Berat mata meda berat agi bau ke ngesan

Kenang pengarang sekali tu nguji meratika parti ti napi penanggul ari kaban dalam parti. Ni-ni parti di Malaysia baik iya di Malaya, Sarawak tauka Sabah sama udah bisi peneleba dipadam gerempung pengerijista (ROS) ari rejista tauka napi penanggul ari raban dalam parti. Sekeda parti nya baka parti UMNO parti ti pengabis besai dalam Barisan Nasional (BN) ti kala bepechah ngagai dua parti iya nya parti UMNO Baru enggau Semangat 46, parti MIC ke bepechah ngagai mayuh parti mit lalu sekeda parti di Sabah baka parti Berjaya enggau PBS. Di Sarawak, parti ke benung napi penanggul nya parti SPDP enggau SUPP. Tang kenang sekali tu semina ninjau parti SPDP.

Parti Progresif Demokratik (SPDP) nyangka udah mujur mutarka penanggul lima iku raban SPDP tang parti nya agi napi penanggul ke bukai. Nitihka pemerati politik, penanggul ke besai ditapi SPDP iya nya pengelenyau empat iku pengari Kaban Kunsil Nengeri enggau siku Kaban Parlimen (MP) sepengudah sida nya dibuai tauka ngemansutka diri ari parti nya. Raban sida tu nyengkaum Kaban Kunsil Nengeri (ADUN) Tasik Biru Datuk Peter Nansian Ngusie, Datuk Sylvester Entri Muran (Marudi), Rosey Yunus (Bekenu) Paulus Palu Gumbang (Batu Danau) enggau Kaban Parlimen Mas Gading, Datuk Dr Tiki Lafe.

Pekara ke balat ngenusahka parti iya nya tiga iku ADUN ti ninggalka parti nya ukai pengari rayat sengapa ke  dipilih rayat tang sida nya bepangkat menteri. SPDP engka ngumbai nya ukai pekara ke besai, tang dalam politik penyampau pengari ke menang dalam pengawa bepilih nya beguna amat sereta tetap dikira.

Suba mensia mayuh nyemaka parti SNAP (Sarawak National Party) baka parti nyamuk ketegal ngembuan pengari ke pemadu mimit enti dibandingka enggau parti komponen BN ke bukai. Belaluka chunto nya mega, parti SPDP diatu tau disemaka baka parti nyamuk.

Sepengudah muai Entri ditangkanka enggau pemansut empat iku pengari rayat, parti SPDP nya diatu semina diarika dua iku Kaban Kunsil Nengeri sereta Tiga iku Kaban Parlimen.

Dua iku ADUN ke agi dalam parti nya, iya nya presiden parti Tan Sri William Mawan Ikom (Pakan) enggau Wong Judat (Meluan) lalu Kaban Parlimen iya nya Datuk Jacob Dungau Sagan (Baram), Datuk Seri Tiong King Sing (Bintulu) enggau Jelaing Mersat (Saratok).

Enti nunda  endang nyadika juluk ati semua parti politik ngembuan mayuh pengari rayat laban pekara nya tau ngeringka parti sereta ngasuh parti nya tebilang. Nya mih kebuah genap bengkah parti ukai semina dekaka penyampau penuduk ke mayuh tang deka menang ba semua penuduk nya ke bisi dipasukka sida dalam pengawa bepilih. Semua tu mandangka pengering enggau pengerindu rayat ke parti nya.

Pekara ti nyadi ba SPDP ngenyinuka ati tang nya mih gaya politik. Nya alai berebak enggau nya, tuai enggau raban parti SNAP bisi komen madahka penanggul ke ditapi SPDP  nya upah ke diterima parti nya bepun ari pengawa ke dikereja tuai parti nya ngagai parti SNAP suba. Presiden parti SNAP ke baru dipilih Edmund Stanley Jugol madah, “what goes around comes around” lalu nya mih ti nyadi ba tuai SPDP.

Jugol, ke nyadi tuai nembiak SNAP maya penyarut berebut deka nyadi tuai dalam parti nya, madahka penanggul ke ditapi SPDP ukai pekara ke besai sereta baru ba tuai parti SNAP. Sida udah melabaka pekara nya nyadi seagi bisi tuai dalam parti (SPDP) diketuaika orang ti mechahka parti SNAP sereta numbuhka parti baru suba.

Taja pan iya nadai nyebut sebarang nama tang iya sigi nujuka jaku iya nya ngagai raban ti betuaika Tan Sri William Mawan ti ninggalka SNAP lalu numbuhka SPDP.  Lebuh nya suba, SNAP lalu bepechah ngagai dua raban. Maya nya suba orang ke ngarika Mawan lebuh iya mansutka diri mantah  ba aum besai parti SNAP iya nya Datuk Dr Tiki Lafe, Datuk Peter Nyarok, niang Datuk Dr Judson Tagal, Datuk Sylvester Entrie, Datuk Jacob Dungau Sagan, Peter Nansian enggau sekeda sida ke bukai. Iya pansut ketegal enda setuju enggau pemutus penemu ba aum besai parti SNAP ke betuaika niang Datuk Amar James Wong. Niang Datuk Amar James mutuska penemu ngantung Kaban Parlimen ari Bintulu iya nya Datuk Seri Tiong King Sing. Pekara nya ngujungka parti SNAP dikinsil lalu parti SPDP pan ditumbuhka sereta betuaika Mawan nyentuk ke sehari tu.

Penanggul ke ditapi SPDP nya nyau deka sebaka enggau penanggul parti SNAP lebuh tuai raban kunsil SPDP ti betuaika Nansian pansut ari aum sepengudah Entri diketuka mangku pengawa Sekretari.

Siku ari kaban SNAP, Edmund Rudin madahka Mawan enda patut nyalahka orang bukai senentang pekara ke ninggang SPDP nya kemaya hari tu.Iya patut nerima pekara nya enggau runding ke tebuka laban iya kala ngereja pekara ke sama ngagai tuai parti SNAP sebedau tu. Enti iya tau ngereja pekara ke baka nya ngagai orang bukai, orang bukai pan nemu malas pengawa iya. Nya alai sebedau nama-nama dulu nempik dada baru nanyaka penenguk nyawa laban enti bandung pechah yu tetap kenyang.

                                             (Diambi sereta dibali ari Utusan Borneo 17 January 2012)