Undang-undang Enggau Atur Sekula Ti Udah Disediaka Patut Dititihka

Sekula tu siti palan alai nembiak nuntut tauka ngulihka penemu. Di sekula selalu iya penyampau nembiak endang mayuh. Siti-siti tempat ke mayuh orang baka tu endang enda jerih alai pekara-pekara ti enda manah nyadi. Nya alai dikena nyaga pengelikun sekula dia undang-undang enggau atur sekula patut dipejalaika enggau terit.

            Tuju undang-undang enggau atur sekula tu iya nya dikena nentuka siti-siti tempat likun ngambika pekara-pekara ti enda menuku lalu utai ti ukai dikedekaka kitai enda nyadi. Tu endang amat bendar laban enti nadai undang-undang enggau atur ti dititihka, dia semua pengawa ti senang dikereja enda tekabir tauka enda mujur dipejalaika dalam timpuh ti patut. Dikena nyamin semua pengawa nya bejalai enggau mujur, dia undang-undang enggau atur mesti bisi sereta dipejalaika enggau terit.

            Kemaya hari tu nembiak sekula ditelebaka enggau atur disiplin ti terit, kelebih agi ngagai nembiak ke diau di asrama. Semua atur disiplin tu enti diperatika enggau dalam endang ngembuan tuju dikena matih sereta ngajar nembiak ngambika ngelala utai ti manah enggau iya ti jai. Undang-undang enggau atur tu mega ngajar nembiak ngelala utai ti enda diasuh tauka utai ti tau ngenataika pengerusak ngagai sida empu, apai indai, bansa enggau menua. Enti disimpul enggau jaku pandak, undang-undang enggau atur tu mai pemanah ngagai nembiak sekula. Iya digaga udah bekau ti ditilik ari semua sukut ti tau ngenataika penekul ngagai orang ke bejalaika undang-undang enggau atur nya.

            Sekeda ari pampang undang-undang enggau atur sekula ti patut dititihka semua nembiak iya nya disiplin belalauka jam ti udah dipesetujuka semua orang ba sekula nya. Ambi ke banding, semua nembiak mesti datai di sekula pukul 7.00 pagi lalu sebedau masuk ke kelas, semua nembiak mesti belatur ba luar kelas nganti Pengajar Kelas ke masuk ngambi penatai nembiak. Pekayan ti dikena nembiak mega mesti pekayan ti beresi sereta nitihka putung pekayan nembiak sekula ti udah dipesetujuka opis pelajar menua tu. Nambahka nya nembiak mesti ngena tanda nama diri empu ngambika pengajar nyamai ngelala sida siku-siku. Baka nya mega enti lebuh betemu sekalika bepansa enggau pengajar dia nembiak mesti meri basa ti patut. Di dalam kelas mega nembiak enda patut tekelalu inggar bejaku enggau pangan diri. Pemeresi kelas mega mesti dijaga. Enti lebuh nguna makmal, semua nembiak mesti nitihka atur ti dipadahka pengajar dikena nentuka pengelikun semua, dijaga. Nembiak mega ditagang nginsap, ngenyingutka gam enggau bepakaika dadah. Tu mih sekeda ari undang-undang enggau atur ba sekula. Agi mayuh iya ti bukai ti enda ulih disebut ditu ke bisi diatur ba sekula.

Enti diperatika enggau dalam agi, semua undang-undang enggau atur nya tadi endang bisi tuju ngajar kitai ke nembiak ngambika nyadi orang ke beguna sereta menyana lalu nemu milih iya ti manah enggau iya ti jai. Ketegal ti mai mayuh penguntung ari ti nitihka undang-undang enggau atur sekula nya, dia semua nembiak patut ngasika atur disiplin ba sekula. Kelimpah ari nya mega undang-undang enggau atur ti terit patut dipejalaika ngambika ulih nyamin pengelikun nembiak ke besekula ba endur nya.