Filem kitai nadai cherita

Aku di entara orang ke rindu meda wayang ba siniplek laban sistem bunyi ke manah amat didinga sereta skrin iya ke besai. Puas ati kitai meda. Semina aka jarang bendar meda filem Malaysia. Naka ke diatu aku baru udah meda dua buah filem Malaysia iya nya cherita Chow Kit enggau Horee-horee. Pekara ke deka dikenangka aku sekali tu endang bisi kaul enggau filem menua kitai, digaga bansa kitai Malaysia, dikeluarka kitai lalu dibantaika ngagai bala kitai.

Taja pan udah tembu ari semua aspek, enti iya diengkah dalam stor, iya dikumbai filem ke nadai mai reti nama-nama.

Lebuh filem nya dibai ke panggung tauka balai, sesebengkah filem nya begunaka orang meda, pemeda wayang tauka dikumbai orang kemaya hari tu penonton. Nyadi ba artikel tu leka jaku penonton nya dikena ngantika leka jaku orang ke meda wayang. Endang pengawa penonton nya nentuka penguntung enggau pengelabuh tauka pengangkat sesebengkah filem, tang faktor bukai iya nya nentuka enti sesebengkah karya ti benung dipandang ba skrin besai nya amat enda diterima raban mensia mayuh tauka enda. 

Ari tu mih, kreativiti pengarah tauka penengkebang filem bendar-bendar diuji. Hal untung enggau pengerugi endang dikira pekara berat ngagai syarikat pengeluar filem laban sida mih ke ngeluarka belanja ti besai, lalu ba ungkup penengkebang filem iya tau nyadika simbol dikena ngenataika runding sida.

Suah bendar kitai ninga jaku ari penengkebang filem nyengkaum sida ari pengeluar nya empu ke madahka sida ngasil sesebengkah karya bepelasarka pengerindu penonton iya nya orang ke meda. 

Enti pengerindu penonton nya ngagai cherita ngerau, dia kitai meda nyau besun-sun bala pengeluar tauka pengarah deka ngasilka filem cherita antu. Baka nya mega enti penonton nya rindu meda cherita aksyen, cherita nanggamka pengerindu tauka komedi.

Endang ari pun, cherita antu enggau komedi nya genre filem ti chukup dikerinduka penonton, ukai semina di Malaysia tang ba tikas antarabansa. Iya dianggap siti cherita ti mudah diterima lalu diperetika semua lapis pengidup penonton, enda kira bansa, jaku enggau pengarap. 

Nya mih kebuah, orang Melayu agi ulih meda filem antu ari Thailand enggau Korea, nyengkaum mih enggau ari Sepanyol taja pan enda meretika jaku lalu nyerakum utai ke nyarutka runding, ke bisi unsur tahyul enggau pengarap ke ulih nguing runding enggau runding khurafat. Tu balat agi ngerusakka ari filem antu Melayu.

Utai ke deka penonton endang tusah deka diambat. Iya baka ke nyangka pekara ke enda ditemuka kitai. Nya mih kebuah, ngeluarka filem nya bisnes ke dijangka pengelama iya idup nya endang  pandak, mudah retai sereta penuh enggau mayuh macham pekara bukai ti tau muntanka pemansang filem. 

Taja pia, ngagai penengkebang sereta tauke filem, anang mih ngaga filem semina bepelasarka pengeka penonton aja. Filem menua tu ukai nya baka filem import. Orang ke meda nya ukai bisi mayuh filem deka dipilih peda sida. Deka tauka enggai, jai tauka manah, bisi tikas pemanah tauka nadai pan orang ke meda nya nadai daya milih semuti tak meda aja mih sida iya ke bisi dipandang. 

Penonton deka cherita baru

Penonton mega dekaka cherita baru. Tema ti enda tentu ulih diseliah nya ngerau, cherita nanggamka pengerindu, muzikal, komedi, drama enggau iya ke bukai. Pekara ti patut diperatika baka ni chara ngaga jalai cherita nya sereta ngenataika mesej. 

Nama filem nya semina filem, tang iya ke bendar nya ‘puang’. Cherita iya klise, enda naritka ati semina  ‘chapuh’ aja lebih, tang nadai mai nama-nama reti laban nadai nyadika buah kenang orang sepengudah ke meda cherita nya. Bisi mega maya penonton deka nemu ni naka kreativiti penengkebang filem kitai. 

Endang amat, batang tuju meda filem deka beperindang tang beperindang mih enggau utai ke bisi tikas pemanah, ukai pemerindang ke subjek iya ngemelika bansa enggau budaya diri. 

Enti iya filem komedi, nama salah dialog iya natural aja ukai digaga-gaga, pandai sereta bisi info enggau subteks, ukai bejaku sengapa-kada aja.

Baka nya mega enggau filem ngerau. Ukai semina ngenakutka, tang kaul cherita iya ngembuan plot ti ngasuh penonton berunding, seraya ke mandangka pemandai penengkebang ngaga cherita iya. 

Orang ke nengkebang filem ngarapka penonton meri sukung ngagai filem sida. Kemaya hari tu, penonton kiraka bisi mih udah meri sukung. Nya alai nama mih ke ulih diberi penengkebang filem pulai ngagai penonton dih?