Bepangka tu sebengkah ari main asal Iban. Main asal tu dimain bansa Iban maya nebas enggau maya padi ngandung. Iya dimain maya nebas laban dikena ngayuka babas ti udah ditebas mudah rebah lalu enti maya padi ngandung ngayuka Iban mangka kandung padi lalu ngasuh buah iya jampat pansut.
Bansa pangka ti selalu digaga iya nya pangka layak, pangka kulat muyung, pangka gunjau enggau pangka labu. Pangka suah agi digaga ari kayu kering, liat sereta berat baka kayu menggeris, kempas, bait, sanjan enggau tapang awakka tan dikena bepangka. Tali pangka digaga ari ribis tekalung tauka pingan.
Orang ke bepangka dibagi ngagai dua raban. Seraban nan lalu seraban mangka. Iya ke nan, ngasingka pangka ba menalan nan. Tembu semua orang ke nan nya ngasingka pangka sida, nya baru orang ke mangka lalu mangka ari adan mangka tauka garis ti udah ditetapka. Penyauh adan mangka ti keterubah iya ari menalan kira dua depa setengah ngagai tiga depa.
Enti pangka orang ke mangka kena lalu naga iya lalu disiduk. Udah nya iya dibai ngagai palan ke endur besemetah. Adan ke alai mangka dibagi ngagai mayuh takah. Adan ti pengabis semak ari adan nan dikumbai adan jinak. Udah nya lalu ditangkanka enggau adan siga, adan janau, adan ringka enggau ti bukai. Ba siti adan sida bemalam tiga malam lalu enti menang nya baru tau singgah ngagai adan bukai.
Lebuh maya besemetah, semua pangka ke agi begasing dibai pulai ngagai endur besemetah. Dia pangka nya lalu ditejuka begasing ba rumah padi tauka daun lalang. Pangka ke dudi padam nya ke menang.
Nya tadi penerang senentang chara-chara raban bansa Iban bemain pangka sereta enggau tuju sida bepangka. Taja pan bepangka udah jarang dikemeran bala Iban tang ngagai sida rebak baru main tu agi tau dipelajar sereta dikemansangka ngambika enda retai laban panas enggau ujan.
Tiada ulasan:
Catat Ulasan