Sepil, jaku injau enggau pemansang jaku Iban

Kenang pengarang sekali tu mutik isu ke dikerandau ba laman facebook gerempung pemansang jaku Iban tauka tebilang agi dikumbai enggau nama AEDIL. Artikel tu diambi sereta diserurika baru ngambika engkeman agi dibacha. Isu nya dibantaika siku ari komiti Gerempung AEDIL sereta dikomenka sekeda pemacha. Ditu semina dikenataika komen ari dua iku pemacha ke ba penemu pengarang bisi tau nyadika teladan sereta peduman lebuh ke majakka pemansang jaku Iban. Pengarang laman blog tu endang nadai ati deka meri komen nama-nama senentang pekara tu laban deka nejuka iya ngagai raban pemacha. Nyadi di baruh tu ku munyi kenang isu pekara tu.

Limpang enda lama bekunsi berita pagi tu kala ke agi angat. Nyadi pagi tadi(4hb October 2012), ba program NGENEMUKA DIRI (Nemu Kita) ti ditaburka ari WaiFM ari pukul 7.30 ngagai 8.00, dia pengeluar program nya bisi ngenang senentang pemansang pelajar jaku Iban di sekula ke diatu. Bisi EMPAT iti isu ti dibantaika iya ti patut diperatika kitai sebuat dalam gerempung tu.

Kesatu

Kenu ku pengeluar program tu, nembiak enggau bala mayuh ke diatu lebuh bekomunikasyen dalam sosial media mayuh salah chara nyepil sekeda leka jaku ti ngembuan vokal sebut pandak (betutup) baka beli=belik, siga=sigak, siku=sikuk, etb. Lalu pekara ti bansa tu mega ngenataika penanggul ngagai bala DJ ba RTM lebuh mansutka pesan maya ti nyebut nama orang enggau menua. Nyadi kebuah utai tu nyadi kenu ku iya laban sistem ti dikena di sekula diatu nadai belebas entara sebut vokal tebuka enggau tetutup. Reti nya laban nadai diengkah tanda dikena ngelai bida entara sebut tu. Diatu sistem sepil ti dikembuan kitai endang amat nadai ngaga kelai laban udah dipesetuju enda ngena glotal ('), (k) tauka (q).

Kedua

Kenu ku iya, pemansang jaku iban di sekula ti nyau udah manggai ba tikas universiti baka ke diatu nya kelalu jampat mansang. Nembiak enggau pengajar mayuh bedau besedia ari segi jaku, chunto baka sida ke enda ulih ngena sistem sepil munyi ti di atas nya tadi. Mayuh karang dalam peresa bala nembiak kenu ku iya agi bebalut lebuh ke ngena sistem sepil. 

Tang berindik ari pansik aku, isu ti bansa tu nadai nyengala nyadi, laban kemayuh agi karang bala pengajar enggau nembiak ti diperesa aku ngayanka sida sigi udah entap ngena sistem sepil tu. Ke bisi penanggul nya bala bukai ke enda belajar ngena sistem tu baka sida ke ari luar sistem sekula kitai.

Ketiga

Kenu ku iya, komiti pemansang jaku Iban patut enda ngena leka jaku 'Jaku Injau' lebuh ti ngena tauka ngambi leka jaku ari bansa bukai laban leka jaku nya ila enda diberi pulai baru. Lalu iya madahka pekara tu bisi udah dibantaika iya maya Randau Pelajar Jaku Iban ti diatur Kelab Sosial enggau Rekreasyen Saribas. Nyadi kenu ku iya, kitai patut ngena leka jaku 'Ngena' tauka 'Ngiru'. Nyadi saut ngagai tanya tu udah dibantaika Presiden AEDIL maya randau tu.

Kempat

Kenu ku iya, pemansang jaku Iban enda patut ngayanka jaku ari siti menua aja. Polemik senentang tu bisi udah disebut aku dalam keretas penerang aku maya FORUM di IPG Rajang enggau RANDAU ti diatur Kelab Saribas. Isu tu ba tikas dalam sistem sekula nadai agi, tang kitai enda ulih mai tekura saum kerubung kelebih agi ngagai bala sida ke ukai dalam sistem sekula.

Simpul

Nya alai kaban mayuh, minta penemu ari bala kita senentang isu ti baka tu laban isu tu ditaburka ari radio lalu didinga bala peninga di merata dunya. AEDIL tu gerempung ti alai kitai sebuat berumpuka jaku, berakupka runding sereta bekiraka daya baka ni chara kitai ulih ngemansangka pelajar jaku Iban di sekula.

"JAKU LATI, BANSA PEGARI"

Komen ari Pemacha

Komen Kesatu

Saut aku ba kesatu nya baka tu, laban bala ke nulis ba sosial media nya tadi mayuh agi ukai orang ti kala belajar jaku Iban ba sekula, nyadi penemu sida ba atur sepil jaku Iban ti standard endang nadai tauka kurang . Tang taja pia enda ga kelalu nyangkung bala nembiak ke bisi belajar jaku Iban ba sekula laban kadang-kadang sida iya tebiuh enggau bala kaban sida iya. Nyadi ba penemu aku manah agi kelebih agi sida ti gawa nyadi dee jay (DJ) dianjung ngulu kus Atur Sepil Jaku Iban awakka bala sida ulih bekunsika sepil jaku Iban ti standard lebuh maya gawa.

Kedua,baka sepil ti bebalut nya endang enda entu ulih dikerarika bendar,endang bisi tang enda mayuh.Hal tu nyadi laban nembiak selalu ngalihka jaku terus ari jaku Melayu (BM) ngagai jaku Iban tauka nembiak kelalu tebiuh enggau sepil dalam BM.

Pasal jaku Iban tu kelalu jampat mansang, nya manah amat ngambika bala Iban bebendar agi ngagai pemansang nya,awakka tau nyadi peransang bala Iban ke ngemeran sereta ngengkunka pemansang jaku nya.

Ketiga, nginjau jaku enda baka nginjau barang. Jaku tu ukai utai segenda dipeda baka barang. Jaku ti dipinjau ukai diberi tauka disua ke orang.  Nya alai iya enda ulih diberi pulai laban nadai orang meri. Leka jaku injau nya tadi dikena kitai meri nama ngagai leka jaku bukai ke diinjau kitai dalam jaku Iban. Ba  penemu aku,kitai ke nemu ni bagi sepil ti betul enggau ke salah patut mih madah ngagai sida ke empai nemu lalu anang kitai ngelakka penyalah sepil nya dikena selalu. Enti kitai sama bepadah ngagai pangan diri,penyalah tu ulih dikemetulka. Anang kitai manggaika penyalah ba pangan diri. Enti majak charut nyalahka pangan diri,sampai ila-ila pan enda mih Atur Sepil Leka Jaku Iban tu entap.

Keempat, leka jaku Iban iya ke dikena ba sekula,iya nya leka jaku Iban Standard.  Iya udah dipejuraika bala pemesai ti ngatur pemansang pelajar jaku Iban ba sekula.Leka jaku Iban standard reti iya leka jaku Iban ti diambi ari semua bagi menua ba Sarawak tu,lalu ditapis ni bagi leka jaku ke patut dikena.Nya alai nadai isu jaku Iban nya diambi ari siti menua aja.

Komen Kedua

Mayuh pekara ba baruh idung iya empu patut dikemas iya baka bala staff RTM ke enda ngena jaku ke dikena chara bejimat. Ambika banding, Program ‘Mujap seduai Bunyau’ nyau sepeneka aja utai dipansut. Guna 'ke' baka ke dikena ba 'kena ke' majak dikena. Kala tauka enda  iya negur sida nya? Empleman ba mata orang dipeda, repik kayu ba mata iya enda dibuai. Bilik penaik diri enda dijaga.Aku minta AEDIL mutarka pekara tu laban ukai ketegal siku tuai ke ego, jaku Iban nyau charut.

Bala ke ngemansangka jaku patut liat ati ninga tegur orang asal laban tegur nya digaga enggau juluk deka nyeruri, nyeleti awakka iya ke dulu nya tau manah agi. Tegur nya ukai dikena muai iya ke udah ke nadai mai penyarut. Nama guna nganti kayu tebelian enggau kayu engkubung?

Di sekula, institut pematih pengajar & di UPSI, bala pengajar & pengelicha nyadi chuan ke bala pelatih enggau nembiak. Pia mega di RTM, sida patut nyadi model peninga lalu ukai nyadi utai diketawaka peninga. RTM nya ke orang mayuh lalu ukai ke bala pengereja pengawa sida aja.Ukai alai bala pengeluar mandangka penyegak, ukai alai muji diri, ngangkat bakul diri empu.

Program ti dikeluar mesti diadu enggau bejimat. Ambika banding pemanah program ti dikeluarka Mr. Jimbu, ti bekereja part time. Puji ngagai Mr. Jimbu. RTM nadai alai orang ngeluluka diri nyadi bangkut. Raban bansa Iban ke udah-udah nadai ngaga diri munyi bangkut lebuh bejaku dalam radio. Baka sida ke 'tilur' nya patut dilatih ngenataika jaku ngena sebut ti betul sereta lanchar.

Bala AEDIL pajakka pengawa manah kita. Orang ke deka nyelalang mantah enda kala ngasaika ngereja pengawa nya. Baru bisi kuasa mimit lalu udah deka ngayanka baga enggau sima diri. Orang ke baka nya enti enggau bekayuh, iya ke ngusak perau. Enti iya deka nginti, iya empu ga ngeregu ai. Anang irau pengajar. Anang irauka babas ke bisi nipas enggau batang ke bisi melintang. Bisi orang mayuh enggau kita ngereda lalu mungga.Terima kasih.