Panyun
Jaku
Jaku nya siti konsep rama tauka generik ke nyadi
pelasar dikena mensia bekaul enggau panggan diri. Iya nya sistem lambang
arbitrari (pemai)ti dikena mensia mantaika penemu, runding enggau geragayak ati
(Edward Sapir , 1921). Nitihka Bernard
Bloch & George Trager (1942), A language is a system of arbitrary
vocal symbols by means of which a social group co-operates”. Reti iya enti dikalihka ngagai jaku
Iban iya nya sistem lambang ti dikena raban mensia begulai tauka
bekerejasama enggau panggan diri.
Ia dikena nitihka pemai. Dalam penemu Ferdinand de Saussure (1959),
jaku (la langue) iya nya siti fenomena sosial ti dikembuan semua raban
bansa ti ngena jaku nya; lalu la parole iya nya asil jaku siku-siku
kitai.
Guna tauka Fungsyen Jaku
Jaku bisi fungsi enti guna iya
sebaka; iya nya ngena leka jaku enggau jalai jaku nitihka atur
iya(Darwis Harahap Mohamad, 2004: 50). Harimurti Kridalaksana (1993: 60) mega
madah guna jaku nya pengeribat jaku ti mai reti asil kaul struktural elemen
gramatikal, leksikal enggau fonologi. Jaku dikena ba mayuh bengkah situasyen;
iya nyadika perengka komunikasyen enggau sukul social,
pengayan reti, pengasai enggau runding, pemandai Jaku (keintelektualan bahasa),
penyampun Jaku (kesempurnaan bahasa) ti ngujungka iya nyadi penteba jaku
penemu.
Jaku
Penemu
Jaku penemu nya jaku ti dikena mantaika penemu tauka
dikena mansutka penemu baru tauka penemu moden, iya nya baka penemu sains,
teknologi, ekonomi, injinering, perubat enggau undang-undang, kelimpah ari penemu litaricha enggau pengarap.
Nitihka penemu Dato Hj. Hassan Ahmad, jaku penemu nya jaku ti ulih ngayanka pemansang bansa ba mayuh macham bidang lalu ulih
mantu proses nempa enggau ngemansangka pengelala menua (identiti kebangsaan). Reti
nya iya nyadika perengka komunikasyen enggau perengka ti dikena nyerakupka pupu
raban bansa.
Baka nya mega jaku Iban. Jaku
Iban enti ulih patut diguna nyadi jaku akademik ti nyampun sereta bisi ngundan
mayuh lebas jaku ti ulih dikena bejuraika mayuh bansa penemu moden. Nya alai
penteba jaku penemu tu ngembuan dua batang pekara iya nya dalam aspek pemandai
jaku enggau aspek penyampun jaku. Nitihka Havranek dalam Garvin (1984),
pemandai jaku ulih dikena mantaika penemu tauka runding ti engkeman sereta
semitan. Jaku ti dikena nya ngena lebas jaku
saintifik; akademik ke tau mandangka runding ti menyana.
Pemandai jaku ulih dipenyadika nengah dua chara iya nya pengerembai leka jaku
(lexicon development) enggau ubah tukuh jaku ti ngundan tusun jaku, terminologi
enggau leka jaku ti menyana.
Lebuh ke nyadi jaku ti dikena
mantaika penemu, sesebengkah jaku nya patut ngembuan tusun jaku, terminologi
enggau lebas jaku ke nemban ngambika ulih dikena mantaika konsep enggau runding
ti kompleks sereta enda segenda (abstrak). Ambika banding dalam konsep ekonomi, sekeda
leka jaku ti dikena baka pengawa dagang antarabansa, industri mit enggau besai,
bisnes saham, pengawa ngaturka akaun enggau kira-kira.
Pemandai jaku (keintelektualan
bahasa) tau nyadi enti leka jaku
enggau struktur jalai jaku Iban ulih dikerembai enggau dikemayuhka.
Penyampun jaku nya jaku
ti engkeman, nemban,sereta semitan
nitihka situasyen enggau konteks. Iya mega bisi ngayanka pengentap, pengelentur; variasyen, semitan enggau pemanah. Penyampun jaku ngembuan tukuh ti
nyengkaum pemandai, mayuh macham, pengelentur, ulih diguna, efisyen, nitihka
atur, jelan, konsisten, bisi basa sereta memelan.
Bah ni naka penyampun
jaku Iban dih? Dalam penemu raban aktivis jaku Iban dipelabaka sida besetuju
enti kitai madahka jaku Iban nya udah nyadi mata pelajar sekula, udah dikena
ngenataika penemu (bahasa pengantar), udah nyadi jaku dikena ngajar ba
palan pematih pengajar, udah mega dipelajar ba universiti, udah nyadika
terminologi sereta udah dikena nulis bup akademik.
Nya alai kitai sama-sama
besampi sereta ngarapka jaku Iban nya ulih duduk sama pemaruh; bediri sama
peninggi enggau jaku antarabansa baka jaku English, Jipun, Jerman tauka
Peranchis ti lama udah nyadi jaku penemu
moden.
Jaku dikena mantaika geregayak ati
Jaku mega dikena ngenataika
reti, mantaika geregayak ati, ekspresyen & buah runding. Reti nya, Jaku ti
dikena ngayanka pengasai, penemu enggau pikir ti patut ngembuan leka jaku
ke nyamai didinga, dinamik sereta manah. Iya mega ulih narit ati pemacha enggau peninga
sereta mayuh dikena dalam lebas jaku litaricha.
Ambika chunto nya baka tusun
jaku ke setimbal sama semunyi dalam mayuh bengkah leka main asal baka Pengap,
Renung, Ganu, Sanggai, Pantun, Timang Jalung, Timang Kenyalang sereta Timang
bukai, Sugi, Dungai, Jawang, Ramban, Pelandai, Sabak, Pelian enggau sekeda main
asal bukai.
Uji peratika dua genteran tusun jaku tu;
Baka ke beduaka lampang
rusa, bebagika lampang babi, ngenjuk lampang pelanduk, betetakka lampang bayak.
Bala jani udah bepangki
nyekuran dulang, bala manuk udah engkukuk bekerauk ngenjun gelanggang.
Jaku Perengka Komunikasyen enggau Sukul Sosial
Kelimpah ari ke udah
disebut, jaku mega dikena nyadika perengka
komunikasyen enggau sukul sosial. Nitihka penemu Asmah (1993: 16), maya
agi mit kitai ngenataika geragayak ati tauka utai ke deka ngena jaku. Utai ke ngelingi dikelala ngena jaku (proses
kognitif). Maya anak mit masang besai, jaku iya nya ngerembai. Iya ngena jaku ukai semina madahka peneka iya
tang bekomunikasyen enggau semua utai ti ngelelinggi iya. Ngena jaku, kitai
mantaika nama-nama utai ti bisi ba ati kitai laban kitai enggai iya nguyum baka
pisa (Gorys Keraf, 1997: 4).
Mensia begunaka medium
dikena berandau enggau orang bukai.
Kitai ngena jaku maya bekomunikasyen, baikka nya jaku ti disebut tauka
ditulis. Nya alai, jaku nyadi perengka ti pengabis beguna enti kitai dekaka
komunikasyen nya lanchar. Ngena chara bekomunikasyen, kitai belajar sereta
murih pantih utai ke bisi kala udah ulih aki ini kitai . Ngena jaku mega, kita
ngelumuka reti, mantaika pengasai ati lalu ngujungka kitai tau ngarupan ngereja
pengawa, ngelanggur enggau nempa pengidup ke deka datai ila (Gorys Keraf,
1997).
Jaku mega nyadi kereban
sukul sosial. Kitai milih bansa jaku enggau leka jaku ti enda sebaka maya kita
berandau enggau orang. Rintai chunto ti dikenataika Zulkifley Majid (1996: 17)
baka bup pelajar, ajar sembian, iklan enggau program berandau (talk show).
Jaku Kereban Penyerakup
Jaku mega nyadi
kereban penyerakup enggau
penyerap sosial (adaptasi sosial). Mensia mayuh semina ulih digempungka
enggau efisien nengah jaku. Jaku nya kereban komunikasyen, jauh agi ari
pengasai tiap-tiap orang nya ngasaika diri iya terikat enggau raban sosial ti
dipasukka iya. Nambahka nya mensia ulih bejalaika mayuh bengkah pengawa sida
ngena jaku. Iya nyangka nyadika kaul ti nyampun ba tiap-tiap individu enggau
komuniti iya (Gorys Keraf, 1997: 5).
SIMPUL PENEMU
Munyi ke udah diterangka
ari pun karang tu, jaku diguna nyadi perengka ekspresyen diri, perengka
komunikasyen enggau pengelala diri. Iya ngemudahka kereja, ngayanka timpai runding, nyadika pengelala diri, nemu asal
diri, ngelala menua diri. Tu ngujungka jaku nya nyadika akar enggau produk budaya.
Penyanding Penemu
Asmah Hj. Omar, (1993). Perancangan bahasa dengan rujukan khusus kepada perancangan bahasa Melayu, Dewan Bahasa dan Pustaka, Kuala Lumpur.
Bernard Bloch & George Trager (1942). Outline of linguistic analysis. Special publications of the Linguistic Society of America. Baltimore: Linguistic Society of America.
Darwis Harahap Mohamad (2004). Pembicaraan bahasa, Dewan Bahasa
dan Pustaka, Kuala Lumpur
Gorys Keraf (1997). Fungsi bahasa, -
Harimurti Kridalaksana (1993). Kamus Linguistik. Jakarta
Tiada ulasan:
Catat Ulasan