Kuntau

Kuntau nya pengelandik nyaga pengelikun tubuh diri siti ari lanting ari aki ini bansa Iban dulu kelia. Kuntau tu ke bendar asal ari leka jaku China tang pengelandik tu mega lama udah dikembuan Iban kenyau ari kelia. Jeman kelia, kuntau nya pengelandik ti enda tau enda dikembuan tiap-tiap iku bansa Iban ke lelaki. Penemu kuntau tu mega siti ari chara dikena nyaga pengelikun diri empu maya kena kachau orang bukai. Taja pia iya ukai dikena kitai mungkal nanjal orang dulu.

Kuntau tu ngemeratka gaya kebut gerenek ti jampat sereta sikar. Maya belajar kuntau, orang nya bisi diajar nyilat tumbuk munsuh, numbuk, nendang sereta ngena senyata baka pedang, sangkuh enggau kayu tembung. Gaya bungai kuntau nya digerenek ngena lumai gulai langkah pencha enggau seni ajat bunuh. Nya mih kebuah, kuntau tu dikumbai siti ari seni nyaga pengelikun gembar tubuh diri ti unik, manah sereta alus dipeda enti dibanding enggau seni gembar tubuh ti bukai.

Kuntau suah dibantaika orang maya bisi pengerami baka Gawai Dayak enggau melah pinang. Iya diserimbai enggau tabuh ti ngena pekakas baka tawak, bebendai, engkerumung enggau ketebung. Tiun tabuh nya nyadika peransang orang ke bekuntau ngambika iya gagit agi ati ngerenekka bungai kuntau iya enggau naka pemanah-manah.

Kuntau Iban diajar siku pengajar ti digela orang guro. Iya landik sereta ngembuan mayuh macham bungai kuntau. Guro ngajar nembiak iya ba menalan ti dikumbai kelang ti digaga ba dalam babas kira-kira sepengangau penyauh ari rumah panjai. Kebuah pia, maya belajar tu, orang bukai ke ukai nembiak iya enda tau meda.

Baka seni gembar tubuh ti bukai, kuntau Iban mega bisi atur disiplin kediri empu. Tiap-tiap nembiak guro nya enda tau enda dani tumu pagi lalu dipanjah ngena ai mayang pinang ti direndam dalam sebuah tajau. Udah nya sida diasuh mandi ai sungai. Lebuh ke mandi, dia bala nembiak iya diasuh nyelam sebilah duku ti ditempalung ke dalam sungai iya. Udah siku ari sida nya tetemuka duku nya tadi, nya baru sida diasuh belanda ngagai kelang kuntau lalu berengkah belajar.

Udah tujuh hari belajarka buah enggau bungai kuntau ba kelang nya, dia pengawa belajar nya pan tembu. Penembu pelajar kuntau nya dirami ngena adat gawai ti disebut tamat, reti nya udah tembu belajar. Ba pengerami tu, guro muka menalan dulu mantaika gerenek bungai kuntau iya. Semua orang ke meda bula enda tebelenga lilih magang. Sengian sekayu ruai. Sigi nengkelak begilik pala magang bala mensia mayuh meda pengelandik guro. Nya mih enti enda landik baka nya bedau tau nyadi guro kenu ku telai sekeda ke bisi meda. Udah tembu guro nya bekuntau baru idar siku-siku nembiak iya diasuh mantaika kuntau diri. nembiak iya ke pemadu landik, sikar sereta lanchar bekuntau maya nya digelar guro nembiak numbur satu.

Ba pengujung pengerami nya, nembiak kuntau besumpah ba mua guro sida iya, besemaya enda nyalah guna pengelandik kuntau ti udah dipelajarka sida nya. Sida mega minta berekat ari Petara. Guro mega ngelalau sereta meransang nembiak iya ransing sereta rajin agi belatih ngemanahka kuntau diri belama-lama ngambika ulih nyadi guro baka iya empu.

Nembiak rebak baru kemaya hari tu jarang bendar ngembuan pengerindu bekuntau. Mayuh ari sida nadai ati deka belajar kuntau. Taja pia, enda bangat kelalu laun enti semua bansa Iban ransing ati beserakup ngetanka main asal tu enggaika jemah ila punas. Kelimpah ari ke dibantaika maya rami, kuntau tau bendar diangkatka nyadi siti ari pekit lumba enggau main ba menua tu.