Nyamai Nulis

Aku apin lama ti udah bisi ninga pangan aku madah iya bisi tedingaka orang ke dikelala kami duai bisi madah nyamai nyadi penulis tak cut and paste lalu nyadi utai tulis. Aku laban ke bisi peneleba menggal mit pasal nulis tu enda tentu setuju enggau penemu iya nya. Siti ari kebuah laban aku lalu nadai mega kala meda iya nya udah kala nulis bup tauka ba majalah tauka enggau orang pekit ngarang – naka ke ditemu aku. Nyangka kelia maya agi sekula engka bisi mih iya nya nulis laban ke diasuh pengajar tauka maya peresa. Diatu pan nyangka mih iya nya agi bisi tang semina nulis ripot ba palan alai iya gawa kini, nulis jaku gerah, jaku penerang.

Nulis ngerichau aja nyangka mih mudah, tang enti nulis ketegal enggau pekit nulis karang tentu enda mudah munyi ku disebutka iya tu tadi. Kebuah pia laban ukai kitai siku aja ke nulis, abis kurang meniga iku baru bisi untung orang ke ngaturka pekit nulis karang baka ke kala diaturka opis pemadah. Naka ke ditemu aku ninting taun enda kurang ari sepuluh iku orang enggau pekit nya. Nya ney! Kati tau tak sengapa cut and paste lalu menang. Enti sema kitai ngalihka karang tauka teks nya ari jaku Melayu tauka jaku English ngagai jaku Iban agi mih kitai begunaka penemu ukai semina dalam jaku Melayu tauka English tang mega jaku Iban. Jaku Iban enti jaku sebut nyangka mudah laban kitai endang bansa Iban. Nya pan enti diasuh bejaku ba mua mayuh bisi mih kitai kekadang kapat-kapat abis tesebutka jaku Melayu laban enda nemu leka jaku dalam Iban dikena ngantika jaku nya.

Kati enti kitai deka nulis dalam majalah dih? Sebaka mih ukai tau sebarang mega nulis. Leka jaku ti dikena mesti engkeman enggau pekara tauka topik ti ditulis. Mayuh leka jaku Iban baka jaku ekonomi, pengawa enggau perengka baru endang tusah bendar deka ngiga iya tulin jaku Iban. Bisi orang nulis ngena jaku Iban ke dalam ngambika orang nemu iya tu landik bejaku Iban. Tang kekadang nya tau mega nyarutka penemu orang ke macha kelebih agi enti kelalu mayuh leka jaku dalam ti enda tentu ditemu pemacha.

Nulis cherpan tauka novel mega ukai semina begunaka penemu dalam jaku nya empu tang mega begunaka untak ke kreatif ngambika ulih nulis cherita ti ngerinduka ati bala pemacha. Nya alai dini nya bisi mudah deka nulis?

Orang ke diasuh nulis bup teks baka bup teks jaku Melayu, jaku Iban pan begunaka penemu ngulihka penerang ari turai pelajar lalu mindah iya nyadi teks tauka latih ke engkeman enggau tikas pelajar. Nulis bup teks tu mar agi laban diperesa dalam mayuh renggat sereta enda tau enda ditulis nitihka prosedur ke udah diletakka Bahagian Buku Teks (BBT) belalauka turai pelajar.

Nya alai pengawa nulis karang ke ngembuan 80, 150, 300 tauka 3000 leka jaku ukai pengawa ke muntang. Pia mega enggau pengawa nulis majalah, ensera tauka bup teks begunaka penemu ti dalam ba sesebengkah penemu. Penemu dalam nulis nya empu patut dulu dipelajarka orang ke deka nulis lalu kedua iya patut bisi pengerindu deka nulis. Udah nya tau enggau orang nguji masuk pekit ngarang baikka iya karang rama tauka cherita. Kitai ke meda orang endang nyamai mih tang orang ke nulis nya pedis munyi ku sempama jaku dalam; berat-berat mata meda, enda mih ngemerat bau ngema.