Isu betubuh bisi maya umur agi biak

Pemuka Kenang

Betubuh bisi ba rebak indu ke agi biak udah nyadi isu sosial ke besai kemaya hari tu. Ninting hari kitai bisi macha ba surat berita tauka ninga ari radio tauka televesyen senentang pekara tu.

Batang Kenang

Nitihka statistik ari Opis Pengintu Pengelantang Orang Indu enggau Pengelantang Raban Bansa madahka Sarawak nya menua kedua udah Sabah ngembuan penyampau nembiak betubuh bisi maya umur agi biak ke pengabis tinggi di Malaysia. Nitihka statistik nya mega, nembiak ke betubuh bisi di Sarawak majak ngayanka trend ti ngirauka ati. Bisi 1,264 kes udah direkod dalam timpuh bulan January nyentuk ke June taun 2016.

Nitihka penemu Menteri Pengintu Pengelantang, Orang Indu enggau Pengelantang Raban Bansa Sarawak, kes betubuh bisi tu balat bendar ngirauka ati taja pan penyampau kes tu bisi nurun ari taun ke taun, ambika banding 2,909 kes bisi direkodka dalam taun 2015 enti dibanding enggau taun sebedau tu, iya nya 3,401 kes. Enggau penyampau ti ngemayuh tu nya meri penuduk Sarawak ba tikas menua ti kedua tinggi sepengudah menua Sabah enti dibandingka enggau menua bukai di Semenanjung Malaysia ke ngembuan kurang lebih 1,000 kes aja.

Nya mih kebih, lebuh beratika penyampau nembiak ke mayuh betubuh bisi tu, dia  komuniti mensia mayuh patut bendar beratika pekara enggau serius tu lalu berundingka chara dikena mutar sereta ngurangka agi penyampau nembiak ari ke ngandung maya umur sida agi biak. Semua nembiak indu lebih agi di selampur menua Sarawak tu endang patut bendar dilalau ngambika likun nyaga pendiau diri dikena nyeliahka sida ari teparit enggau pengawa betubuh bisi maya umur ke agi biak iya nya maya ke bedau patut alai sida ngandung.

Kes nembiak ngandung maya agi baruh umur tu patut bendar ditagang nengah kerejasama semua raban komuniti baik nya ari raban apai indai tauka opis perintah awakka 10 persin ari penyampau kes tu ulih dikurangka agi ba taun ke deka datai.

Nitihka pansik, bala nembiak ke betubuh bisi maya agi baruh umur tu tu tadi mayuh agi ngemaduka diri ari besekula lalu 53 persin ari sida iya ditemu bedau belaki. Sida tu enti nitih benung besekula lalu ukai mai anak lebuh umur sida baru manggai 10 ngagai 17 taun.

Nitihka rekod Opis Pengerai Nengeri Sarawak, bisi 3,000 ngagai 4,000 kes nembiak indu ke direkod betubuh bisi baruh umur bisi datai berubat ngagai fasiliti pengerai. Tu mih ke ngujungka Sarawak ba penuduk lumur dua ngerikod pemayuh nembiak ngandung baruh umur.

Ari sukut penyampau pemayuh ba Malaysia, dia menua Sarawak udah ngerikod penyampau ke pemadu tinggi enti dibanding enggau antarabansa iya nya, 3.5 persin ngagai 4.1 persin ba timpuh ke sama ari 2011 nyentuk 2015. Nitihka pansik mega naka kediatu bisi siku nembiak ke berumur 10 taun udah direkod nyadi nembiak ke pemadu biak betubuh bisi baruh umur. Raban komuniti endang patut bendar begempung mutarka pekara tu awakka enda nyadi trend kemaya hari tu. 

Ba Sarawak, pemayuh nembiak ke direkod ngandung ba taun 2016 ari bulan January nyentuk ke September ngerikod 93.9 persin. Tu nyengkaum sida ke udah badu sekula lebuh ke berubat ba sekeda klinik pengerai ba menua tu. Pemayuh tu munyi ke udah disebut tadi endang chukup ngirauka ati beduduk laban ari taun 2012 ngagai 2016 penyampau nembiak ke badu sekula tu urung iya 90.2 ngagai 95.4 persin. Nitihka statistik mega ari bulan January ngagai September 2016, 53.3 persin penyampau nembiak ke ngandung ba Sarawak nya sida ke dikategorika bedau belaki. Tu ngayanka penyampau tu niki 4.8 persin enti dibanding enggau taun sebedau tu. Pelilih Kapit nunjukka penyampau ke pemadu ngirauka ati bepelasarka rekod 13.0 persin niki kenyau ari taun 2013 ba rengat umur nembiak urung 10 ngagai 17 taun.

Ba kandang nengeri tauka pasar, statistik sida ke ngandung mega besai tang pemayuh tubuh sida ke diau ba endur tu engka mayuh lalu ngujungka penyampau sida ke ngandung tu tadi dipeda mimit, tang ba menua pesisir, sida ke diau dia nadai mayuh lalu ngujungka penyampau nya dipeda mayuh.

Munyi ke udah dipejuraika tadi mayuh agi sida ke tepejuh enggau kes tu nembiak ke badu sekula. Nembiak tu kelebih agi datai ari ruang bilik ke kurang penatai pemisi.  Nya mih kebuah, Opis Pelajar patut bendar nulung sida besekula baru lalu ukai ngemaduka sida ketegal udah beranak tauka ngandung. Sida tu patut besekula dikena ngulihka pengidup ke menyana sereta manah agi dudi hari ila.

Nembiak indu ke agi biak baka tu patut nemu pangku pengawa diri. Sida mega patut nemu berunding panjai lalu nyaga pemanah nama diri empu. Sida patut nguji nyeliahka diri ari beleman enggau pangan sida. Pengawa sida ke baka nya sempama baka buyah ke nabak diri ke api.Sida endang patut bendar nyaga pemanah nama diri empu laban iya ke ngandung nya ukai orang laki tang sida ke indu nya empu. 

Penanggul tu mega nyadi ketegal ari mayuh macham chara. Mayuh ari sida tu bekelala nengah media sosial baka wechat, facebook enggau aplikasyen ke bukai. Tu ngujungka sida besemaya betemu enggau bala lelaki lalu bebaik enggau sida sereta ngereja ulah ke enda menuku baka beleman enggau pangan diri. 

Kelimpah ari nya, kaul entara diri sebilik ti lunggar ketegal apai indai ti enda ibuhka anak sida. Kebuah pia laban apai indai sida tu kisuk enggau profesyen diri sereta pengawa ngulihka duit nya siti ari pugu pengawa ti dikerejaka sida. Nya alai, kaul entara diri sebilik patut rat dikena nyeliahka pekara tu ari nyadi. Kaul ke manah ulih ngasuh bala nembiak enda limpang runding ngiga penyayau ngagai orang bukai kelebih agi ngagai bala lelaki.

Nangkan nya mega, kurang penemu ke silik ba pelajar seksual  lalu kaul ke nadai betatak enggau mayuh orang mega ulih ngujungka kes tu nyadi. Nya alai ba menua Sarawak, perintah nengeri ari baruh Opis Menteri Pengintu Pengelantang, Orang Indu enggau Pengelantang Raban Bansa udah numbuhka One Stop Teenage Pregnancy Committee (OSTPC) ti betuaika menteri nya empu. Palan tu dikena nyediaka servis enggau chara holistik ari mayuh ejensi ngagai nembiak ke ngandung. Kelimpah ari nya, OSTPC tu dikena mantu nembiak ke ngandung nya awakka ngeringka semengat sida neruska pengidup baka selama, nyaga pengelantang indu nya enggau anak iya sereta nagang pekara ke enda manah baka kes bebuaika anak.

Raban apai indai patut ngajar anak sida iya baka ni chara begulai ke betul enggau orang bukai ke bebida penemu ari sida. Sida enda patut neju tauka ngelalaika anak sida ke ditemu udah betubuh bisi.

Pia mega bala nembiak lelaki patut betanggung jawab ba pekara ti udah digaga sida ngagai pangan indu sida. Munyi ku sempama berani nebang patut berani ngesan. Sida patut berani mangku tanggung pengawa ke udah dikereja diri.

Simpul Kenang

Isu kes betubuh bisi ke nyadi ba nembiak baruh umur udah nyadi trend ti ngirauka ati kelebih agi ba menua Sarawak. Nya alai semua raban baka gerempung ukai kuasa perintah (NGO), apai indai enggau ejensi perintah patut besaup beganding bau sama-sama mutarka kes tu ari majak nyadi-senyadi ninting taun.

Ngerembaika penemu pasal sabak sebengkah adat enggau jalai pengidup Iban

Sabak nya pengawa ti ngiring pemati nyentuk ngagai sangkai di rumah panjai sebayan. Sabak tu dikenataika orang ke tebangkar dalam leka sebak lalu iya dikumbai tukang sabak. Leka sabak tauka nyabak ke orang mati tu endang pengawa dikena meri basa sereta penyinu enggau penusah ati ngagai orang ke udah mati. 

Sabak Kenang – Journey to the Land of the Dead, is about the first category of Iban ritual dirges. It highlights the significance of Iban’s dead rituals and the extra-ordinary expert knowledge of Tukang Sabak reciting her chant using poetic language of the Sabak which are very moving and emotionally powerful of all forms of Iban ritual poetry. – Dr. Robert Menua

Nitihka adat asal raban bansa Iban bisi mayuh bansa sabak. Tu mega bebida nama ari pelilih menua siti ngagai menua siti. Sabak diserenggutka sebedau bangkai dikubur, iyanya sebedau makai pana tauka sebulan udah niang ninggal maya udah tembu timpuh ngulit. Sabak Bebuah dipejalaika sebedau bangkai disimpan ke dalam larung lalu sepengudah pulai ari pendam, Tukang Sabang nya nyabak baru lalu sabak tu dikumbai Sabak Pana ti dikena nganjung asi ke sebayan.

Sabak bepanggai bendar ba tuju enggau konteks pengawa nyabak taja batang pengawa nya endang mantaika penyinu ati nuju orang ke udah nadai. Munyi ke udah disebut nama sabak mega bebida nitihka tuju, konteks enggau menua ti ngemeranka adat tu. Ambika chunto Sabak Sedan tauka Sabak Ngerais tauka Sabak Rempah ba pelilih menua Rajang tauka Sabak Sebana  ba pelilih menua Saribas disempulangka enggau sabak ke bendar, iya nya duie-duie enggau berempah. Sabak Tina  ke dikemeranka ba pelilih menua Rajang nya diserenggutka udah tembu timpuh ngulit. Tuju tu dikena madahka niang nya endang amat udah nadai. Tina nya chelum ti dipinka ba baju tauka ditanchangka ba punggung tanda orang ngulit. Sabak Kenang  ba pelilih menua Sri Aman tu diserenggutka maya Gawai Antu. Tuju sabak tu dikena nusuika pengidup orang ti udah nadai iya nya dikena masa iya. 

Nitihka atur tu tukang sabak deka berayun ba Wa (Ayun), lalu bisi orang semak wa dia nulung iya ngingatka pemanah enggau pengawa niang ngambika ulih dilaguka tukang Sabak.

Empat pengawa ti ditempuh rambau pejalai nya ke bepun ari nengah titi rawan, rembus di pintu tanah, mudik Batang Mandai enggau pengawa ngetaska ranyai. Tukang sabak ngelaguka timang dalam kes tu iya dikumbai Sabak Kenang dikena ngiring pejalai pemati sepengelama semilan nyentuk ke sepuluh jam, berengkah ari tumu lemai nyentuk ke tumu pagi hari siti.

Adat nyabak ke nyadi sebengkah ari adat enggau jalai pengidup Iban tu udah diangkatka sereta dikerembai ngagai tikas antarabansa. Nya alai, kena 13 nyentuk 25 September 2016 Yayasan Tun Jugah (YTJ) bisi nganjung tukang sabak tebilang Siah Tutong, 74, ke Armoury’s Wade Thomson Drill Hill, New York City. Lebih 25 iku bala ari serata dunya baka ari menua Ghana, India, USSR, Kyrgystan, Azerbaijan, Armenia, Columbia, China,. Finland, Keny, Bhutan, Ecuador, Greece, Venezuela enggau Romani kelimpah ari Malaysia bisi ngulu pengawa nya. Siah Tutong tu entara 25 iku orang ari serata dunya ti bisi ngambi bagi ba pengawa mantaika leka sabak enggau chara nyabakka orang mati ba renggat antarabansa di menua New York. Siah Tutong tu datai ari Rumah Nabau, di Entawau, Baleh, Kapit.

Pengawa Yayasan Tun Jugah (YTJ) ti nganjung tukang sabak tebilang Siah Tutong, 74, tu ke menua New York diarapka ulih ngetan, ngerembai sereta ngangkatka adat enggau jalai pengidup asal Iban ba pengawa nyabakka orang mati. Kelimpah ari nya iya mega diarapka ulih ditan sereta ditemu nembiak rebak baru kelimpah dikelala serata dunya.

Tanggung pengawa YTJ ditumbuhka dikena ngemeranka pengawa nyaga, ngetan sereta ngangkatka adat enggau jalai pengidup asal, seni enggau jaku Iban.  Raban bansa Iban patut bendar temegah ati laban YTJ udah mujur nganjung tukang sabak tebilang Iban Siah Tutong, 74, ngagai renggat antarabansa. Tuju nganjung Siah awakka iya ngambi bagi ba pengawa mantaika leka sabak enggau chara nyabakka orang mati ba renggat antarabansa.

Enggau pengawa ke nganjung pengari tu ke renggat antarabansa dia adat enggau jalai pengidup kitai Iban pasal nyabak ke orang mati tu dikiraka udah ditemu ba serata dunya. Ari pengawa tu mega bansa Iban nya dikiraka sebengkah ari bansa di dunya ti ditemu bisi adat enggau jalai pengidup asal kediri empu maya bisi orang mati, taja pan chara enggau bunyi leka sabak nya enda sama.

Berindik ari leka sabak sereta chara nyabakka orang mati ti dikemeranka Iban tu udah datai ba renggat antarabansa, gerempung YTJ arap bendar adat asal nya mengkang dikeingkat sereta dikelala raban bansa Iban empu. 

Pengawa ngerembai sereta ngidupka adat enggau chara pengidup asal Iban baka leka  sabak enggau chara nyabak ke orang mati ngagai rebak baru bansa Iban endang patut bendar dikereja laban sida kediatu mayuh bendar ke agi enda nemu pengawa tu. Kelimpah ari nya mega nyentuk ke sehari tu lalu nadai penganti tukang sabak nyema sida ke tuai tu udah nadai.

Nambahka nye mega, raban bansa Iban ke sayauka adat asal patut mega ngembuan pengirau ati ngagai nembiak Iban rebak baru laban mayuh ari sida tu nadai tentu pengerindu ba adat enggau chara pengidup asal bansa, baka nyabak ke orang mati ti majak enda dikemerat sereta dikemeranka kelebih agi ba peranak Iban ke diau di nengeri. Siti ari kebuah kitai patut bendar nangika pengawa asal bansa Iban tu ari punas ketegal enda mayuh bala indu iya nya tukang sabak ke nemu pengawa nya mengkang idup.

Orang kelia ba rumah panjai enti maya bisi pemati endang nyabak mantaika penyinu enggau penusah ati ngagai orang ke mati, tang diatu pengawa tu bisi kurang bendar digaga laban nembiak rebak baru berasai malu. 

Taja pan pia agi bisi bansa Iban ke udah megai pengarap Kristian lebuh ke ngintu pemati mengkang ngambi tukang sabak ti dikarapka sida ulih ngiring semengat pemati nya ke menua serega. Enti dulu suba kenang sabak ngiring pejalai pemati ke sebayan tang diatu sepengudah sekeda bala Iban megai pengarap kristian dia kenang tu dikarap ngiring pemati nya ke serega. Mayuh bansa Iban ngemeranka pengawa tu lalu sida ngaku nya sebengkah ari pengawa asal raban bansa Iban.

Nya mih kebuah pengawa Yayasan Tun Jugah ngerekod leka sabak sereta nuliska leka sabak tu ke dalam bup endang patut bendar disukung. Naka kediatu Yayasan Tun Jugah udah mayuh ngerekod pasal mayuh macham bansa sabak baka sabak bangkai, sabak lumbung enggau ke bukai ari bala tukang sabak di menua tu kelebih agi ba kandang menua Batang Rajang. Enggau nya diarapka chara pengidup asal Iban ti dititi temali ari aki ini munya enda mudah lenyau jemah ila.

Ngemeratka pengelikun nembiak sekula

Panyun jaku

Isu pengelikun nembiak endang enda kala dikemeluka raban ti betanggung pengawa ngelama ti udah. Ninting kali bisi penusah nyadi, sida ti betanggung pengawa sigi enggau lengkas nguji mutarka penanggul nya. Mayuh macham inisiatif udah dipejalaika dikena nyamin pengelikun nembiak lebuh sida nurun sereta pulai ari sekula.

Batang kenang

Genap buah sekula ba menua tu endang udah disikap enggau bup Konsep dan Manual Sekolah Selamat. Bup tu ngerintaika malin ti terang bekaul enggau pengelikun nembiak ari mayuh bengkah aspek nyengkaum maya ba jalai, disiplin, jenayah, pengelikun rumah, pekakas enggau kereban sekula.

Isu pengelikun nembiak sigi enda ulih dikompromi kelebih agi isu ti bekait enggau jalai raya. Kebuah pia, laban mayuh bendar kes nembiak bebadi ba jalai raya majak nyadi kemaya hari tu kelebih agi iya ke semak enggau kandang sekula.

Opis Menteri Pelajar endang meratika pekara tu enggau serius kelebih agi kes bebadi ba jalai raya ti bisi nyadi ba sekula. Ketegal nya, dia opis tu udah ngeluarka Pekeliling Ikthtisas dikena nentuka pengelikun nembiak lebuh sida datai sereta pulai ari sekula. Kelimpah ari nya, pelajar senentang pengelikun ba jalai raya mega dipasuk ke dalam subjek Bahasa Melayu ngagai semua nembiak sekula primari lalu ba sekula sekondari pekara nya diajar ngagai nembiak pom satu nyentuk ke pom tiga. Ari nya nembiak ditarak enggau penemu sereta situasyen ba jalai raya. Pekara tu dikereja ngambika kitai enda ulih nyeliah pekara ti enda manah ari nyadi kelebih agi ti bekaul enggau kes bebadi ba jalai raya munyi ku sempama; ukai ngajih rangkang ngachuk mata.

Naka kediatu, Opis Menteri Pelajar benung bekerejasama enggau Institut Pemansik Pengelikun Jalai Raya (MIROS) dikena nentuka pemayuh sekula ti berisiko ngambika ulih nyaminka pengelikun nembiak. Sekula ti dikira berisiko nya sekula ti suah betapi enggau kes bebadi ba jalai raya, bisi jalai ti penuh dedat enggau kerita sereta nyadi pugu jalai alai mensia mayuh mindah kin kitu sereta iya ti nadai ngembuan perengka-guna dikena ngelayang jalai.

Nya kebuah, opis tu benung meratika baru aspek ti mungkur pugu perengka-guna baka garis pejalai kaki, bungkul jalai, lampu trafik, andau pemeraka jalai enggau papan tanda dikena ngasuh kerita belubah. Nambahka nya, opis tu mega meratika kes bebadi ti kala nyadi ngambika ulih diperundingka chara ngemanahka atur ba sekula.

Kelimpah ari nya, opis tu mega ngelanggurka mayuh strategi baka National Blue Ocean Strategy (NBOS) enggau mayuh agensi bukai baka Opis Menteri Dalam Nengeri, Polis Diraja Malaysia (PDRM), raban local council, Gerempung Apai Indai enggau Pengajar (PIBG) enggau gerempung Pelibatan Ibu Bapa dan Komuniti (PIBK).

Nambahka nya, raban polis mega enda bekompromi lebuh bejuraika isu senentang pengelikun. Nya alai, sida seruran minta sekula ngembuan pemesai pengantara sida empu di sekula. Pemesai tu diambi ari opis polis sereta deka datai ke sekula lalu meri penerang senentang isu pengelikun nyengkaum langkah rapat ti selamat maya meraka jalai lebuh deka ke sekula. Polis mega minta bantu raban sida ba kandang sekula kelebih agi  iya ti berisiko maya jalai penuh dedat enggau orang sereta kerita kelebih agi maya datai sereta pulai ari sekula.

Nitihka pansik ari polis, kes bebadi ba kandang sekula ti bekait enggau nembiak sekula nya mimit amat iya nya kira-kira satu ngagai dua persin ari penyampau kes bebadi ti mai nyawa ke bisi nyadi ba serata menua tu. Taja pia, raban polis endang tetap meratika pekara tu enggau serius ngambika kes baka tu nadai nyadi ba kandang sekula. Indah siti kes pan udah dikira mayuh. Nya alai semua raban ke bisi tanggung pengawa dalam hal tu nguji enggau bebendar nyapai taga nadai kes bebadi ba jalai raya ba kandang sekula.

Besenutuk enggau nya mega, kepala Gerempung Apai Indai enggau Pengajar (PIBG) ba serata menua patut semampai sensitif enggau pekara ti diguna di sekula diri empu. Sigi amat bisi sekula ke bisi inisiatif diri empu dikena sida nyeliahka kes bebadi ari nyadi tang enti bisi bantu ari PIBG tentu pekara tu deka mujur agi. Ambika chunto, ba sekeda sekula bisi minta saup raban ari Opis RELA nyaga nembiak ke bejalai ke sekula. Sekula tu bisi mupu duit ari apai indai dikena mayar raban RELA dipinta gawa maya nya.

Simpul penemu

Nya alai, isu pengelikun nembiak endang nadai ulih dikompromi kelebih agi isu ti bisi kaul enggau pengelikun ba jalai raya laban iya suah nyadi fokus berita kemaya hari tu.  

Patut tauka enda sekula bansa vernakular agi ditanka

Panyun Jaku

VERNAKULAR ba penemu aku nya jaku karung menganda sesebengkah menua tauka tempat. Jaku karung menganda ke ku aku nya mother tongue dalam jaku English tauka bahasa ibunda dalam jaku Melayu. Dalam konteks sekula, iya mai reti sekula ti ngena jaku karung menganda ti dikena belajar tauka nyadika medium dikena pengajar ngajar nembiak sida. Reti nya mega, jaku vernakular tu dikena enggau penuh maya pengawa belajar enggau ngajar di sekula. Tu bebida enggau jaku komunikasyen ti diadaka ukai asal ari peranak menua, ambika banding baka jaku nasional tauka lingua franca. Pekara ti deka dikupaska sekali tu ngenangka pematut kitai ngetanka sekula vernakular.

Batang Kenang

Sekula vernakular nya sekula di ngajar nembiak sida mayuh macham pekara nengah jaku vernakular tauka jaku bansa asal diri. Nitihka sejarah, sekula vernakular di Malaysia bisi tiga bansa iya nya Melayu, China enggau Tamil. Maya nya suba sekula vernakular endang diungkup ngagai bansa diri empu. 

Sekula vernakular Melayu ti keterubah ditumbuhka  dalam taun 1855,  ba Bayan Lepas, Pulau Pinang. Sekula Melayu Gelugor, Pulau Pinang ngena jaku Melayu nyadika medium dikena ngajar enggau belajar. Dalam taun 1872, A.M. Skinner bejadika sekula dua renggat, iya nya renggat pagi enggau ngalih hari. Maya pagi bala nembiak diajar jaku Melayu, Matematik, Geografi enggau mata pelajar vokasional lalu maya ngalih hari sida belajarka jaku Arab enggau al-Quran. Ketegal enda mayuh pengajar dia pekara tu nyadika faktor nadai sekula sekondari Melayu maya nya suba. Tu mih ti ngasuh ditumbuhka dua buah kolej pematih pengajar iya nya di MPSI Tanjung Malim dalam taun 1922  enggau di MPPM di Melaka dalam taun 1935.

Sekula vernakular China ditumbuhka raban Gerempung Bejalaika Pengarap London dalam taun 1815. Kelimpah ari nya bisi mega sekula China ti dibuka orang kediri-kediri tauka sekula prebet. Sekula China ngena jaku China/Mandarin (Kuv Yu) nyadika medium dikena ngajar enggau belajar. Pengajar enggau bup teks diimpot ari menua China. Chunto sekula vernalular China iya nya i. SJK (C) Hua Lian, Tanjung, Perak enggau ii. SJK (C) Chung Hwa, Kota Bharu, Kelantan. Kelas jaku China bisi mega diatur ba semua `Free School', iya nya di Melaka, Pulau Pinang enggau Singapore, tang iya enda mujur ngujungka sekula nya dikemaduka perintah.

Siti agi bansa sekula vernakula nya sekula vernakula Tamil. Sekula vernakular Tamil ngena jaku Tamil nyadika medium dikena belajar enggau ngajar. Pengajar, kurikulum enggau bup teks semua nya diimpot ari India. Ambika banding, SJK (T) Manikavasagam, Tanjung Malim, Perak.

Kemaya hari tu sekula vernakular nyau majak dikerinduka bala apai indai enda ngira bansa. Ninting taun nyau majak mayuh apai indai nganjung anak sida ngagai sekula vernakular. Nitihka statistik (Utusan Malaysia Disember 2010) bisi 55,976 tauka 9.15 persin ari 612,064 iku nembiak ke belajar ba Sekolah Jenis Kebangsaan Cina (SJKC) di serata menua Malaysia datai ari raban bansa bumiputera. Data nya mega madahka dalam taun 2010, Sarawak ngayanka penyampau nembiak bumiputera ti pengabis mayuh besekula di SJKC, iya nya 16,430 iku lalu ditangkanka enggau nengeri Sabah (12,138 orang). Penyampau di Johor nya 4,917 iku, Selangor (4,863 iku), Kedah (2,533 iku) enggau Pahang (2,457 iku).

Bedau lama ti udah, isu sekula vernakular tu tau disemaka baka telih lama nguli bedarah. Isu nya nyau baka telih ke udah lama suman ngenyit ngungkat baru ngeruga runding peranak Malaysia ke sensitif ngagai sekula vernakular.

Kenu ku raban orang ke enda rindu meda sekula vernakular tu madahka sekula bansa tu tau bendar ngeruga identiti bansa sereta tau nekul pemansang penyerakup rayat Malaysia. Sida raban tu berasai nangika nembiak ti diserara ari sekula nasional tau mai penanggul ngagai mensia mayuh dalam timpuh awak ti panjai kelebih agi lebuh sida udah besai jemah ila.

Bisi orang besetuju enggau penemu tu lalu enda kurang mega bisi orang bukai ke enda setuju enggau penemu tu. Aku empu kiraka nanahka raban ti kedua. Ba penemu aku sida tu nguji mebaka runding mensia mayuh sentang tuju belajar enggau pelajar. Sida tu tau dikiraka orang ke udu hypokrit.

Uji kitai mulaika pengingat, pulai ke pun lalu nimpai reti konsep sekula. Nitihka sejarah, menua ti keterubah numbuhka utai ti benama sekula nya menua Prussia dalam taun 1800an. Maya nya orang Prussia benung begigaka langkah rapat dikena sida ngadaka peranak menua ti taluk ke kereja sereta sanggup ngeringka sebarang tuju enggau kebuah ti dipinta raja sida. Ketegal nya sida lalu nengkebang siti sistem ke alai peranak menua sida ke agi biak diajar sereta dilatih daya idup ti berurun sereta teratur. Sida dianjung ngagai siti endur ke dikumbai sekula.

Reti nya, iya enda ngira pengulih tauka pengerindu siku-siku. Asal sida sama umur sida ulih dipegulaika dalam siti raban sereta diansak belajarka sesebengkah subjek ti ditentuka raban elit. Baka mega dalam raban soldadu, bala nembiak tu balat betuaika kepala pengajar enggau pengajar lalu sida semina nerima nama-nama utai ti diajar pengajar ngagai sida. Regimentasyen tauka atur ti terit baka tu mengkang nyadika tukuh sekula moden kemaya hari tu.

Sepengudah dua abad alai ubah singkang birokratik, dia sekula kemaya hari tu diperatika ukai semina nyediaka pelajar ari sukut holistik aja dikena nyukung pemansang nembiak tang sida mega diagih nitihka sitak tauka compartmentalised. Genap iku kitai ke udah belajar nengah sistem sekula udah digempuru tauka disitak bepelasarka pemutus peresa kitai. 

Nya mih kebuah pekara tu udah tebalan aba sida ti bekuasa nguna sekula nyadika kereban social engineering. Berengkah ari hari keterubah, kenyau ari jeman Prussian menya, tuju enggau kebuah besekula nya endang nadai tuju bukai tang ketegal social engineering. Taja pan baka nya, agi mayuh bala mensia mayuh kemaya hari tu agi beba runding sentang sekula enggau pelajar. Agi mayuh bala ke enda nemu mida entara pelajar enggau sekula.

Ari sukut realiti, kitai agi bulih pelajar taja pan kitai nadai nurun ke sekula baka selama. Pelajar ulih dipelajar ari rumah tauka nengah chara raban informal ke datai begelumu ba rumah. Kemaya hari tu iya dikumbai besekula ari rumah tauka “home-schooling”. Diatu nyau serap ari sukut global, mensia mayuh ti ngembuan pengerindu ke konsep unschooling, Sudbury schools, enggau sekula betukuh demokratik. Unschooling nya chara belajar ti ngemeratka nembiak ke belajar nya empu milih pekara ti deka dipelajarka iya.

Raban ke seruran nyangkal sekula vernakular selalu enda nalat isu tu ari sukut kualiti pelajar ti diterimaka nembiak sekula. Sida enda tentu ngembuan pengingin ati ke mobiliti sosial ke alai semua orang bisi akses ngagai pelajar ti bekualiti. Sida balat agi digerak enggau pengingin ati ke deka ngasilka komuniti ti ulih dikambuh nitihka penemu sida empu.

Raban elit ngembuan konsep komuniti ke dekaka nitih penemu sida. Nya alai sida deka ngena model sekula Prussia ke engkabih baka kilang ke semina ngasilka orang ba peringkat baruh ditentuka nitih penempa orang di atas. Dikena sida ngamatka hal tu sida ngumbai nya penyerakup. Enti diperatika amat-amat penyerakup ke ku sida nya nadai kaul enggau pelajar. Fokus sida semina sekula. Tu mih maya elemen hipokrit nya ayan. Mayuh orang ke deka ngelakuka penyerakup enti dipeda nengah chara rama nya sida ke enda kala besekula ba sekula perintah. Anak sida pan enda dianjung ngagai sekula ke alai kitai mayuh besekula. 

 

Sida nyingkang tama ke sekula semina beberapa jam aja setaun tang chara sida bejaku munyi ke sida nemu amat-amat sentang pengidup di sekula. Utai ke balat ngalitka ati nya maya sida mansutka penemu baka sida nya ke ngembuan pengarap ke dalam aba sistem sekula kitai tang ulah diayanka sida nya belaban enggau penemu ti dipansutka sida. 

Ari sukut realiti, raban elit tu bekimpin ke pekara ti nadai kaul sereta nadai meri empas ngagai sida enggau sida sebilik. Lebuh berundingka diri sebilik sida balat agi berunding nganjung anak sida ngambi pelajar ke ‘manah’ agi aba menua bukai. Sida seruran deka nyekat sekula ti ulih dipilihka kitai mayuh laban sida nemu sida bisi kuasa lalu sida empu ulih nganjung anak sida ngagai sekula ke deka ati sida. 

Tu mih ulih dikiraka tragedi ba sida ke bepenatai pemisi ke tinggi. Ari ke meri peluang ngagai semua orang milih sekula ke ulih sereta dikedekaka baka enggi sida, sida sanggup nutup peluang nya lebuh mayuh orang nadai ulih mayar masuk sekula ke baka enggi sida nya.

Uji kitai sama-sama meratika tanya retorik tu. Enti penyerakup ulih dijapai lebuh nembiak ke datai ari mayuh juru penatai digelumu ba siti sekula, bah nama kebuah sida deka nutup sekula vernakular dih? Data sereta evidens di atas tadi udah ngayanka mayuh bansa etnik besekula ba sekula China enti dibandingka enggau sekula bukai. Iya ke bendar nya mayuh agi mono-ethnic besekula ba sekula biasa. Enti kitai berunding ari sukut objektif, ukai sekula China ti patut ditutup.

Simpul Kenang

Nya mih kebuah ari tadi aku ngumbai isu ti dipetalatka tu isu ti balat hipokrit. Balat agi hipokrit lebuh pekara tu diayuk sereta dibebaka enggau runding entara pelajar enggau sekula ke baka kilang. Kelikuh pasal sekula vernakular tu kelikuh raban orang elit. Ba kitai orang selama tu, tuju sereta pengingin ati kitai semina deka nyediaka anak kitai enggau pelajar ti bekualiti. Kitai peranak selama tu agi ulih diberi peluang milih sekula ke deka kitai tang timpuh enggau maya dikena kitai berubah ngagai sistem milih sekula nitihka ati diri empu nya dikiraka agi jauh. Sementara kitai nganti juluk ati kitai nya kitai mega ngarapka raban sida elit tu badu munaska utai ke mimit ke ulih dipilih rayat selama tu.