Tentuka atur chukup ngambi kursus Jaku Iban

Mensia mayuh enda tentu lantang ati bekaul enggau syarat masuk kursus nya ba maktab

KAPIT: Mensia mayuh enda puas ati ba pengawa nentuka sapa ke patut masuk ‘Kursus S010B0000P Bahasa Iban Pendidikan Rendah (SK)’, KPLSPM ba bulan Jun 2011.

Tuai Rumah Jack Bidai ngenataika penemu minta orang gawa profesyenal ke patut nentuka calon masuk kursus nya ngambika enda milih calon ke sengapa.

“Calon ke patut masuk kursus tu mesti teulihka kredit ba Jaku Iban renggat SPM sereta ulih bejaku Iban enggau manah,” ku iya.

Siku orang gawa perintah ke enggai nama iya dipansut madahka diri berasai enda lantang ati sereta malu lebuh ngenang chara nentuka sapa ke patut masuk ‘Kursus Bahasa Iban pendidikan SK, KPLSPM’ sesi bulan Jun tu . Iya mega ngasaika pekara nya enda ulih diterima runding.

“Mayuh agi calon bansa Iban ke pandai sereta nyulut ba subjek Jaku Iban lalu enda ulih diterima runding enti ngambi calon ke enda ngambi subjek tu ba renggat SPM.

“Entara calon ke dipilih masuk kursus tu iya nya dua ari Belaga enggau siku ari Kapit ke enda ngambi subjek jaku Iban ba renggat SPM.

“Tu ngasuh aku alit ati, nama kebuah subjek Jaku Iban diajar ba renggat SPM enti enda ditetapka nyadi syarat minta masuk kursus Jaku Iban ba renggat maktab,” ku iya.

Bagi ngambi pelajar patut bejimat lebuh maya nentuka calon ke patut masuk sereta ngemeratka peneka enggau peminta raban bansa Iban, tandu iya.

Iya madahka, tuai bansa Iban patut meretika pengawa ke deka ngangkatka Jaku Iban nengah atur milih calon ke patut masuk kursus tu sebedau sida iya ngajar ba sekula jemah ila. Chairman SADIA Kapit, Edwarsd Manggah madahka subjek Iban enda sebaka enggau subjek ke bukai lalu orang ke deka ngajar Jaku Iban patut ngembuan penemu sereta pengelandik jaku tu.

“Chara milih calon tu sengapa aja sereta mandangka perintah nadai atur ke engkeman enda ngira pengujung iya jemah lalu tu nandaka pengawa ngangkatka Jaku Iban enda dipejalaika enggau bebendar,” ku iya.

Chairman Gerempung Ex-Sedadu Kapit, Wilfred Billy Panyau madahka orang ke minta masuk kursus tu enda dipilih tang orang ke enda minta mujur diambi masuk kursus tu.

(Diambi sereta dibali ari Utusan Borneo, June 17, 2011, Friday)