Royalti Musik Dayak nadai diterima bala artis Dayak

Kenang aku sekali tu bisi bekaul enggau peneleba aku ke nyadi penulis; iya nya kaul pasal royalti tauka upah kitai ke diterima sepengudah pengawa kitai tembu. Bisi dua chara orang mayar reta intelek kitai; iya nya nengah chara honororium tauka royalti. Honororium nya upah ke dibayar mayuh tauka abis sekali aja .Tang kenang sekali tu balat agi bekunsika penemu senentang royalti ti diterima bala artis baka penulis leka lagu tauka lirik, penengkebang lagu enggau penyanyi kelebih agi artis bala Dayak. 

Ari suba datai ke kemaya hari tu artis kitai endang didinga serebana meruan bisi penanggul. Siti ari pekara ti deka dikenang nya pasal utai ke patut diterimaka sida ke udah digela artis nya. Pekara ti deka dikenang nya pasal royalti ti patut diterima enti lagu sida bisi diputarka ba mua mayuh. 

Di Malaysia, musik ke udah direkod nya deka dijaga ba baruh undang-undang ti dikumbai Copyright Act of 1987. Taja pia sebedau iya ke empu kereban copyright nya bulih penguntung, iya patut masuk nyadi raban Music Authors Copyright Protection Bhd (MACP). Semua penengkebang lagu enggau penulis leka lagu enda tau enda nyadi raban gerempung tu sebedau sida ulih nerima sebarang penguntung ari royalti ti digumpulka MACP. 

Nitihka pansik, enda mayuh penengkebang lagu enggau penulis lirik bansa Dayak bisi masuk nyadi raban gerempung MACP tu. Artis enggau penengkebang lagu ke tebilang mega bisi ditemu nadai enggau nyadi raban gerempung tu. Kebuah sida ke enda masuk gerempung nadai udah dipansik tang nyangka sida tu enda tentu ibuh ke pekara nya tauka sida enda nemu berapa penyampau pengerugi sida ari royalti ti enda diterima sida. 

Lagu ti ditengkebang sereta direkod kemaya hari tu nyangka semina mai penatai pemisi ke mimit ngagai pengempu copyright nya tang iya mega tau betambah mayuh enti diibun dalam timpuh ke lama iya baka sempama jaku tuai mimit-mimit lama-lama nyadi bukit. Nambahka nya, nadai orang ulih melabaka utai ke tau nyadi dalam timpuh tiga puluh taun ari diatu. Uji peratika lagu Melayu dalam enam puluhan. Mayuh lagu nya agi dikerinduka orang sereta direkod lalu dimainka ba churung radio enggau televisyen. Undang-undang copyright kitai nyaga hak penengkebang sampai ke 50 taun udah orang ke empu nya parai. 

Sebuah agi gerempung ke patut dipasukka bala artis Dayak nya Performers & Artistes Rights (Malaysia) tau mega dikumbai PRISM dalam jaku pandak. Gerempung tu ngarika artis rekoding baka sida pemusik enggau pemerindang. Hak pemerindang dipebasa sereta dijaga. Sebarang artis ke merindang sereta ngerikodka aktiviti sida endang patut bendar nyadi raban gerempung tu. Sida tu nyengkaum raban pemusik enggau penggubah musik. Royalti ti diberi ngagai raban PRISM nya digumpul gerempung ti dikumbai Public Performance Malaysia (PPM). Nyadi sida tu ngarika gerempung industri rekoding tauka Recording Industry Association of Malaysia (RIM). Dua buah kompeni ke bisi bekaul enggau musik Dayak ke udah nyadi raban gerempung RIM iya nya LUH ari Sibu enggau Golden Pearl Recording. 

Di Sarawak empu, gerempung ti tau bendar dipasukka bala artis Dayak nya Dayak Artistes and Musicians Association (Dama). Dama tu ngari sereta mantaika bala artis Malaysia ke bebansa Dayak. 

Ari ni penatai royalti tu?

MACP enggau PPM nya dua buah gerempung ke meri lisin ngagai orang ke bemainka lagu tauka musik ngambika sida ulih ngarika raban sida ngumpul royalti. Nya alai reti nya royalti tu datai ari pengawa MACP enggau PPM ke begumpulka royalti ari orang tauka gerempung ti udah mutarka lagu tauka musik raban bala sida. 

Kati aku beguna mega ke lisin?

Kati aku agi mega beguna ke lisin taja pan aku semina bemain musik ti ditabur ari Radio enggau TV ba opis aku empu tauka premis komersial ?

Saut iya endang ya. Musik video enggau rekoding munyi nya endang dijaga baruh undang-undang copyright. Nya alai nuan, pekereja pengawa nuan tauka orang mayuh ke bemainka lagu ba premis komersial endang begunaka lisin PPM.

Kati enti aku bemain musik nengah kereban komputer Multimedia ba premis dagang? Patut tauka enda aku ngembuan lisin PPM?

Ya, kebuah pia, laban bunyi ti dikeluarka nengah kereban komputer dikira dimain ba mua orang mayuh laban iya ulih didinga nuan, bala pekereja pengawa nuan enggau raban mensia mayuh.

Isu copyright bukai ti bekaul enggau multimedia nya baka lisin bukai sereta pemendar bemainka lagu tauka musik. Enti deka nemu enggau silik sereta malin senentang pekara tu manah agi betanya ngagai sida PPM ngambika sida ulih meri penerang enggau malin senentang pekara tu.

Taja pia gerempung ke ukai ngulihka untung enggau institusyen enda disengkaum baruh undang-undang tu enti sida naburka lagu tauka musik ketegal ngiga pupu tauka tuju iya deka belajar lalu masuk ngagai palan tu mega pan enda bebayar.

Kati bisi gerempung bukai ke diagih ngumpul royalti ke pemerindang ti diatur ba mua mayuh lalu nama bida iya enggau PPM?

Bisi gerempung bukai ke ngumpul royalti ke pemerindang ke diatur ba mua mayuh (public performance). Music Author’s Copyright Protection Berhad (MACP) ngumpul royalti ngarika penengkebang lagu enggau penulis lirik ngagai kereban hak cipta sida ke dikena maya ngerikodka lagu. PPM ngumpul royalti ngagai semua lagu enggau musik ti udah direkod lalu nyadika keresa copyright kompeni rekod. 

Ni pengelama timpuh Lisin Public Performance tu idup?

Timpuh lisin nya bepanggai ba gaya public performance nya. Lisin ulih dipinta ke sebengkah pengawa aja(single event), pengawa ke timpuh iya pandak tauka dalam timpuh setaun. 

Enti deka nemu penerang silik senentang subject tu, kita tau ngelawa laman tu:

Website rasmi Intellectual Property Corporation of Malaysia (MyIPO): http://www.myipo.gov.my/ – palan alai ngulihka penemu ke seriran senentang undang-undang copyright. Dalam laman web tu bisi lambar ti ulih dipunggah (downloadable page) senentang semua pekara pasal Copyright Acts.

Music Authors’ Copyright Protection (MACP) Berhad: http://www.macp.com.my/ Laman tu bisi pom dikena ngerijista ke ulih mega dipunggah.

Public Performance (Malaysia) (PPM): http://www.ppm.org.my/v2/main.asp?content=main

Performers & Artistes Rights (Malaysia) Sdn. Bhd (PRISM): http://www.prism.org.my/

Dayak Artistes and Musicians Association (Dama): http://www.dama.my/www/

Enggau lansa kenang pasal royalti nya arapka ulih nyadika malin ngagai bala artis Dayak ngambika ulih berunding panjai senentang pemesai guna hak sida ke nyadi artis ngambika orang enda bangat beambi-ulih ba pengelandik sida aja. Nya alai enti deka bisi nerima royalti manah amat enti kitai disemaka baka burung bisi alai nepan, baka manuk bisi kerungan.