Belajar Nyadi Tuai Bemalinka Chara Mandela

PANYUN JAKU

Lebuh ngenangka Nelson Mandela nadai enda orang ngelala iya. Ukai tebilang tampak rita ketegal nyadi penyanyi popular tauka menang siti ari main di dunya tang ketegal iya kala nyadi tuai Afrika Selatan ke ngelepaska orang bansa kulit chelum ari terus dipegai sereta diperinsaka perintah orang putih. Empai lama ti udah, Mandela baka mensia selama udah lesi dibai hari, udah nadai nyenggai lemai. Pemarai iya chukup bendar ninggalka sejarah ukai ngagai sida peranak menua Afrika Selatan tang mega ba serata dunya tu.  

Pemerani, pengeliat ati sereta pengering semengat Nelson Mandela tu patut bendar nyadika teladan, nyadika chuan kitai ke bisi ati deka nyadi tuai baik nya ba perintah, ijensi perintah, gerempung ukai kuasa perintah, gerempung parti politik tauka kompeni.

Mayuh bendar utai udah disebut senentang Mandela sereta endang iya mayuh bendar pekara ti ulih dipelajar ari pengidup iya. Tang kitai selalu kelupaka pengidup lebuh iya agi biak, lebuh umur dalam 20an sebedau iya ngangkatka diri 2 taun udah nya.

Maya ke agi biak, baka orang bukai mega munyi kenu ku orang, darah agi puda, agi ransing seruran besedia deka belaban barang maya datai ngagai iya ke dikumbai orang penyelawai tauka terrorist. Lebuh orang nanya iya baka ni pengidup ba rumah pasung udah ngubah pendiau enggau pengidup iya, Mandela nyaut enggau mudah madahka iya pansut nyadi orang ke udah tuai runding.

Baka nya mega kitai ke bisi ati deka nyadi tuai tauka iya ke udah nyadi tuai tentu bisi maya kitai mega dikena meri komen ke sama baka ke udah disebut Mandela nya tadi. Enti kitai meratika gerempung ke alai kitai gawa tentu kitai bisi mega meda orang ke baka Mandela lebuh iya agi biak. Seruran sida dipeda ulih ngereja pengawa, ransing sereta regas lalu ulih ngenataika pemujur ngagai palan alai iya gawa. Tang ari pengeransing sereta pengeregas nya bisi mih tepansut jaku ke kasar, agresif, enggai badu merintah sereta minta sereta kadang-kadang nya bisi mandangka penyumbung.

Tang nasit manah mimit, tauka enda, orang ke bisi pengelandik baka nya enda ibuh nganti 27 taun baka Mandela alai iya belajar sereta nemu chara ti betul. Nya alai, jaku tuai bisi nyebut, ‘Idup tu kelalu pandak alai kitai belajarka mayuh macham pekara ari penyalah ke digaga kitai.’ Eleanor Roosevelt kala nyebut, ‘Belajar ari penyalah orang bukai. Nuan enda idup panjai dikena nuan nemu kediri empu.’

Nya alai ditu sama kitai bekunsika penteba Mandela ti ulih nyadi lalau sereta tenggau kitai lebuh nyadi tuai. Ngagai raban pemacha ke rajin macha tau macha ari bup ti ditulis Richard Stengel, Fifteen Lessons on Life, Love and Courage tauka autobiografi ditulis Mandela engga Stengel, Long Walk To Freedom. Ari dua iti bup tu, tiga pekara ke ulih dikunsi enggau kitai sebuat senentang chara nyadi tuai ke tau nyadika lalau kitai empu tauka lebuh ke mentor sida ke rebak baru.

1.       NGULU ARI MUA ENGGAU ARI BELAKANG

Mayuh ari sida nyadi tuai ke agi biak umur sigi ransing deka megai sereta dipeda nyadi tuai. Nyadi pengulu tauka tuai nya endang datai kediri kelebih agi ba sida ke endang ransing deka nyadi tuai. Tang belajar nyadi tuai ari jauh nya siti pengawa ke ukai mudah ngagai raban tu. Iya baka ke ngasuh nembiak ke hyperactive duduk jenuh lebuh meda bala pangan iya bemain.

Mandela kala nyerita madahka, “Enti nuan deka ngasuh seraban chapi nya nguing ke siti-siti endur, nuan patut bediri ba belakang sereta megai sebatang kayu. Udah nya nuan ngiga chapi ke pandai agi, ngasuh chapi tu di mua ari sida bukai lalu ngulu iya ke bukai nitihka pengeka nuan.”

“Chapi ke bukai nya lalu nitih chapi ke pandai nya, tang nuan empu semina nyadika malin raban chapi nya ari belakang.” Tu mih chara ke patut digaga tuai.

Dalam gerempung alai kitai ke nyadi tuai mega baka nya. Kitai patut enda sanggu mentor sida ke agi biak ngasuh sida ngulu raban naka ke dekaka kitai ke nyadi tuai. Kitai mega patut ngelatih sida pekara ke sama lebuh sida udah nyadi tuai jemah ila.

2.       NGEMBUAN PUGU PRINSIP

Mandela beridup ngena siti pugu prinsip, iya nya; Hak ti setimbang ke semua enda milih bansa, kelas tauka penempa. Prinsip nya nitihka iya mega patut disempulang enggau taktik. Maya ke agi biak Mandela balat belalau ba prinsip nya tang ukai taktik. Tang rumah pasung udah ngubah chara iya berunding. Rumah pasung meri iya awak ngetu, berunding sereta belematika taktik gerila ke dikena iya maya nya enda ulih mujur ba Afrika Selatan.

Lebuh umur nyau majak tuai, Mandela agi bepegai ba prinsip iya, nya demokrasi ke ukai beripih bansa orang putih tauka orang kulit chelum ke Afrika Selatan. Prinsip ti sama tang udah nukar taktik iya. Ari tuai kayau ke matak raban ngagai pengelepas Mandela berubah nyadi tuai ke ulih dibai berunding, mending, nukar, nyaruk sereta ngaluska strategi dikena ngulihka juluk ati iya. Iya enggau ati ti liat bejalai nengah padang pasir  sebedau datai ba tanah semaya.

Ba kitai ke nyadi tuai, nama dih ke nyadi pugu prinsip kitai? Nama tanah semaya  ke nyadika juluk ati kitai ngelama tu? Tu mih ke nyadi pugu tanya lebuh kitai berandau enggau sida ke rebak baru. Suah agi sida ke biak tu ngembuan chara sida empu lebuh nyadi tuai. Sida mudah tepejuh ngereja pengawa nitihka ati diri empu lalu jarang deka nerima penemu orang bukai.

3.       BADU NYA SITI ARI CHARA NYADI TUAI

Mandela lebuh ke dipilih nyadi presiden orang kulit chelum keterubah di Afrika Selatan ulih enti deka majak nyadi presiden seumur idup iya. Tang iya nemu tikas sereta tanggung pengawa diri, munyi ku Cyril Ramphosa ‘ngaturka pejalai ukai ngemudika kapal (to set the course, not steer the ship)’. Mandela enggau basa ti baruh madahka diri deka badu nyadi presiden lebuh iya ba taun kedua iya merintah. Umur iya deka manggai 80 taun enti iya majak enggau ba pengawa bepilih ti nangkanka nya. Munyi ku iya, ‘Orang tuai enda patut nyaruk diri dalam pengawa politik’. Ari pemutus penemu iya nya mandangka iya ngembuan juluk ati ti tampak iya ukai deka ngulihka kuasa tauka dengah ke diri empu.

Mandela nemu maya ke patut matak raban iya baikka nya ari mua, belakang tauka ari jauh. Mayuh presiden ba menua Afrika betunggang lumpung ngulihka kuasa tang lebuh udah ba tampuk kuasa nyau enggau badu-badu. Sida tu dipejal badu kekadang nya nyau ngena senyata. Tang Mandelal enda baka nya.

Kitai mega patut beteladanka Mandela lebuh kitai nyadi tuai. Anang nganti kitai parai baru orang nganti kitai. Iban sigi bisi jaku tuai ke munyi tu; baka tubu nyurungka rebung, baka paku nyurungka gelung; bisi orang nampung pengawa.

SIMPUL JAKU

Mayuh pekara ulih dipelajar ari pengidup Mandela. Utai ke udah dikenang ditu ulih diperatika ari ubah ba ulah, langkah rapat tauka ubah paradigm lebuh kitai nyadi tuai. Anang mudah irauka diri midang. Realiti ari Mandela nya, iya dipeda tuai agi runding tang ukai madahka iya enda ransing agi ngulihka juluk ati iya. Iya enda mudah muras, begedi sereta bedendam. Iya agi ngembuan juluk ati ti sama tang uji dijapai nengah langkah rapat enggau ulah ti bebida tang semitan.