Kemaya hari tu agi mayuh raban pengajar ke ngajar mata pelajar jaku Iban agi enda nemu kebuah litericha bisi dikena ngajar jaku Iban. Sekeda sida ngajar mata pelajar tu laban siruka jaku diri empu, laban nadai orang bukai ke sanggup ngajar. Agi mega mayuh nembiak sigi bisi ati deka belajarka jaku Iban.
Litericha nya siti ari elemen ke bisi diajar dalam mata pelajar jaku Iban. Iya ukai dikumbai komponen baka litericha ke bisi diajar dalam mata pelajar jaku Melayu enggau English. Elemen ditu reti iya rampa pelajar nya mimit agi enti dibanding enggau komponen ke dikumbai sida komsas tauka kompenan sastera. Kebuah litericha dalam mata pelajar jaku Iban dikumbai elemen laban diperatika ari sukut awak ke dikena ngajar mata pelajar tu enti dibanding enggau mata pelajar jaku Melayu enggau English. Nya alai sekeda pengajar ke bebansa Iban enggau pengajar mata pelajar jaku Iban bisi saru penemu senentang pekara tu. Sida enggai ngajar mata pelajar jaku Iban laban irauka diri enda apal enggau budaya sereta litericha Iban kelebih agi raban pengajar rebak baru.
Tang enti litericha Iban semina diajar ari sukut elemen nadai kebuah raban pengajar ke ngajar jaku Iban berasai nangi deka ngajar mata pelajar tu enti sida endang bisi peneleba ngajar sereta bisi seling senentang jaku Iban. Tuju buah kenang sekali tu deka ngusaika pekara ti bekaul enggau ngajar sereta belajar jaku Iban ngena elemen litericha Iban. Tuju bekunsi penemu ditu ngambika pekara tu terang ba raban pengajar jaku Iban. Munyi ku sarjana dalam jaku English madahka literature as a tool for language learning.
Litericha dalam mata pelajar jaku Iban
Guna litericha ba kelas endang nyata bisi kebuah. Iya tu siti ari langkah rapat tradisional dikena ngajar jaku. Dalam jaku English, litericha tu endang sebagi ari langkah rapat tradisional dikena ngajar sereta belajarka jaku English. Tang litericha bisi ngasaika kurang dikena laban pengawa belajar enggau ngajar balat agi ngemeratka guna jaku tauka baka ni jaku nya dikena.
Dalam mata pelajar jaku Iban, litericha endang dikira chukup beguna ketegal iya ngembuan sereta ulih nyediaka mayuh macham teks literari ke bisi mantai mayuh bengkah input linguistik, ransang tauka stimuli ti semitan dikena nembiak mansutka penemu diri sereta mega nyadika pun peransang dikena belajar.
Nama pekara ti dikumbai litericha?
John McRae (1994) kala midaka entara litericha ti bepun enggau urup besai L – teks klasik baka Shakespeare, Dickens – enggau litericha ke bepun enggau urup mit l, baka cherita fiksyen ke pegari , fables enggau leka main baka leka lagu. Dalam mata pelajar jaku Iban, teks litericha tu nyengkaum mayuh macham leka main, jerita rayat, ensera enggau jerpan moden.
Teks litericha ulih dipelajar nengah teks tulin tauka iya ti udah dibali sereta dikemudahka setipak enggau pengulih tikas nembiak. Dibali ditu mega nyengkaum ari sukut sepil sereta jaku enggau jalai jaku ti dikena. Munyi ke udah disebut tadi tu sekeda chunto teks litericha ti ulih dipelajar maya dalam tauka ba luar kelas:
1 Jerita pandak
2 Leka main
3 Novel
4 Drama tauka cherita kelulu
Nama kebuah ngena litericha ba kelas?
Teks litericha nyediaka mayuh macham peluang dikena nembiak ngasaika peneleba lalu iya ulih napi mayuh macham gaya tauka stail belajar. Teks ulih disediaka nengah teks audio, CD musik, klip filem, podcast. Semua tu ulih nambahka input penemu nembiak.
Kelimpah ari nya, teks litericha tu kaya enggau input linguistik. Iya ulih mantu nembiak belatih ngena empat pengelandik, iya nya – pengelandik mending, bejaku, macha enggau nulis sereta ditambah enggau jalai jaku sereta leka jaku ke baru dipelajar.
Nambahka nya mega, litericha ulih nyaup nembiak ngemansangka pemereti ati diri senentang budaya, pekara ke tau midaka pengidup sereta narak sida enggau ulah ke bebasaka sereta ulih nerima penemu enggau ulah orang bukai. Seraya enggau nya mega teks liericha ulih mantaika tema ti universal baka tema ti bekaul enggau pengasih, laya sereta ke bukai.
Literary texts are representational rather than referential (McRae, 1994). Jaku referential semina dikena ba siti tikas aja sereta suah agi ba ringkat ke dikena meri penerang aja. Jaku representational ari teks litericha nya minta nembiak empu ngasai kediri geragayak sereta emosyen sida kelimpah ari sukut kognitif. Kereban litericha tu meransang nembiak nguna runding tauka imaginasyen, nambahka pengasih tauka empati sida ngagai orang bukai lalu ulih ngiring ngembing sida nengkebang mayuh macham pekara. Tu mega meri peluang ngagai nembiak belajarka mayuh macham kereban litericha ke bisi ba sesebengkah genre.
Kepenudi bendar, litericha ulih dikena pengajar mantaika ngagai mensia mayuh pasal pengawa nembiak sida. Pengawa pemandang bantai tu baka mandangka poster ti digaga nembiak pasal leka main, cherita tauka nengah drama ti dikeluluka sida ba panggau. Nya alai ketegal mayuh macham kebuah linguistik, budaya enggau pemansang diri, teks litericha ulih dikena ngeringka semengat raban bala nembiak ba kelas.
Nama pekara ti nanggul lebuh ngena litericha ba kelas?
teks litericha ulih mai penanggul ngagai raban pengajar enggau nembiak. Tu nyengkaum:
• Milih teks – teks ti dipilih patut ke relevan, engkeman sereta ngerinduka ati nembiak.
tikas linguistik - teks mega patut setipak enggau tikas pengulih nembiak.
• Pemanjai – teks ti pandak nyangka mudah agi dikena maya ba kelas laban awak ke serekat, tang teks ti panjai ngembuan mayuh agi jurai kontekstual, enggau pemansang watak sereta plot.
• Pengemar ari sukut budaya - teks enda patut kelalu mar diperetika kelebih agi ari sukut budaya sereta iya ke mayuh jaku besilup laban enti pia, iya tau muntanka pengerindu nembiak ke macha.
• Penemban budaya – nembiak mega patut enda nyima lebuh macha isi teks. Reti nya teks nya nadai ngembuan pekara ti sensitif ngagai nembiak.
Duff and Maley (2007) nyemetak bendar madahka pengajar ulih napi penanggul dalam teks litericha enti sida nanyaka diri sekeda tanya baka ke ba baruh tu, dikena sida nentuka teks nya engkeman dikena ba raban nembiak sida:
• Katika pekara ti ba teks nya ngerinduka ati raban pemacha?
• Katika tikas pengemar jaku tu nemban ba nembiak?
• Katika pemanjai teks tu setipak enggau awak ke bisi?
• Katika teks tu begunaka penemu latar ba budaya tauka ltitericha?
• Katika teks tu bisi ngundan pekara ti negatif ari sukut budaya?
• Katika teks tu ulih dikena ngajarka jaku?
Baka ni teks litericha ulih dikena?
Pengajar ulih ngena teks litericha ba kelas nengah mayuh macham chara. Pengawa ba kelas tau mungkur pengawa sebedau macha teks, pengawa interaktif sereta pengawa ti sepengudah macha.
Pulverness (2003) bisi meri sekeda jaku lalau lebuh ngajar pekara tu: Beri sukung ti chukup maya sebedau macha.
Pengajar ulih mungkalka pelajar ngena chara mantaika topik tauka tema teks nya, ajar sekeda leka jaku baru lalu asuh sida nembiak nyangka pekara ti deka nyadi dalam teks ti deka dibacha sida laban tu ulih ngarit ati sida.
• Kurangka maya pengajar ngajar nembiak maya sida macha.
• Peratika stail jaku ke nyelai.
• Saup nembiak nemu pemesai reti penulis ngena sekeda leka jaku.
• Sediaka langkar kereja dikena ngulihka respons ti kreatif ari nembiak.
• Minta nembiak ngasai diri nyadi penulis, tauka ngasuh sida nyeritaka baru, nampungka teks tauka nambahka teks.
Penyanding Penemu
Duff, A & Maley, A (2007) Literature (Resource Books for Teachers), Oxford University Press.
Maley, A (2001) ‘Literature in the language classroom' in The Cambridge Guide to Teaching ESOL, Cambridge University Press.
McRae, J (1994) Literature with a small 'l', Macmillan Education.
Pulverness, A ( 2003) ‘Literature' in English Teaching Professional, October, Issue 29, Modern English Publishing
Tiada ulasan:
Catat Ulasan