Kitai suah bendar ninga raban pemerintah baka sida menteri
kabinet, menteri besai enggau kepala menteri madahka diri sida rindu bendar
deka ngaul rayat enggau rapat agi ngambika sida bisi pengarap sereta bisi
sukung politik ari rayat.
Enti utai ke baka tu ke kedekaka sida ti nyadi tuai
endang patut amat sida besedia nyeliahka diri ari dialu mensia mayuh ngena
tikai permaidani mirah tauka chara pengelalu ke bukai. Maya udah datai alai
kitai ngubah chara ngenataika basa kitai ngagai raban tuai-tuai pemegai menua.
Nya mih kebuah bala sida menteri, menteri besai enggau pemesai bukai patut
nyadika diri sida ke chuan sereta teladan ti enda bangat udu ngasuh orang
ngemasaka sida enggau chukup-chukup. Naka kediatu pengawa ngemasaka pemesai
belebih-lebih udah nyadika tradisyen lebuh kitai ngambat raban menteri enggau
pemesai bukai.
Dalam konteks tu, komen ari Kepala Menteri Sarawak, Tan
Sri Adenan Satem apin lama ke udah patut bendar dipuji sereta dijadika teladan
enggau chuan orang bukai. Maya nya iya bisi mantaika pengasai diri ke deka agi
dikumbai CM (Chief Minister) sereta enda ibuh nyebut gela rasmi iya lebuh iya datai bejadika sesebengkah aktiviti tauka
pengawa. Iya mega madahka diri enda tentu lantang ati dikangau ‘yang dikasihi’
laban rambai jaku nya ba penemu iya semina patut disebut entara orang ke melaki
bini aja.
Pemesai ari opis perintah besai enggau nengeri patut
ngambi inisiatif tu nagang mensia mayuh ari kelalu belebih-lebih mantaika basa
lebuh ngambat sida maya bisi pengerami rasmi. Enti nunda tau enda ibuh mih
ngasuh raban pemesai bebaris ngelalu pemesai menua baik nya ari opis perintah
besai tauka nengeri.
Utai ke patut agi digaga nya raban menteri enggau pemesai
nengeri ke dipilih rayat ngagai opis patut ngembuan ulah ke enda ngenyauhka
diri ari orang ke diarika sida. Basa endang enda tau enda diberi ngagai raban
menteri, menteri besai tauka sapa-sapa pemesai tang ukai nengah chara nyembah
ke enda patut ketegalka sida nya bisi pangkat besai.
Ukai mudah deka ngubah chara kitai nerima sereta
ngelaluka temuai ti dipebasaka laban iya udah nyadi sebengkah tradisyen ari
suba-suba. Taja pia, raban pemesai kitai patut bendar berunding enti sida
kelalu bangat dipebasaka dia sida deka dipeda jauh agi kaul enggau bala rayat.
Enti semua pengerami besai dikena ngelaluka temuai
diketuka dia raban pemesai kitai ulih terus betemu enggau mensia mayuh. Tabi
basa baka yang amat berhormat, yang berhormat tauka yang berbahagia ukai semina dipeda ari
sukut pangkat tauka gela aja tang iya mega disempulang enggau tanggung pengawa.
Gela tauka pangkat nya ngayanka orang nya bisi penuduk ti dikelapungka enggau
tanggung pengawa. Tinggi agi penuduk reti nya besai agi mega mih tanggung
pengawa. Enti sema orang diberi basa ketegal iya duduk ba tikas tinggi dia
seraka entara iya enggau rayat deka dipeda jauh.
Nya alai, leka
jaku ‘saudara’, menyadi tauka madi endang patut bendar dikena nyadika nama
kangau laban jaku tu ngundan reti tawing sereta ngayanka penyempil tauka
pengerapit kaul iya enggau orang ke enggau iya betemu tauka betunga mua. Sida ke
tuai pemesai pemerintah patut ingatka seruan rambai jaku English – to serve not to be served.
Tiada ulasan:
Catat Ulasan