Gelema Ikan Terubuk

Padahka aja terubuk ari Sarawak, mayuh orang meliur ngenangka penyamai isi ikan nya ke gemu sereta manis. Nama agi enti iya ti diempa nya bisi telu.

Sarawak endang tebilang enggau ikan terubuk. Temuai ari Semenanjung, Sabah enggau Brunei nadai kala tinggal bebelika ikan terubuk lebuh ti bisi rembus ke Kuching.

Ikan terubuk tu tebilang di Sarawak ketegal iya lama udah pupus ari sungai di Semenanjung. Ba Sarawak spesis ikan ke ngembuan mayuh tulang tu agi mayuh kelebih agi maya musin terubuk betelu iya nya entara bulan Jun ngagai bulan Oktober.

Ikan terubuk Sarawak bisi ditemu ba Sungai Lupar iya nya entara Lingga enggau Sebuyau dalam pelilih menua Sri Aman. Kelimpah ari nya iya mega bisi ba Sungai Saribas entara Pusa, Beladin enggau Meludam, ba pelilih menua Betong sereta ba Sungai Lassa, entara Sungai Teba’ang enggau Daru dalam pelilih menua Mukah.

Taja pia, ikan terubuk Sarawak tu nyau jauh bendar kurang dijual ketegal perintah udah nagang orang nangkap ikan tu. Atur tu digaga ngambika spesis ikan tu ulih terus beranak betelesak.

Taja pan penyampau ikan terubuk tu majak kurang, agi mayuh bala pemeli ikan nengah chara borong datai bebelika ikan tu lebuh maya musin ikan terubuk tu. Sida pemeli ikan tu lalu nyual ikan tu ke menua luar kelebih agi ngagai menua Singapura.

Nya alai, ikan terubuk Sarawak ke betelu balat amat berega ba pasar. Bisi nya dijual entara RM36 ngagai RM45 sekilogram enti dibanding enggau RM28 sekilogram suba. Ikan terubuk masin Sarawak dijual RM18 siku enti dibandingka enggau terubuk ke diimport ke dijual ngena rega RM8 siku taja pan pemesai iya sama.

Utai ke enda ditemuka mayuh orang nya senentang ikan terubuk ti dijual ba pasar Satok, Kuching. Ikan terubuk ti dijual ditu nya ikan ke diimport ari India enggau Myanmar. Orang ke terubah bejualka ikan tu berengkah nyual ikan terubuk tu dalam taun 1989. Maya nya suba sekutak ikan terubuk dibeli ngena rega semina RM75 tang diatu udah niki ngagai RM150 nitihka saiz kutak.

Kelimpah ari nya, iya ke dijual ba pasar Satok nya bisi dua bansa; iya ke mit enggau iya ke besai. Iya nyamai agi nya iya ke besai lalu nya mih ikan terubuk lalu iya ke mit nya dikumbai ikan emperit. Ikan emperit kurang agi penyamai sereta mayuh agi tulang taja pan rega iya bisi murah agi.

Bisi bida entara ikan terubuk lokal enggau ikan terubuk ti dimport ari menua luar. Pala ikan terubuk Sarawak besai sereta pandak tang pala ikan terubuk import nya segala sereta panjai.

Kelimpah ari nya, ikan terubuk Sarawak nya agi idup sereta manis agi enti dibanding enggau iya ti diimport laban ikan terubuk ke diimport nya udah disimpan dalam ais. Ikan terubuk Sarawak nya belemak agi sereta ngembuan telu ke besai agi ari ikan terubuk import.

Nitihka pegawai pemansik ari Institut Pemansik Ikan Sarawak madahka tubuh ikan terubuk import nya bisi betitik-titik tang nadai ba ikan terubuk Sarawak.

Kelimpah ari nya mega, bida iya ba rega ikan terubuk tu. Ikan terubuk Sarawak mar agi enti dibanding enggau ikan terubuk import. Agi sekali meda endang tusah alai kitai mida sereta ngelai entara ikan terubuk import enggau ikan terubuk Sarawak.

Ikan terubuk dikategorika ikan pelagic sereta masuk dalam raban Clupeidae. Di Sarawak bisi dua bansa ikan terubuk, iya nya ikan terubuk tasik tauka Tenualosa macrura enggau ikan terubuk sungai tauka Tenualosa toli. 

Mulut ikan terubuk tasik mit, pandak sereta betubuh gemu. Ikan terubuk sungai ngembuan mulut besai sereta panjai. Penempa ikan terubuk semina ulih dikelala lebuh umur ikan tu udah manggai dua taun sereta betelu.

Nitihka pansik Opis Ikan Tasik Sarawak, ikan terubuk sungai berengkah betelu ari bulan September ngagai Oktober. Taja pia, ikan terubuk mayuh tama ngagai sungai ari bulan April ngagai bulan Oktober.

Musin ikan terubuk tu enda tentu panjai, iya nya entara bulan Jun ngagai Oktober ba Batang Lupar sereta ari bulan April ngagai November ba Batang Lassa. Kebuah pia laban pemindah ikan tu ke bebida entara ikan terubuk ke ba Batang Lupar enggau Batang Lassa.

Pemanjai ikan terubuk lelaki nya kira-kira entara 12.8 ngagai 34 sentimeter lalu ikan terubuk indu nya entara 14 ngagai 46.2 sentimeter panjai. Pukul rata pemerat kedua-dua ikan tu nya 17.2 gram enggau 533.9 gram.

Taja pan panjai udah kenang senentang ikan terubuk tang utai ti ngenyinuka ati nya penyampau ikan terubuk ke bisi idup ba sungai-sungai di Sarawak nyau majak kurang ketegal pengawa nangkap ikan tu ngena chara tradisional sereta nadai betagang ngujungka mayuh ikan terubuk lalu nadai sempat besai sereta nadai sempat betelu.