Nama Kebuah Kitai Seruran Layap

NAMA IYA ‘Kawan Mas’, tang terang amat perau ekspres ba Sungai Rajang, Sarawak, puntan mai penampak ngagai bala pangan iya tauka penumpang ke nepan iya pagi Hari Dua minggu nyin kemari.

Lebuh ke mansang nganjung raban penumpang pulai ke menua laban ke deka ngintu pengerami Gawai, dia perau tu ngelanggar lumpung kayu balak ngujungka iya lalu karam.

Raban penumpang berengkah panik sereta mega histeria, terejun ke ai laban deka ngidupka diri. Ai ukai semina dalam, tang mega deras amat. Bisi iya ke bebendar merap anak mit, bisi nya nyerauh laban telepas pegai orang ke dikesayau. Bisi nya indu ke betubuh bisi lima bulan nyemberai tekapai-kapai nanjak ai.

Sungai Rajang pagi nya nerima siti agi tragedi. Sungai ti pengabis panjai ba Bumi Kenyalang nya endang baka selama gauk amat. Taja pan gauk, iya tetap terus disayau, laban ba penemu sida ke diau dia nya mih semina kereban pengangkut ke bisi disediaka dia.

Perau ekspres nya ngembuan kapasiti ke ulih mai semina 74 iku penumpang, tang pagi nya nyau lebih 200 penumpang bepadat nyendatka perau nya, balat agi ari ikan sadin dalam tin. Ulih ngundan 74, tang lebih 200 diasuh niki. Cherita baka tu suah amat didinga!

Enti kitai agi ingat, sejarah bisi mandang lalu meri bukti madahka beberapa kali udah penusah perau karam ba serata menua, nyengkaum di Semenanjung, kebuah iya ke karam nya pan sama, iya nya lebih penumpang.

Tang baka selama mega, kitai enda kala belajar ari sejarah.

Menteri Besai, Datuk Seri Najib Razak ke berasai sinu enggau tragedi Rajang nya bisi ngasuh ngasuh ngaga pansik penuh senentang perau karam nya.

Nama kebuah perau nya mai penumpang jauh lebih ari kapasiti ti dikemendarka?

Pejampatka mih mansik penusah tu, anang nganti penatai pengawa bepilih besai ila. Sapa ke salah dalam kes tu mesti diukum ngambika tragedi perau karam ulih diseliahka.

Raban penumpang nemu perau nya mai penumpang lebih ari patut, tang semua sanggup nerima risiko, laban baka ke diaku sesetengah penumpang: “Kami nadai chara bukai, tu mih siti aja kereban pengangkut kena kami pulai Gawai...”

Bisi sesetengah orang ngembuan kereban pengangkut ke mar rega, bot mar, bisi sekeda ngembuan helikopter enggau jet diri empu, dikena mindah kin kitu. Tang beribu-ribu rayat miskin semina ulih mindah nengah Sungai Rajang ngena perau ke berisiko tinggi. Nadai ku enggau...