Karang Kedut

KARANG KEDUT tu siti ari tanya ke bisi ba keretas Bahasa Iban Sijil Pelajaran Malaysia (SPM). Nyadi tuju aku ngenang pekara tu ditu laban deka bekunsi sereta bebagi penemu senentang pekara ti bisi kaul enggau karang kedut kelebih agi ngagai sida calon prebet ke bisi ngambi keretas tu sereta nadai nemu seling senentang pekarang tu.

Nama utai tauka tanya ke dikumbai karang kedut. Ba jaku Melayu iya dikumbai ringkasan tauka meringkaskan karangan lalu ba jaku English iya dikumbai summary writing. Ringkas dalam jaku Melayu mai reti enda panjai, pandak, singkat baka cherita tauka karang; pandak sereta padat ari sukut penerang enggau ti bukai. Meringkas reti iya 1. Menjadikan ringkas tauka ngasuh pandak, menjadikan kecil supaya tidak mengambil tempat (ngasuh mih ngambika enda nyekutka ruang). 2. Memendekkan, menyingkatkan baka cherita, ripot, kes pechara. Kedut dalam jaku Iban enti diterangka dalam jaku English mai reti to crease, crumple or wither; to pull to come together, lalu summarize nya reti iya ngempung, gempung, nyimpul tauka simpul.

Dalam keretas SPM Bahasa Iban, karang kedut munyi ke udah disebut tadi nya siti ari bansa tanya. Iya diengkah ba Bagi B sereta diberi 15 mark. Teks karang kedut tu ngundan 200 ngagai 250 leka jaku. Calon dipinta ngemandakka teks nya enda ngelui 100 leka jaku. Tuju pekara tu ditanya iya nya dikena nguji pengelandik nembiak meretika teks bacha sereta nemu ngedut tauka ngemandakka teks.

Nya alai reti karang kedut tu nya pengawa ngemandakka teks ngambika penyampau leka jaku mimit agi ari teks asal. Iya bisi penyelai bebanding enggau simpul penemu. Uji peratika bida entara karang kedut enggau simpul penemu. Ari sukut asil; karang kedut tu ditulis pandak ari teks asal tang ba simpul penemu, asil iya tau ditulis panjai tauka pandak.

Ari sukut isi; karang kedut semina mantaika isi pasal batang pekara ti dikerandau dalam teks tang ba simpul penemu dia isi iya tau nyeritaka pasal batang randau dalam teks enggau pekara bukai. Ambika banding baka ari sukut jaku iya tau nyeritaka pasal gaya jaku, pemesai urup enggau ti bukai.

Ba sukut penemu; karang kedut semina ngemansutka penemu ke bisi ayan dalam teks aja tang ba simpul penemu, penemu ke ditulis tau mai penemu ari luar tauka penemu diri empu. Iya mega tau ngenataika penemu ti nyata tauka besilup.

Tukuh karang kedut ulih diperatika ari dua bengkah iya nya enda belalau lalu iya ke kedua  nya belalau. Karang kedut ke enda belalau nya pengawa ke ngedutka teks ti diberi nadai belalau. Ambika banding; Kedutka teks di baruh tu enda lebih ari 120 leka jaku. Tukuh kedua nya karang kedut belalau. Reti nya iya bisi lalu ba tanya. Peratika chunto 1; Kedutka teks di baruh tu bepun ari genteran kedua. Pemanjai karang nuan enda ngelui 120 leka jaku. Peratika chunto kedua; Kedutka pasal chara nyaga pemeresi sungai dalam teks di baruh tu. Pemanjai karang nuan enda ngelui 120 leka jaku.

Enti di sekula dipelabaka raban pengajar udah madah sereta ngajar bala nembiak iya chara ngira leka jaku ngambika iya enda ngelui ari ke patut. Ni bagi jaku ti dikira seleka? Uji peratika pekara nangkanka tu. Jaku ti dikira seleka nya nyengkaum

1.       Haribulan – chunto: 8.8.2008 tauka 8 Ogos 2008

2.       Lumur – chunto: 1, ⅕, 1,555,555

3.       Pangkat tauka gelar – chunto: Yang Amat Berhormat, Tan Sri, kepala pengajar

4.       Jaku nama tetap

a.       Jaku nama tetap idup mensia baka Engkeruak anak Tepang

b.   Jaku nama tetap idup ukai mensia baka Sengkalan (nama uduk), Biring Jalak Linting (nama manuk)

5.       Sulu jaku – Dikelala buah ari langgu, dikelala bansa ari jaku

6.       Sempama – Baka tekura enggai enda mantupka diri ba bandir

Bisi teknik dikena ngedutka teks. Dipekunsika ditu teknik ngedutka teks. Tu nyengkaum teknik:

1.       muai leka jaku,

2.       ngena leka jaku ti engkeman,

3.       ngena rampa reti sereta

4.       nyambung ayat.

1.       Muai leka jaku

Peratika dua chunto di baruh tu.

Chunto A:

Pemakai kitai baka dagin, sayur enggau ti bukai enda tau enda beresi.

Saut – Pemakai kitai enda tau enda beresi.

Chunto B: Jaku pun ayat

Nya alai, pemakai ti dipakai mesti disumai.

Saut – Pemakai ti dipakai mesti disumai.

Chunto C: Jaku Tiap enggau Pengenap Tesa

Semua raban nembiak sekula benung pulai belajar maya pukul 5:00 lemai.

Saut – Nembiak sekula benung pulai belajar maya pukul 5:00 lemai.

Chunto D: Jaku Bantu Aspek – udah, benung, tengan etb,

Jaku Bantu Gaya – deka, tau ulih etb

Nembiak sekula benung pulai belajar maya pukul 5:00 lemai.

Saut – Nembiak sekula pulai belajar maya pukul 5:00 lemai.

Chunto E: Penerang

Pemakai ti dipakai mesti disumai.

Saut – Pemakai mesti disumai.

Nembiak sekula pulai belajar maya pukul 5:00 lemai.

Saut – Nembiak sekula pulai belajar.

Chunto F: Jaku Penguat – amat, nyau, endang, sigi, etb.

Amat landik iya ngajat. Saut – Landik iya ngajat.

Sigi  nemu iya beramban. Saut – Nemu iya beramban.

2.       Ngena leka jaku ti engkeman

Pemakai kitai enda tau enda  beresi. Saut – Pemakai kitai mesti beresi.

3.       Nyambung ayat

Buai jaku ti betandu lalu kena leka jaku penyambung.

Pemakai kitai mesti beresi. Pemakai kita mesti disumai.

Saut – Pemakai kitai mesti beresi lalu disumai.

4.       Ngena rampa reti

Rampa reti nya leka jaku tauka rambai jaku ti udah ngundan tauka nyerangkung mayuh reti. Peratika genteran teks tu.

Iya berunding deka nirika tiang. Udah nya, iya berunding dek nyanggitka atap. Udah iya nyanggitka atap, iya bisi langgur deka ngaga dinding. Tembu nya, iya ngelekatka pintu.

Peratika jaku pun ayat – Udah nya, Udah iya nyanggit atap, Tembu nya ...

Saut – Iya berunding deka nirika tiang. Iya berunding deka nyanggitka atap. Iya bisi langgur deka ngaga dinding. Iya ngelekatka pintu.

Peratika rambai jaku ke betandu – Iya berunding deka enggau Iya bisi langgur deka ulih diganti enggau Iya berunding deka.

Saut – Iya berunding deka nirika tiang, nyanggitka atap, ngaga dinding enggau ngelekatka pintu.

Rampa reti nirika tiang, nyanggitka atap, ngaga dinding, ngelekatka atap nya sama reti enggau nirika rumah.

Saut – Iya berunding deka nirika rumah.

Nya baka sekeda chara kitai ngedutka ayat tauka teks kelebih agi ba tanya SPM Bahasa Iban Bagi Karang Kedut. Enggau kenang nya tadi, diarapka kitai ke ngambi peresa SPM Bahasa Iban kelebih agi calon prebet ke enda sempat belajar pekara tu di sekula bisi seling mimit senentang langkah rapat dikena nyaut tanya tu. – Dibali ari Karang Kedut (power point), Pg. Peliman anak Gendang