Jaku Iban sebaka enggau jaku Melayu?

Kenang pengarang sekali tu nguji meratika isu ke madahka jaku Iban nya sebaka enggau jaku Melayu. Bisi orang Iban empu madah ngagai orang bukai nya amat lalu bisi mega orang bansa bukai nya ngamatka penemu tu. Bisi raban linguistik madahka jaku Iban nya seperugan enggau jaku Austronesia. Pansik tu mega disukungka Asmah (2008) ke madahka jaku Iban ti dikena besehari-sehari nya endang bisi kaul enggau jaku Iban. A. A. Cense enggau M. Uhlenbeck (1958) mega madahka jaku Iban nya pampang ari dialek Melayu.

Enti diperatika ari sukut etimologi, sekeda leka jaku Iban endang bisi saum empas tauka reti iya enggau jaku Melayu. Reti nya endang bisi pengamat jaku Iban nya bisi kaul genetik enggau jaku seperugan kelebih agi jaku Melayu.

Taja pia, jaku Iban mega enti dipansikka enggau dalam agi endang bisi ngembuan mayuh pampang guna jaku ti mega ngayanka peninggi basa enggau penulin budaya ti nyeliah jaku Iban nya ari enggi jaku bukai. Nya alai endang bisi beserengkang penemu enggau raban sekeda pemansik senentang pekara tu kelebih agi enggau raban bansa Iban empu ke ngembuan penemu ti madahka jaku sida tu endang terang amat bisi bebida.

Naka kediatu nadai udah bisi pansik tauka evidens ti mandangka orang ti bejaku Melayu ba pulau-pulau Melayu sekalika ba Indonesia, Semenanjung Malaysia enggau Filipina nya ulih bejaku Iban tauka nemu reti jaku Iban enti sida enda belajarka jaku nya baik nya nengah chara formal tauka begulai enggau raban bansa ba genturung pendiau ke mayuh bansa Iban. Ku Anthony Richards (1981) “Iban belongs to the ‘Malay’ group of language but is not readily intelligible to a speaker of Peninsular or Indonesia Malay ...”

Enti sema bisi leka jaku ti sama enggau jaku Melayu nya ketegal jaku Iban tu tadi endang seperugan dalam jaku Austronesia. Leka jaku nya ukai diempu jaku Melayu tauka jaku Iban tang jaku ke sama-sama dikunsi empu. Leka jaku bukai dalam jaku Melayu ti bisi dikena kemaya hari tu nya ketegal ari kaul raban bansa Iban ke udah lama nyadi ti ngujung sekeda leka jaku nya bisi diinjau sereta dikena dalam jaku Iban kelebih agi leka jaku ti nadai dalam jaku Iban. Sekeda leka jaku Melayu ti bisi dikena dalam jaku Iban kemaya hari tu nya datai ari pengurang penemu dalam jaku Iban ngujungka sida seruran agi ngena leka jaku Melayu lebuh berandau tauka nulis dalam jaku Iban. Munyi ku Gregory Nyanggau Mawar ba blog iya “Iban language definitely comes from Iban themselves. But naturally it has the influence of other languages over the ages. Thus there are similarities between Iban language with other major ethnic languages in SE Asia, especially the Malay language and other Dayak languages of Borneo.” (http://gnmawar.wordpress.com/keeping-languages-alive/)

Kelimpah ari nya mega, mayuh bendar pansik ti tau nyarutka penemu berindik ari pansik ti enda nitihka jalai jaku enggau rampa budaya Iban dikena. Sekeda pansik nya belalauka enggau pansik orang bukai ti enda amat bepelasarka pengidup raban bansa Iban tang semina pansik ti dibacha ari bup penyanding penemu ti ditulis orang senentang budaya Iban lebuh ke bisi diau enda lama di Sarawak.

Freeman (1981) madahka jaku Iban bisi nyimpan sejarah lebih lima ribu taun ke udah. Penemu tu mandangka jaku Iban nya endang ngembuan penulin lebuh iya dikena nyebut pekara ti bisi kaul enggau budaya Iban. Nya alai, kelikuh senentang etmologi semina penemu ti tau ngamatka teori aja tang iya enda ulih ngaraka atur jalai jaku enggau penuh laban penyuran ti rentang dikena merening pengelurus nya endang datai ari waris bansa Iban empu.

Nya alai dikena nyimpulka penemu senentang pekara tu, dia raban bansa Iban empu taja pan bempuka jaku Iban patut bendar ngena jaku Iban enggau chara ti engkeman sereta nemban sepemanjai maya kelebih agi lebuh ba maya formal, lebuh bejaku ba mua mayuh sereta lebuh betuliska karang dalam jaku Iban ngambika jaku Iban ti dikena nya bisi standard kediri empu lalu ukai ketegal iya sebaka enggau jaku Melayu.