Meringga nya pengawa ngulihka tepung ari batang mulung. Pengawa tu suah agi dikereja orang Iban kelia maya bulan begantung senduk. Maya tu orang suah suntuk pemakai. Tepung mulung nya dikena nyanding asi. Aku benasit amat bisi enggau apai aku kelia meringga. Nembiak kemaya hari tu nyangka jarang tauka nadai kala bisi peneleba meringgau laban pengidup kemaya hari tu jauh lantang dibanding enggau dulu suba.
Nyadi batang mulung ti pemadu manah diperingga iya nya ti benung nungkul. Mulung ti ngenuai tu benung perisi lalu tepung iya mega benung nyamai diempa. Lebuh meringga, orang begunaka kereban baka kapak, duku, pemarut, gadang enggau utai bukai.
Palan ti endur orang meringga nya semak penatai ai. Ai pemadu beguna dikena manjah repu sekumbang iya diindik.
Datai ba pun mulung ti dipilih, sida lalu belabuh nebang iya. Udah nya rebah, batang mulung lalu dikupas, dilumpung lalu dibai ngagai palan endur meringga. Semua pengawa ari ngupas sampaika mulung dibai ngagai palan endur meringga dikumbai munang.
Ba palan endur meringga, batang mulung dilumpar. Lumpar tu dipanggaika ngagai atas kuda-kuda ti alai iya lalu diparut nyadi repu. Semua repu tu tadi ditimbun di atas tikai.
Udah nya iya diangkut ngagai gadang ti digaga ba atas empayak tauka empara. Nyadi ba baruh empayak tu bisi disediaka penimbun siti ti dikumbai tebarung tauka tabau. Repu mulung ti dalam gadang nya tadi dipanjah ai sereta diindik dikena mansutka tepung iya. Lebuh repu diindik, tepung mulung ti bechampur enggau ai neritik lalu betimbun ba tabau. Iya ditejuka lega. Tepung mulung nya lega enti ai dalam tebarung udah berupai chiru.
Udah nya baru orang nuska ai datai ke rangkai. Pengawa meringga tau dikumbai tembu enti tepung mulung udah likun disimpan dalam ma ti dikena kitai mai iya pulai ke rumah.
Tepung mulung tau digaga nyadi mayuh macham pemakai baka tumpi, linut, sagu enggau tebaloi.
Tiada ulasan:
Catat Ulasan