Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.

"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Selasa, 24 November 2015

Ngarapka Suu Kyi selati Mandela



Myanmar udah ngayanka rayat iya bisi ngubah geopolitik ngagai penuduk ti baru sepengudah 25 taun nadai pengawa bepilih besai ti nadai besekat udah dipejalaika perintah menua nya. Ketegal pemerintah ti bepelasarka perintah soldadu dia demokrasi ba menua nya udah danjan dibai bulan. Tuju pengawa milih perintah ti dipilih rayat dalam timpuh nya udah diketuka sida.

Tang kemaya hari tu, perintah soldadu Myanmar tauka suba dikumbai Burma udah mulaika hak milih perintah ngagai rayat. Ketegal pengangkun tuai politik rama Myanmar sereta ditangkanka enggau ansak raban antarabansa nyengkaum sekeda menua ASEAN dia pengawa demokrasi Myanmar diperatika ulih dipejalaika dalam beberapa taun ti deka datai tu ila.

November 2015 udah nempa sejarah lebuh bejuta-juta rayat menua nya ulih nurun muai undi enggau nadai besekat sereta ludas dalam situasyen ti likun sereta diperatika pengari antarabansa.

Perintah junta soldadu Myanmar ngambi pemutus penemu ti pintar lebuh sida meri peluang demokrasi dipejalaika ba menua nya. Iya mega tau dikumbai siti singkang ngagai pengawa ti nukang enggau sedandang pintu menua Myanmar ngagai makit dunya ti nadai sekat terit ari sukut politik perintah. Demokrasi menua Myanmar nya mai reti menua nya mega nyangka muka peluang ekonomi enggau pengawa dagang sereta pengawa bejual beli ti dipejalaika raban pemudal antarabansa.

Parti NLD ti nerima undi popular 80 persin sereta ngalahka proksi iya USDP dalam pengawa bepilih besai 9 November tu tadi endang ukai utai ti nyelai sereta endang udah ditaga sereta disadang menang. Iya bepun ari pengerawang ati rayat sepengudah ke lama udah dipasuk enggau kuasa soldadu ngujungka sida ngasaika politik sida disekat. Sigi patut mih pengundi milih NLD nyadi perintah dikena nganti raban politik ti bepelasarka soldadu di Myanmar nya.

Udah ke menang nya Parti NLD enggau Suu Kyi nyangka deka ngambu model ti dikemeranka Nelson Mandela suba udah iya dilepas ari rumah pasung sereta mujur bejalaika sistem demokrasi di Afrika Selatan maya iya menang besai parti ti dipegai iya, iya nya Parti ANF. Iya nadai kala ngambi semua kuasa tang iya ti patut dikenang nya, iya empu mai Presiden kulit burak iya nya JW De Clerk ke kala ngejil iya sama-sama enggau iya numbuhka perintah baru paska Apartheid ti bepelasarka sistem demokrasi. De Clerk dichiri nyadi Mandal Presiden maya Mandela nyadi Presiden keterubah Afrika Selatan. Mandela tu dipilih ari peranak asal majoriti kulit chelum menua nya empu.

Katika Suu Kyi tu ila deka nyadi sama sebaka enggau sejarah politik Mandela? Kati Suu Kyi tu ila maya iya nyadi pemerintah deka nyaga sereta ngerayung raban minoriti ti diapartheidka perintah soldadu ngelama tu? Semua nya agi nyadika tanda tanya.

Kitai sama bela ngarap udah Myanmar ngemeranka sistem demokrasi ti dipegai Parti NLD isu ngayahka rayat minoriti ba menua nya baka ke diasaika bansa Rohinya di Rakien ulih diputarka Suu Kyi seraya ke nyadi tuai pemesai politik rama Myanmar. Komuniti Rohinya patut beguai diterima nyadi bansa ti amat sereta diberi status peranak menua lalu bisi hak ngundi sama baka bansa majoriti bukai ba menua nya.

Enti pemaik sereta pengelantang mensia mayuh ti stabil ulih dipemunka Suu Kyi reti nya iya deka disemaka baka Mandela Asia abad ke 21.

Tiada ulasan:

Catat Ulasan