerang enggau tekuyung ke diulih ba endur ke kamah laban tai mensia. Penyakit bepun ari pengawa ke bepakaika tekuyung mata enggau iya ke enda disumai mansau.

Rachun bepun ari protozoa 

• Giardiasis nyadi ketegal protozoa Giardia lamblia ti bisi ditemu dalam alur perut enggau tai mensia. Ai ari agu ti diguna nyadi baja sayur sereta chara nyediaka pemakai ti enda  meresika jari pun penyadi penyakit berachun tu.
• Amebiasis mega dikumbai disenteri amebik nyadi ketegal Entamoeba histolytica. Pun penatai penyakit tu sama baka rachun ketegal protozoa Giardia lamblia. Tanda-tanda bisi rachun nya endur ba tubuh baka ba kandang ati enggau perut raya nyadi lemi, chirit, asai kesal, nurun berat tubuh enggau lemi tulang.

Pun penatai penyakit berachun ke bukai

Pemakai berachun mega ulih nyadi ketegal kulat berachun tauka buah enggau sayur ti udah kamah ketegal rachun indu utai ti udu pekat.

Toksin ari kulat baka aflatoksin bisi ditemu ba beras tauka bijirin mega siti ari pun pemakai berachun.

Chara manah dikena nyeliahka ari pemakai berachun

BANSA pemakai ti mudah kena kamah lebuh disimpan, disediaka, dipanduk enggau maya dinah nya baka dagin, manuk enggau telu.

Nangkanka tu nya sekeda chara ti betul lebuh nyediaka pemakai sereta pengelikun di dapur.

Peti ais mesti kurang ari 4 degree celsius tauka 0 degree celsius ngambika peti nya chelapmeku. Patut dikingatka tikas penyelap enda tebunuhka bakteria, tang ulih nagang iya ari beranak-betelesak. Pemakai ti disimpan mesti dalam kereban ti ditutup tauka ditungkus.

Basu jari enggau naka pemeresi sebedau tauka sepengudah nyediaka pemakai dikena nyeliahka ari ditepan bakteria salmonella tauka organisma bukai.

Pekakas dapur baka lungga, dikin tauka pengerat dagin patut dibasu ngena ai angat sebedau diguna kena ngerat dagin.

Lapik alai ngerat tauka nyirap pemakai patut ari bansa arkrilik laban iya nyamai agi dibasu lalu nadai ninggalka alur ti ulih alai bakteria idup. Iya ti manah agi nya nguna lapik pengerat ti bebida ungkup dagin enggau sayur.

Anang sekali-kali makai pemakai ti udah bekulat.

Seliahka ari nguna telu ti nyau deka pechah laban iya nyangka bisi ngundan bakteria Salmonella. Taja pia telu ti dipeda manah mega tau bisi ngundan salmonella. Salmonella mudah dibunuh ngena tikas pengangat ti tinggi. Nya alai siti chara ti pengabis engkeman nya nyumai nyentuka lauk mansau. Anang makai telu mata tauka iya ke setengah mansau.

Serarakka pemakai ti udah disumai ari pemakai ke bedau dipanduk tauka iya ke agi mata. Kebuah pia, laban pemakai ti udah disumai nya jampat agi kamah sereta ditepan igi penyakit enti dibanding enggau pemakai ti bedau dipanduk.

Pilih pemakai ti udah disumai dikena nyaga pengelikun pengerai. Makai mayuh agi pemakai baka buah enggau sayur laban nya likun agi.

Makai pemakai ti udah disumai kemaya nya. Pemakai ti udah chelap deka mudah ditepan bakteria.

Simpan pemakai ti udah disumai enggau cheremat nitihka iya ti engkeman. Simpan ba atas kereban pengangat tauka endur ti chelap.

Angatka baru pemakai.

Tu mih chara ti pengabis manah dikena nyeliahka ari igi penyakit ke tau bisi maya pemakai nya disimpan. – Dibali ari Oleh Noor Hasani Hashim Pusat Racun Negara, USM, 11800 Minden P.Pinang.