Inisiatif Dikena Nyaga Tasik Besai

SEOUL: Gerempung Bansa-bansa Besatu (UN) madahka siti insiatif deka diatur dikena nyaga tasik besai ari pengamah, pengawa berikan ke udu dipejalaika sereta enggau penanggul tikas ai tasik ke majak nyegang. Pekara tu ngenusahka bejuta-juta iku mensia di dunya.

Sekretari General Gerempung Bansa-bansa Besatu, Ban Kimoon madahka ‘Ocean Compact’ nya inisiatif  dikena mutarka penanggul tasik ba serata dunya tu.

Ban madahka penanggul datai ari pengamah, pengawa berikan ke udu dipejalaika dia sereta ari penanggul pengangat global.

“ Tasik besai kitai majak angat sereta mansang besai-sebesai,” ku iya lebuh ke bejaku ba mua mayuh ba konferens dikena  ngelaika hari ulang taun ke 30 konvensyen Gerempung Bansa-bansa Besatu  senentang Undang-undang ba tasik.

“Kitai nyangka enda ulih nyeliah proses ke nyadi baka arus ai ke nyadi ketegal gaya hari.

“Asid ke nyadi ba tasik besai  nyau majak mai penanggul ngagai utai idup dalam tasik sereta tikas ai tasik ke majak nambah tau mai penusah ngagai bejuta-juta mensia.”

Tuai gerempung nya mega minta atur dikena ngurangka penanggul perumpak tasik enggau penanggul orang ke mindah enda beradat. Iya ngarapka pemansang ngagai langkar atur dikena mutarka penanggul ubah gaya hari ba konferens Gerempung Bansa-bansa Besatu ulih dipejalaika di Doha kena bulan November. Taja pia penusah baka nya mega ulih diputarka berengkah ari diatu.

Ban madahka ‘Compact’ nya dipejalaika dikena ngemanahka tasik besai sereta ngenegapka atur  belalauka pelin  ti dipejalaika raban penyanding penemu. Sida tu nyengkaum orang kanan ba atur ngaga adat, saintis enggau orang ke landik ba hal tasik besai, pengari ari sektor prebet enggau raban madani sereta mega tuai-tuai ari agensi Gerempung Bansa-bansa Besatu.

Tuai gerempung nya mega madahka inisiatif iya nyengkaum nyukung Undang-undang Sempekat Tasik ti berengkah diteritka dalam taum 1994. Iya madahka sempekat nya  siti ari instrumen undang-undang ke signifikan sereta nyadika kereban dikena ngayuka pemansang (sustainable development) ti patut diubahka semua menua.

“Iya mai pengelikun enggau pemaik, guna pengeraja asal ba tasik ti setimbang sereta efisien,  nyaga sereta ngintu rampa marin sereta ngamat enggau ngerentangka atur ekonomi.

Menua Amerika Syarikat menua bekuasa besai ke apin nyain konvensyen nya. Perintah Republican dalam Senate ngumbai pengawa nyain nya ulih ngelemahka kuasa  US.

“Tasik besai ke mungkur serata dunya tu kunchi pengidup ti meruan ba planet tu,” pia ku Ban lebuh ke ngepunka jaku senentang ‘Ocean Compact’.

Objektif bukai Compact nyengkaum nyaga mensia ari penusur tasik besai sereta gelana ke nyadi baka tsunami, tekelalu mayuh pengawa berikan sereta mega ari pengamah ke datai ari pengawa ti digaga di tanah enggau di tasik. - AFP