Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.
"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Isnin, 10 Jun 2013

Buah Empelajau

Kala kita ninga tauka meda nama buah ke dikumbai buah empelajau? Empelajau tu sebansa utai tumbuh ke tumbuh ba babas. Bisi sekeda menua ngumbai tu buah empit. Iya mayuh bendar tumbuh ba sepemanjai tebing sungai. Empelajau tu mayuh tumbuh ba menua Indonesia, Malaysia, Papua New Guinea enggau Pulau Solomon. Nama sungai ke bisi ngangkatka nama buah empelajau tu Sungai Empelajau ke enda jauh ari pelilih menua Lubok Antu. Nama saintifik empelajau tu iya nya “Pentaspadon motleyi” ngangkatka nama siku orang English ke rindu begumpulka utai tumbuh iya nya James Motley. Nyadi iya tu kala gawa di Borneo urung taun 1850.

Pun kayu empelajau tu jelan peninggi tang iya dipeda manah lebuh bungai iya mupuk ngerembai. Nitihka pansik Motley madahka pun kayu empelajau tu ulih tumbuh datai ke peninggi 51 meter pemesai daun iya nya empat milimeter lalu pemesai buah empelajau tu 40 milimeter. Kayu empelajau ulih nyadika ramu kelebih agi nyadika geladak lalu isi kayu nya ulih nyadika minyak ubat penyakit kulit.

Buah empelajau tu betangkai lalu lebuh iya mansau iya labuh ke ai melepu ba atas ai. Nitihka sida ke selalau ngarang buah empelajau tu madahka kayu tu semina bebuah dalam kandang tiga ngagai empat taun sekali baka buah engkabang. Maya tu mih kitai ulih ngarang tauka ngumpul ke udah mansau. Kulit buah empelajau tu besabut lalu ngebab isi iya ke bechura burak. Tu ke nyaup buah tu melepu ba atas ai. Enti deka makai buah tu buai tauka kupak dulu kulit iya. Semina isi ke bechura burak aja ke tau diempa. Isi buah empelajau ulih diguring kediri aja tauka digulai enggau sayur bukai. Bisi mega orang madahka isi buah empelajau tu tau mega disumai bekuah tauka besup. Asai isi buah empelajau tu nyama sereta asai kachang. Aku enda kala enggau orang ngarang buah tu tang kala makai isi buah iya.

Posted by at
Labels:

3 ulasan:

  1. Tanpa Nama10 Jun 2013 pada 5:16 PG

    Buah empit ko kami ba Bradong.

    BalasPadam
  2. Tanpa Nama10 Jun 2013 pada 5:19 PG

    Aku bisi naya nuggal senentang asal pun Iban nemu miring ulih nuan meri rujukan tauka jerita asal orang ti ketrubah iya nemu miring ngau parengka piring?

    BalasPadam
    Balasan
    1. uchutedung24 Ogos 2013 pada 7:29 PTG

      Au, manah mega sadang penemu nuan nya. Terima kasih. Ila mih nganti aku udah nyidi sereta ngiga penyanding penemu senentang pekara tu.

      Padam

Langgan: Catat Ulasan (Atom)