Ngemansangka jaku Iban di sekula

Jaku Iban nya siti ari mata pelajar ti bisi diajar ari tikas primari ngagai sekondari. Dalam taun 2011, mata pelajar jaku Iban udah nyadi siti ari mata pelajar elektif sebaris enggau mata palajar Bahasa Kadazandusun,  Bahasa Arab, Bahasa Tamil enggau Bahasa China. Reti nya jaku Iban ulih dipelajarka ukai semina nembiak bansa Iban tang mega ngaga nembiak bansa bukai di Sarawak. Ngelama tu ba tikas primari jaku Iban diajar ari taun 3 ngagai taun 6.  Dalam Kurikulum Standard Sekolah Rendah iya diubah ngagai taun satu sereta diangkat nyadi mata pelajar elektif sereta ditisih nengah tisi belalauka sekula (PBS).

Ba tikas sekondari, mata pelajar jaku Iban diajar ari pom satu nyentukka pom lima. Ba pom tiga nembiak ke ngambi mata pelajar tu deka ditisih nengah peresa PMR tauka penilaian menengah rendah. Ba tikas tu bisi ubah pemansang ari sukut format enggau instrumen dikena nisihka nembiak. Format peresa PMR ti udah dikena kenyau ari SRP suba udah ditukar dalam taun 2009 ngagai dua keretas iya nya Kertas 1 nya keretas objektif lalu Kertas 2 nya subjektif. Ba tikas sekondari atas, mata pelajar jaku Iban berengkah diperesa ba tikas Sijil Pelajaran Malaysia dalam taun 2008. Setipak enggau pengawa transformasyen perintah, mata pelajar jaku Iban ba peringkat sekula sekondari baruh mega deka berubah berengkah ari taun 2012, iya nya nembiak ke masuk pom satu taun tu. Sida ke ngambi mata pelajar jaku Iban deka berengkah ditisih nengah tisih belalauka sekula tauka PBS.

Kelimpah ari dua ubah pemansang nya tadi, kemaya hari tu jaku Iban mega bisi disedia ngagai nembiak ke masuk palan pematih pengajar iya nya ba IPG Rejang. Nembiak ke dipilih tu ditagaka udah keluar ari institut tu ila deka bulih setipikit ke meri sida lisin ngajar jaku Iban. Sida tu ila deka ngajar nembiak ba tikas sekula primari. 

Besenutuk enggau nya mega jaku Iban mega udah diambi nyadi mata pelajar minor diajar ke nembiak ke minta nyadi pengajar ti ngembuan degree. Pengawa tu udah diungkupka ngagai Universiti Perguruan Sultan Idris (UPSI). Kepenudi bendar, mata pelajar jaku Iban mega bisi diajar ngagai nembiak bukai ke enda kala ngambi mata pelajar jaku Iban di sekula. Kus tu bisi diajar ba Universiti Malaysia Sarawak berengkah ari taun 2011.

Nyadi nya ku gaya pemansang mata pelajar jaku Iban. Ngagai raban bansa Iban, tu pekara ti patut bendar mai asai temegah ati ngagai semua laban iya udah nyaguka jaku Iban tu setipak enggau jaku bansa bukai ke udah dipelajarka nembiak di sekula.

Pengawa ti ngemansangka jaku Iban tu ukai pengawa ti lempung lalu ulih dikerejaka siku-dua orang Iban aja. Pengerembai jaku Iban di sekula udah majak nyegang bepun ari pengingin politik tauka political raban bansa Iban. Hal tu ulih diperati ari sukut sejarah lebuh jaku Iban tu berengkah dikena perintah kelia. Taja pia dikena jaku tu terus mansang, mata pelajar tu enda patut nyadika penyukung dikena ngangkatka diri dalam sukut politik laban enti baka nya iya tau bendar muntanka pemansang jaku tu jemah ila lebuh semua orang berebut deka ngiga nama sereta dengah ke udah ngumbai diri bisi buya ngemansangka jaku tu.

   

Nya alai pulai ngagai pemansang jaku Iban di sekula, utai ti patut ditanya nya ni naka tikas pemansang tu udah naka ke diatu. Enti diperatika ari sukut penyampau bup teks diudah dichelak ba tikas primari ke siti-siti taun kenyau ari taun 2001 iya nya 7000.  Ba tikas PMR, ninting taun bisi 4000 ngagai 5000 nembiak ngambi peresa tu taja pan penyampau nembiak Iban enti dikira nyangka jauh lebih ari nya. Ba tikas SPM, kenyau ari taun 2008 bisi 1500 ngagai 1800 nembiak ngambi peresa tu.  Enti diperatika ari sukut statistik ba tikas PMR enggau SPM penyampau nembiak ke ngambi nya ari taun ke taun nya bisi nunjukka pengurang. 

Ba Bahagian Pembangunan Kuriukulm (BPK), pemansang nembiak diperatika ari data penyampau sekula enggau nembiak ke bisi mata pelajar jaku Iban lalu ba Bahagian Buku Teks pemansang dipeda ari penyampau bup ke dichelak sereta ba Lembaga Peperiksaan(LP) nya bepanggai ba penyampau nembiak ke ngambi peresa jaku Iban. Enti disidi agi mayuh sekula ke bisi tugung nembiak Iban enda ngambi mata pelajar tu ba tikas peresa. Nya alai pulai ngagai tanya ke keterubah tadi iya nya baka ni jalai ngemansangka jaku Iban tu ba sekula? Pengawa ngemansangka jaku Iban tu besai lalu disempamaka baka bandir enda ulih ditingkuh enggau lungga; enda ulih diaduka siku-dua aja.

Orang ke megai sekula tauka dikumbai kepala pengajar nya orang ke pemadu bekuasa di sekula. Ari peneleba enggau perati bisi maya siku-dua sida balat kih amat sereta enda tentu nitihka jaku sereta atur ari opis pelajar.  Enti nadai sukung ari kepala pengajar, jaku Iban enda ulih mansang baka mata pelajar bukai. Sida suah ngumbai mata pelajar tu nadai nilai ekonomi sereta nadai nilai akademik. Nadai guna belajarka jaku Iban. Enti nembiak enda mujur, prestasi sekula deka nurun. Sekeda ari sida tu nya endang bansa Iban empu. Dalam dunya tu, kitai nyimpan sereta ngetan sesebengkah ukai semina ketegal nilai ekonomi enggau akademik aja, indah orang utan, kayu ba kampung enggau rampa menua kitai tan enggaika punas. Nya alai enti nadai sukung ari kepala pengajar nadai guna bejaku mayuh semina mansau ai liur aja. Semua orang ke bisi pangkat sereta kuasa sereta rinduka jaku Iban sereta nyadi pengari Iban ba menua sida patut bendar bejaku ngagai kepala pengajar ti enggai ngasuh mata pelajar tu diajar di sekula.

Kedua nya, sukung ari raban pengajar. Dalam sesebuah sekula mesti bisi pengajar ke nemu sereta sanggup ngajar jaku Iban ngagai nembiak ke bisi pengerindu deka belajarka jaku tu. Dalam konteks tu ukai semua pengajar bansa Iban nemu ngajar jaku Iban. Nya peragam ti salah. Bebansa Iban ukai reti nemu ngajar jaku Iban. Nemu enggau ulih tu dua pekara ti bebida. Iya nemu jaku Iban sereta ulih ngajar jaku Iban. Iya enda nemu jaku Iban tang ulih tauka enda iya ngajar jaku Iban? Kati enti ditambahka enggau sanggup dih? Nemu, ulih sereta sanggup ngajar jaku Iban. Naka kediatu, sekeda sekula semina ngasuh mata pelajar jaku Iban tu diajar ba luar jam sekula. Ba tikas opis menteri pelajar, bisi mata pelajar ke dikumbai diajar ba luar KBSM baka Bible Knowledge, Bahasa Punjabi tang ukai jaku Iban.  Nya alai ketegal iya diajar ba luar taga jam sekula. Sekeda bala pengajar enda sanggup ngajar jaku Iban ukai ketegal sida enda nemu ngajar. Bisi mega raban pengajar bansa Iban ke endang nemu bejaku Iban tang enda nemu ngajar jaku Iban. Kitai mesti bebasa ngagai sida tu; anang mejal sida enti sida enda nemu. Nemu jaku Iban enggau nemu ngajar jaku Iban sechara rasmi nya dua pekara ti bebida. Tang sekeda ari sida tu enti bisi diberi jaku peransang senentang pemanah ngajar jaku Iban sereta diajar jaku Iban standard ti dikena di sekula dipelabaka sida tu ulih diambi ngajar jaku Iban. Nya alai taga jam enggau jaku peransang patut bendar dipikir enggau manah dikena ngemansangka jaku Iban di sekula.

Ketiga nya raban apai indai Iban patut bendar bisi pengerindu meransang anak sida belajarka jaku Iban di sekula ngambika anak sida nemu mayuh macham leka jaku Iban sereta budaya ke enda alah diajarka apai indai di rumah. Raban apai indai nengah gerempung apai indai enggau pengajar (PIBG) patut nengah forum maya baum nya nerang enggau silik senentang pemesai guna belajarka jaku Iban ngagai bala apai indai ke bedau nemu sereta nadai motivasyen deka ngasuh anak sida ngambi mata pelajar tu. PIBG mega bisi kuasa nulis surat ngagai Opis Menteri Pelajar minta jaku nya diajar di sekula sida. Pekara tu endang bisi disebut dalam undang-undang menua iya nya ba akta pendidikan 1997. 

Kemaya hari tu setipak enggau transformasyen perintah KSSR mega tu bisi dipejalaika ba tikas sekula primari dikena ngangkatka pemanah sistem pelajar sekula.  Dalam KSSR, jaku Iban udah diangkatka nyadi mata pelajar elektif ti ulih dipelajarka nembiak bansa bukai. Enggau pemansang nya mega bup kerembai kurikulum enggau bup teks mega patut setipak penau sereta pengulih bansa bukai ngambika sida mega ransing milih sereta ngambi mata pelajar jaku Iban tu lebuh sida datai ba tikas sekondari.

Kelimpah ari nya mega gerempung ukai perintah baka Sarawak Dayak National Union (SDNU), Sarawak Dayak Iban Association (SADIA), Sarawak Iban Writers’ Associoation (SIWA), Sarakup Indu Dayak Sarawak (SIDS), Dayak Cultural Foundation (DCF), Tun Jugah Foundation, Association of Educational Development  of Iban Language (AEDIL), Sarawak Dayak Graduates Association, Majlis Adat-istidat Sarawak (bagi Iban), Serakup Penanyi Iban Sarawak (SPIS), Dayak Association Miri (DAM), Sarawak Iban Remun Association (SIRA), Sarawak Teachers’ Union(STU) enggau Sarawak Bumiputera Tecahers’ Union nengah bala pengajar bansa Iban patut sedada sama seati sama-sama ngemansangka jaku Iban; mantu ari sukut pengulih gerempung diri empu.  Sida ulih sama-sama bekimpin ngagai apai indai sereta nembiak senentang pemesai guna belajarka jaku Iban tu. Kelimpah ari nya sida mega ulih mantu begigaka belanja wang turu, sponsor tauka meri scholarship ngagai nembiak ke terus nampung belajarka jaku Iban ngagai tikas ke tinggi. Tiap-tiap gerempung endang ngembuan juluk ati enggau tuju sida tang dalam tuju pemansang gerempung, sida mega ulih nyelitka pengawa ti bisi kaul enggau pemansang jaku Iban di sekula. Gerempung baka AEDIL ke endang betanggung pengawa merati sereta ngaturka pemansang jaku Iban patut nyadika chuan sereta teladan ngagai gerempung bukai. AEDIL mega patut ngenuluka diri dalam semua pengawa ti bisi kaul enggau pemansang jaku Iban.

Agensi bukai ti bisi kaul enggau jaku Iban mega patut bendar diberi ruang enggau peluang sama-sama ngemansangka jaku Iban di sekula. Bagi Iban Radio Malaysia, bagi Iban CATS FM, Opis Pemadah (Jabatan Penerangan), Opis Betanam betupi, Suruhanjaya Koperasi Malaysia (SKM), bagi Iban surat berita Utusan Borneo, Majalah Pegari patut diberi ruang enggau peluang ngaturka pekit nulis karang sereta mayuh agi main bukai ke dikemisi sereta dipelajarka dalam jaku Iban di sekula. Publisiti sereta kimpin patut suah dipejalaika ba radio enggau surat berita senentang semua pengawa ti bisi kaul enggau pemansang jaku Iban di sekula. Jaku Iban Standard ti dikena di sekula patut mega di kena ba radio, surat berita enggau majalah.

Kelimpah ari semua ke udah disebut tadi, orang ke endang bisi pengerindu dalam pemansang jaku Iban mega patut dibai dalam ngemansangka jaku Iban di sekula. Pemeri sida bepanggai ba pengulih sida. Enti sida bisi penatai pemisi ti lebih sida ulih sama-sama nyaup ari sukut belanja dikena bejalaika aktiviti belajar enggau ngajar. Sida ulih meri sponsor ngagai mayuh ativiti pemansang jaku Iban. Ngagai sida ke kurang agi penatai pemisi tang sanggup mantu ari sukut tulang-urat nadai salah enti sida bisi pengelandik baka pengelandik ngajat, bekuntau, penemu dalam leka main; nulung ngajar bala nembiak lebuh ke dikangau ke sekula. Orang ke pinchin gawa tang agi ulih meri bantu ngagai pemansang jaku Iban endang patut dibai ngenataika pengelandik sida dalam aktiviti ti bisi kaul enggau jaku Iban. Pia mega ngagai raban penulis dalam jaku Iban patut mega ngambi peluang ngenataika penemu diri dalam jaku Iban nengah media elektronik baka internet tauka media chelak baka bup enggau majalah. Sida tu mega ulih sama-sama begembar bau enggau gerempung ukai perintah ngeluarka kereban bacha ngambika bisi dikena nembiak sekula.

Ketegal jaku Iban udah nyadi siti ari mata pelajar ke dipelajar sereta diajar di sekula nya alai opis pelajar enggau sekeda agensi mega bisi pemesai ke duduk mekuh pengawa ti bisi kaul enggau mata pelajar nya. Nyau deka semua sektor ba opis pelajar nya bisi pengari baka ba opis Bahagian Teknologi Pendidikan (BTP), Sektor Pengurusan Akademik (SPA) JPN Sarawak, Jemaah Nazir dan Jaminan Kualiti (JNJK), BPK, LP, Institut Pematih Pengajar Rejang (IPGR) enggau UPSI. Kelimpah ari nya mega bisi pemesai ari Dewan Bahasa enggau Pustaka, Radio Iban enggau Opis Pemadah; semua pemesai tu endang bisi ngembuan pengelandik dalam pengawa ti dipekuhka sida. Nya alai sida tu patut mega dibai nyaup ngemansangka jaku Iban nengah chara smart partnership. Pengelandik sida enti enda diansing tentu bendar pulaika pengerugi ngagai jaku Iban lebuh sida udah nadai agi gawa dia laban munyi ku sempama jaku tuai, tajam tau tumpul, terit tau tendur. 

Kepenudi bendar, iya nya pemansang jaku Iban di sekula patut nerima sukung ari tuai-tuai bansa Iban. Tiap-tiap tuai bansa Iban ke ngarika nembiak tauka sitak parlimen tauka kaunsil negeri patut sama-sama nyukung pemansang jaku Iban di sekula. Enti diberi peluang sida mega patut meri pemeri sukut belanja ngagai aktiviti pemansang jaku Iban. Bala tuai-tuai rumah, penghulu enggau kaunselor di menua pesisir ke mayuh tugung nembiak Iban endang enda enggau meri jaku peransang ngagai balai apai indai enggau nembiak ngambika sida bisi ati deka belajarka jaku Iban. 

Taja pia sepekara ke patut dikeingatka pemeri patut datai ari pengelurus ati ke deka meda pemansang jaku tu lalu ukai ketegal deka ngiga dengah ari sukut nama diri empu. Enti semua orang semina deka ngambu dengah ketegal pengawa pemansang jaku Iban tu ila nyangka dia mih kitai deka meratika orang sama-sama berebut deka ngambi nama nuduhka sebengkah pengawa. Sempama enda udah bisi  - mayuh tai nyumbuh, banyak tai badak lalu enti semina baka kepayang ngadaka dilah mayuh pengawa enda ulih dipejalaika. Nya alai enti pemansang jaku Iban di sekula tu dipejalaika nengah perambu ti chukup, atur ti betul sereta sukung ti kuat ari semua lapis komuniti tentu pemansang iya enda jelungan, enda riu baka tubu tumbuh bulan tujuh.