Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.

"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Rabu, 18 November 2015

Demokrasi: Konsep tauka konsensus?



DEMOKRASI nadai kaul enggau pengelepas. Kenu ku orang, demokrasi nya siti varian lunggar ideologi komunisme, lalu jarang dalam sejarah idea iya dikumbai utai bukai. Demokrasi nitihka penemu Profesor Hans-Hermann Hoppe, penulis buku Demokrasi: Tuhan ke puntan.

Enti dikebak lambar sejarah, dia kitai nadai tepedaka utai ti timpang senentang konsep demokrasi. Demokrasi tu asal ari ideologi lama Yunani ti ngarapka kuasa individu nya patut ditekatka nengah pengawa bekungsi kuasa enggau rayat. Reti demokrasi ti balat agi dikingat dalam sejarah moden nya pasal pengawa perintah ti datai ari rayat, ulih rayat enggau  ungkup rayat – baka ke disebut dalam jaku Abraham Lincoln lebuh iya bejaku ba mua mayuh di The Gettysburg Address (1863).

152 taun udah The Gettysburg Address – lalu nyangka sepengudah ngira simpul penemu Profesor Hoppe – demokrasi baka utai ti tau bendar ngasuh lelak baka ti ayan maya jeman digital. Penulis ukai bejaku sentang tuai-tuai anti-demokrasi baka Jusuf Kalla di Indonesia – ke endang enda besetuju enggau konsep tu. Nengah Doktrin Kalla, Jusuf dikumbai nuduh demokrasi nya sebuah sistem ti enda efektif sereta efisien; ungkus belanja demokrasi mega kelalu mar ku iya. Maya iya meri licha rama senentang Konflik enggau Konsolidasyen Demokrasi Indonesia dalam taun 2012, Jusuf madahka demokrasi nya seruran ngayanka konflik.

Enda pia? Aku ukai bejaku senentang sesebengkah pekara ti ekstrem baka penemu ti dikenataika Jusuf Kalla, tang bejaku senentang reti demokrasi lebuh pengamat mudah amat dikompromi ketegal kuasa ba ujung jemari ke nekan papan kekunchi telefon pintar, semua nya bisi ba skrin komputer pangku tauka iPad diri empu. Bah baka ni dih deka nentuka sempun api demokrasi terus manjut ba atas penimbang pengerentang - chara kitai orang timur – baka ni chara ti pengabis manah memelan?

Nyau udah tiga dekad sepengudah World Wide Web (www) ditengkebang, Internet udah ngubah adat basa-budaya mensia dalam ratus chara, bebida maya iya ba ringkat nasen munya. Kemaya hari tu aplikasyen internet baka blog, Facebook, Twitter enggau Instagram meri kuasa enggau medium ti pengabis semitan ngagai orang selama baka nuan enggau aku. Enda baka suba, lebuh penemu semina dikembuan raban orang  perintah enggau media mogul.

Ba penemu aku, Internet nya hero personal aku laban nengah medium tu aku enda mudah berasai bingung, muras enggau sinu baka suba.

Tang diatu mega aku nyau bisi penanggul enggau hero personal aku tu lebuh medium nya nyau nyadi panggau alai betempur entara dua kuasa pengabis besai ba menua. Sida nyau nadai ngembuan tanggung pengawa, nadai empati lalu seruran agi lepas ari garis petenah. Kadang-kadang kitai nyadi pemadah serebana, nyadi polis, prosekutor enggau akim ba awak ti sama. Kitai enda ingat senentang objektiviti, pengerentang enggau pengidup mensia. Kitai enda nimpai pekara ari semua sukut ngujungka runding kitai nyadi linear.

Internet ti ideal nya ulih meransang proses demokrasi lebuh iya ngerembaika sfera rama lalu nimbang kuasa politik kemaya hari. Iya mega meri peluang bejaku ngagai  citizen journalist  ngambika sida ulih ngeripot enggau ngelansa utai ti dipeda, didinga enggau dipikir. Nadai agi tagang undang-undang lama tauka birokrasi ngeluarka kereban ti mayuh macham.

Informasyen senentang kudi besai rampa menua, konflik entara garis menua enggau penemu politik dunia ulih dibacha enggau liberal. Tang enti diperatika ari sukut ti bebida, lebuh semua utai udah lantang dia kitai suah deka tetemuka pemula, informasyen ti salah lalu ulih ngerusakka etika pengarang kitai ke amat-amat gawa nyadi pengarang. Aku mega besalah dalam hal tu. Baka ku, Eric Schmitt, Pengerusi Eksekutif Google: “A cesspool of erroneous information.” Sebuah danau informasyen ti enda amat.

Enti baka nya, kini tunga demokrasi ti dikedekaka kitai?  Kati kitai ngena hak enggau kuasa nya dikena ngengkahka demokrasi ba dalam padang surplus tauka defisit?

Dalam timpuh awak ti semak tu, impak internet ke atas demokrasi nyata agi kelabur. Enti kuasa ke amat bisi ba jari kitai, kuasa nya patut dikelapung enggau tanggung pengawa ukai pengeringat tauka motif politik ti ngemeratka diri empu.

Nadai utai ti poten agi lebuh ngapika imaginasyen enggau pengadang rayat kelimpah ari demokrasi. Tang awakka demokrasi nya bepusin ba pekara ti amat, rentang sereta saksama. Enti enda ulih ngiga titik nya, manah agi anang bejaku pasal demokrasi laban demokrasi nya siti konsensus.

Tiada ulasan:

Catat Ulasan