Macha label pemakai ke pengerai tubuh

JAKU TUAI bisi nyebut enti nuan meri siku ikan ngagai orang tentu orang nya bisi utai diempa iya sehari nya. Taja pia enti nuan ngajar iya nginti nuan meri iya pemakai sepanjai idup iya.

Penemu baka nya patut mega digunaka dalam hal pemakai lalu pengawa ke enda ngetu nya patut pajak dipejalaika dikena meransang mensia mayuh ngemeranka gaya pemakai ti mai pengerai.

Enti nuan ngajar mensia mayuh ulah macha label pemakai, meransang sida milih pemakai ti manah lebuh sida bebelika utai pakai sereta mantu sida merambu menu ke seminggu,  nuan nya ke bendar  ngajar sida pengelandik sepanjai idup ngambika sida ulih ngaga pemutus penemu ti manah senentang gaya pemakai.

Belajarka gaya pemakai ke bendar  bepun ari pengawa ke ngaga pemutus penemu ti betul sereta berat. Ambika banding, katika kala tauka enda nuan berundingka bansa  pemakai sereta penyampau ti deka diempa nuan?

Tang suah agi mayuh pemutus penemu nya digaga ukai maya deka makai, tang lama sebedau nuan duduk di meja makai.  Iya  nya bepun ari nuan nyediaka rintai utai ke deka dibeli sampai ngagai maya nuan di pasar raya, kedai runchit tauka pasar, lalu pulai ke rumah nyumai (tauka disumai pemantu rumah nuan).

Inisiatif The Healthy Eating Through Healthy Shopping (Ngemeran Pemakai Manah ke Pengerai Nengah Gaya Beli Ti Manah) bisi dipejalaika kena bulan Oktober 2011 di pasar raya. Tu chara  ti manah dikena mantu rayat ba renggat ke berat lebuh dalam proses ngaga pemutus penemu.

Dalam kempen berinovatif ke dipejalaika berenggat-renggat di pasar raya baka  Giant, Jaya Jusco enggau Mydin di serata Malaysia, pakar pemakai dipinta ngiring sereta ngembing mensia mayuh lebuh milih bansa pemakai ke manah ke pengerai  di seksyen pemakai  tepilih pasar raya sereta meri lalau ngagai sida nengah peneleba ke dikumbai penemuai ngagai  pasar raya.

Lebuh penemuai tu, pakar pemakai ke gawa maya nya deka mantu mai  seraban pemeli  ke dipilih nya bejalai ngagai lima seksyen pemakai,  iya nya beras, buah enggau sayur, ikan, tusu enggau minyak. Lima seksyen tu ngari lima raban pemakai dalam Piramid Pemakai Malaysia.

Lebuh ke dibai nemuai ngagai kimpin tu, pakar pemakai ke gawa dia deka nerang enggau terang senentang guna nutrisyen bepelasarka Piramid Pemakai Malaysia, ukur utai ke dinah, pemakai ke disilih sereta chara milih pemakai ke mantu pengerai ke bisi disediaka di seksyen pemakai ke dipilih nya.

Sida mega mandangka chara macha label ba tungkus pemakai sereta mandingka nilai  pemanah mayuh macham produk ke bisi dibantai dia. Taja pan kitai ke datai kia ukai pakar nutrisyen ti dilatih tang kitai bulih tips nya ke tau nyadika pengingat ti beguna amat.

Minda kitai ukai seruran fokus lebuh bebelika barang renchit. Suah agi ke bisi mayuh faktor ti ngasuh kitai enda ingatka  ‘prinsip pemakai ke manah ke pengerai’, ambika banding maya anak kitai mejal kitai meli barang tu tauka nya ke sida. Tu ngasuh kitai charut runding laban mayuh macham bansa barang ke bisi di pasar  tauka kitai nyau berasai kena tekan laban ke beguai-guai ketegal kelalu kiruh enggau pengawa.

Enti bisi pakar pemakai  di tisi lebuh kitai bebelika utai tentu kitai enda sebarang bebelika utai laban kitai berunding  dulu, ukai semina nikau semua barang ke dalam bakul tauka troli.

Enti ulih manah agi enti kitai ngaga rintai utai ke deka dibeli belalauka perambu menu seminggu sebedau keluar rumah. Lebuh tiap-tiap pemakai ke udah diperambu dinah, iya tau ngasuh kitai nentuka bansa pemakai ke manah ke pengerai  baka utai ke patut lalu iya mega tau mantu ngelimatka awak enggau kos lebuh ke nurun ngalu ke pasar bebelika utai.

Mayuh orang  nurun ngalu ngaku nadai mai rintai barang ke deka dibeli. Tu ngujungka sida bebelika utai nitihka pengasai ati aja. Sida milih barang  nitihka ati sida aja tauka laban tetarit ati meda tungkus ti manah sereta bechura-chura. Raban ke bansa tu suah meli produk ti enda diguna lalu enggau awak ke sama sida ngiga barang  murah ti nyangka ngundan nilai nutrisyen ti baruh.

Enti ulah  deka ngaga perambu, nyediaka rintai barang ti deka dibeli enggau milih barang nengah chara rasional di pasar raya udah nyadi ulah selama, iya deka nyadi siti rutin lalu lama-lama ngujungka iya dikemeranka kitai sepanjai idup.

Baka nya mega enti kitai mantai ngagai anak kitai proses  enggau pemakai ke ulih diempa sida, kitai ulih ngenataika penemu nya ngagai sida ngambika sida mereti, ukai semina madahka ngagai sida nama utai ke ulih tauka enda ulih digagaka sida.

Nama-nama utai ke dipelajar  di pasar raya nya semina pun pelajar, tang langkah ke berat agi nya ngenatai diri ngagai tuju ke besai agi, iya nya gaya pengidup ke ngasuh kitai bepengerai. Kitai ulih  ngena prinsip tu dalam mayuh aspek pengidup kitai maya  kitai patut meri pemutus penemu senentang  pekara ti bebida ngagai pengerai kitai.