Kes ngakal nyual jani kasam nyadi baru

SIBU: Mensia mayuh kelebih agi bala Iban dilalau bejimat maya meli jani kasam ke dijual ba sebelah pasar tauka makit laban pengawa nyual jani menua nyadi jani kampung diatu bisi nyadi baru.

Penusah tu suah nyadi tang mar deka diputarka laban tebal agi bala ke kena tinggang penusah tu enda ngaga ripot polis tang semina serabana sepengudah baru nemu kasam nya ukai jani kampung maya deka mela ba rumah.

Siku ari bala ke udah ditinggang penusah tu madah, ti semina deka dikelala enggau nama Juin, apin lama tu tadi bisi betemu enggau siku lelaki ke enda dikelala ba makit sentral Sibu ditu, madah kediri bisi nyual jani kampung ke udah dikasam.

Ku iya, lelaki nya bisi minching tiga kambut ti dipadahka jani kampung ke udah dikasam.

“Laban pechaya, aku nadai mayuh jaku lalu nyangup diri meli jani kasam nya enggau rega RM20 sekilo,” ku iya, apin lama tu tadi.

Sebedau meli, iya bisi nilik jani kasam nya dalam plastik tang enda ngadang laban meda baka ke amat nambahka agi jani kasam nya digulai enggau daun kepayang.

Juin semina nemu diri diakal maya deka manduk kasam ke disangka jani kampung nemu nya dagin jani melaya tauka dagin jani dijual China ba makit.

Ku iya, penusah tu mega bisi nyadi ba sida serumah ke bukai. Jalai kena tipu nya sebaka enggau enggi iya. Kadang-kadang orang lelaki nyual tang selalu mega orang indu.

Nyadi ku iya, tu jalai muntang sida nya ngiga untung ari mensia mayuh.

Enti nitihka, rega dagin jani kelebih agi jani kampung jauh mar ari jani menua. Tang enti ditipu baka nya manah agi meli dagin jani menua tauka ke dijual China ba makit.

Sebedau tu mega, bisi kala didinga penusah baka tu nyadi ba menua bukai baka pelilih mit Bintangor.

Mensia mayuh ke enda tentu ngelala dagin jani kampung enggau jani menua nadai mayuh kelikuh meli ‘kasam’ nya.

Sida ke ngakal tu mar deka ditemu tauka ditangkap laban sepengudah nyual ‘kasam’ sida endang berumban ngebu ke diri nambahka agi bala ke udah diakal tu mayuh agi enda ingat ke gamal sida tu.

Nya alai, kena nyeliah penusah tu, mensia mayuh dilalau anang enda berunding dulu lalu badas agi anang meli kasam jani kampung ke dijual ba sebelah jalai.

Taja pan jani kampung sebansa jelu ke ditagang dibunuh tang ba menua pesisir kelebih agi ba menua ulu tauka menua jauh ngili ai, bala Iban agi beridup ba pengawa ngasu tauka manjuk jelu kampung nyengkaum jani kampung. – Utusan Borneo