Kelab ti ngemeratka pengawa pelajar anak

KUCHING: Saribas Social and Recreation Club (SSRC) nya sebengkah kelab ti keterubah meri perais ngagai ruang bilik ti ngembuan pemadu mayuh graduate ari universiti.

Sapit Kepala Menteri ti mega Kaban Kunsil Nengeri (ADUN) Layar, Datuk Patinggi Tan Sri Alfred Jabu Numpang lebuh bejaku ba pengerami makai malam kena ke Hari Enam apin lama, madahka perais nya patut berengkah diberi taun baru, setipak enggau pengerami  50 taun Sarawak udah merdeka dalam Malaysia.

Taja pia chara nentuka pemenang kebulih perais nya ila bedau temu, tang pengawa ngakim nya deka bepelasarka penyampau anak uchu ti udah pas ari universiti.

Perais nya semina diungkupka ngagai kaban gerempung aja, iya nya komuniti Iban ari kandang menua Saribas.

Nitih ku Jabu, orang ti menang nya deka nerima perais mata duait iya nya lumor satu RM3,000, lumur dua RM2,000 enggau lumur tiga RM1,000.

“Perais ti diberi patut nyadika insentif ngagai kitai (Komuniti Iban Saribas) ngambika ulih nempa mayuh agi nembiak graduate. Enti kitai ngatuir pengawa tu taun baru, kitai tau ngingatka pemujur kitai dalam kandang 50 taun Sarawak merdeka dalam Malaysia,” ku iya ba pengerami makai lemai SSRC nya.

Kelimpah ari nya mega, Jabu ngarapka  nembiak rebak baru Iban enda ngelengka jaku asal diri empu.

“Nadai salah kitai belajar sereta ngemeranka jaku bansa bukai baka Mandarin enggau Jipun, ngambika ulih besemekih ba makit dunya tang anang enda ngemeran sereta ngemeratka jaku Iban kitai empu,” ku iya.

Iya berasai temegah ati ngagai dua buah agensi iya nya Opis Menteri Pelajar laban ti udah ngemendarka jaku Iban nyadi sebengkah matapelajar ti diajar ba sekula enggau ngagai Universiti Perguruan Sultan Idris (UPSI) Perak ti nyendiaka kos kena matih pengajar ba pelajar Jaku Iban.

“Nengah pengawa tu, jaku Iban deka dikemansang lalu diguna rebak dudi,” ku iya.

Sama datai ba pengerami makai lemai nya Menteri Pengeraja Asal enggau Rampa Menua ti mega Kaban Parlimen (MP) Betong Dato Sri Douglas Uggah Embas sereta  kaban Parlimen Lubuk Antu, William Nyalau Badak. Pemesai bukai ke bisi enggau pengerami nya Sapit Menteri Pengintu Pengelantang ti mega ADUN Bukit Saban Robert Lawson Chuat, ADUN Balai Ringin Snowdan Lawan enggau ADUN Engkilili Dr Johnical Rayong.

Ba pengerami nya, insentif mega diberi ngagai 112 iku ke nyulut ba peresa perintah taun 2011. – Utusan Borneo