Chelak rumpak lagu Iban sempama ‘riman’

Penanggul  chelak rumpak dalam industri muzik Iban deka terus nyadi lalu nadai tanda ngetu enti kompeni pengeluar lagu enggai bekerejasama enggau Opis Menteri Dagang Dalam Menua, Gerempung Kerejasama enggau  Pekara Bebelika Barang (KPDNKK).

Penanggul nya  dilak sengapa nadai diperati ketegal nadai nerima komplin ari sida pengeluar lagu-lagu Iban di negeri Sarawak.

KPDNKK enda ulih ngaga nama-nama enti nadai komplin ari sida ke empu tubuh. Sida KPDNKK enda ulih neritka undang-undang enti nadai dipadah tauka bepelasarka komplin ari sida ke empu tubuh.

Taja pan penanggul chelak rumpak dalam industri muzik Iban seruran dikenang dalam surat berita di nengeri tu tang KPDNKK enda ulih neritka undang-undang ketegal kompeni pengeluar lagu-lagu Iban semina diau aja.  Nya mih kebuah penanggul tu sempama baka riman.

Sebedau tu KPDNKK ukai enggai neritka undang-undang tang laban ke nadai penerang senentang sida ke bejalaika pengawa tu.

Komuniti, peminat tauka gerempung penyanyi Iban enda patut ngerijat ketegal KPDNKK enda ulih mutarka penanggul tu. Isu chelak rumpak tu ulih diputarka enti semua raban meri kerejasama ngagai KPDNKK.

Sida enda patut takut tauka berasai enda tentu tuku enti sida nemu pengawa nya bisi nyadi. Ngagai sida ke endang dalam industri muzik Iban, sida patut mantaika diri lalu meri penerang senentang isu nya ngambika sida KPDNKK ulih mutarka pekara tu lalu ngapuhka industri muzik Iban.

KPDNKK berasai alit ati ke kompeni pengeluar lagu Iban ti enggau ngeripotka isu-isu chelak rumpak ngagai sida enti penanggul tu suah amat ngeruga pengawa sida ngelama tu.

Nadai guna bejakuka isu tu enti bisi raban ke enggai ke mua bekerejasama enggau KPDNKK. Naka iya penyampau penyanyi lagu Iban di nengeri tu ke udah nyadi dengah chelak rumpak, tang kompeni sida lalu terus diau diri. Pekara tu balat bendar ngalitka ati sereta ngenataika mayuh tanda tanya.

Nya alai bala penyanyi tauka kompeni pengeluar lagu-lagu Iban di nengeri tu patut bendar meri kerejasama ngagai KPDNKK ngambika ulih mutarka isu tu ti balat bendar ngerusak penatai pemisi kompeni enggau penyanyi nya empu.

Penyanyi tauka pengeluar lagu patut nemu pasal pekara hak cipta tauka hak nengkebang ngambika semua karya sida ulih dijaga. Tu nyadika pengerugi enti bisi orang bukai bulih penguntung ari asil kereja sida ti digaga enggau naka pemendar.