Empas ari bekenaka komputer besehari-sehari

Teknologi baka komputer udah nyadi sebagi ari pengidup nembiak rebak baru besehari-sehari kemaya hari tu. Taja pia nembiak patut nguna kereban tu enggau penuh tanggung pengawa laban iya ulih meri empas negatif jemah ila enti ulah sida nya enda dijaga.

Teknologi kemaya hari tu majak mansang enggau regas lalu baka nya mega nembiak rebak baru. Enti dulu suba, bala nembiak rindu agi bemain main tradisional baka bemain guli, pangka enggau nyabung daun paku kubuk tang diatu nembiak rebak baru udu agi ngapuska hari sida bechulikka telefon pintar enggau bemain komputer nyentukka bisi leka jaku anti sosial dilabel ngagai sida.

Taja pan baka nya, ukai nya isu ti deka dipejuraika ditu. Kitai udah suah bendar dibantaika enggau penanggul anti sosial. Utai ti nyadi bepungkal ari penanggul ngujungka empas negatif iya mai penanggul pengerai. Tu ke meri impak negatif ngagai pengidup nembiak redak jemah ila. Ngabiska awak besehari-sehari nunga kereban sofistikated tu dipeda badas tang iya mega tau ngeruga pengerai ari sukut mental enggau fizikal nembiak nya empu.

Komputer, televisyen, kereban sofistikated ti nguna skrin ngasuh nembiak gian lalu semina muai awak enti enda dijaga. Pekara tu ngasuh nembiak kurang amai begaul tang rindu agi ‘bekepit’ enggau kereban ti sofistikated. Pekara ti tau narit ati ba Internet sereta rekai kaul ari jauh ba laman sosial mega nyadi pugu elemen ti ngasuh faktor nembiak balat agi ngelawa Internet ninting hari.

Enti kitai mulaika pengingat 10 taun suba, enda mayuh raban nembiak redak ke ngabiska awak sida ba Internet. Enti sema deka besosial pan, sida rindu agi betunga mua enggau pangan diri ari ke berandau sereta bekungsi cherita ba laman sosial. Kemaya hari tu, mayuh nembiak ke berumur ari 12 taun ke atas udah bisi ngembuan kereban sofistikated kediri empu. Ba penemu aku umur ti agi biak baka nya udah balat muaika jam enggau teknologi. Enda alit ati enti bisi penanggul pengerai ari sukut fizikal enggau mental mayuh nyadi jemah ila.

Nitihka pansik ti dipejalaika ‘Norton Online Living Report’ (NOLR) di Malaysia dalam taun 2011, madahka nembiak ngabiska awak sida 16 jam seminggu ngelawa Internet. Tu penyampau ti tinggi enti dibanding enggau dulu suba ke alai Internet baru aja ditemu bisi dikena aba dunya. Laman sosial baka Facebook enggau Twitter nya ti pengabis mayuh dilawa bala nembiak.

Enti diperatika ari pansik nya ba penemu aku laman sosial udah nyadi sebagi ari pengidup besehari-sehari raban nembiak laban iya mudah diakses sereta ngundan mayuh macham penerang; kiraka udah nyadi budaya sida bemain enggau komputer sereta bekenaka Internet. Tang, katika iya bisi mai pengelebih enti dibanding enggau pengurang? Enti kitai seruran nunga skrin komputer bejam-jam lama sehari-hari, iya ulih ngasuh tubuh kitai jampat lelak. Ukai semina nya aja, nyau deka 70 persin nembiak kemaya hari tu ngidap penyakit ba pegu enggau belakang ketegal ti kelalu lama duduk nunga komputer.

Nitihka Perunding Beputung Ortopedik Pusat Perubat Taman Desa, Dr Ling How Tieng, madahka ba dalam beberapa kes, pun penatai pedis pegu nyangka bedau ditemu tang bisi faktor ti ngasuh risiko penanggul tu nyadi.

Penanggul baka pedis pegu bepun ari bingkul isi ke terit ketegal kereja ti enda bebadu digaga seraya nunga komputer sepemanjai hari. Kurang aktiviti besenam sereta penuduk tubuh ti enda betul nya pugu faktor ke ngasuh penanggul tu nyadi.

Duduk statik nadai engkebut ngasuh pekara tu balat agi. Eksekutif ke agi biak ti gawa bemalinka komputer mega napi kadar risiko ti tinggi agi lebuh napi penanggul ke bansa tu. Udah mega kereja mayuh ditembu ba opis, ditambah enggau jam ke diguna dikena neriba kerita tauka bekenaka kereban pengangkut rama baka bas sereta keritapi transit lempung. Iya balat agi nya awak ke agi bisi nya ditembuka enggau aktiviti meda televisyen seraya ke duduk nyandar ba sofa.

Nitihka pansik baru, duduk nunga skrin komputer sepengelama lima jam sehari ulih ngasuh orang nya diau imun sereta ngidap sakit ‘insomnia’. Nitihka penemu Dr Tetsuya Nakazawa ari Universiti Chiba, Jepun, madahka nembiak ke gian bekenaka komputer aruh iya enda ngabiska awak sida lebih ari lima jam dalam sehari. Enti sida nunga komputer lebih ari taka lima jam nya, dia mayuh utai tau nyadi baka penanggul pusin tinduk sereta mega mental. Ukai semina nya aja, pemaiulah ti baka nya lalu ngujungka iya enggau begulai enggau orang bukai baka sida ke sama gawa enggau sida ba opis tauka kaban belayan.

Eksekutif ke agi biak umur balat bendar ngabiska awak sida ba komputer lebuh sida ba opis. Sida tu tau kena sindrom diau diri laban irauka pengawa enda tembu. Sida jarang ngetu belelak tang tembu tu fokus ngagai pengawa ke deka nembuka kereja. Tu ukai semina mai penanggul fizikal tang mega mental. Ulah ti baka tu ulih nambahka kadar diau diri lalu nagang individu ari kegaul chara sosial enggau chukup.

Ukai semina nya aja, nembiak ke baru aja ngangkatka diri berumur 13 taun ke atas deka napi penanggul mental lalu ‘takut’ enggau diri empu. Ba penemu sida, lantang agi enti awak ke bisi nya ditembuka enggau berandau enggau pangan diri ba dunya siber. Ari sukut realiti, dalam timpuh ti panjai sida deka ngasaika diri kurang pengarap diri sereta enda arapka diri empu. Empas ke balat nya sida enda nemu begaul enggau mensia mayuh sereta rindu agi kediri sambil ngelawa Internet.

Balat agi enti aktiviti enda dijaga enggau menuku lalu semina ‘ngenahka’ pala diri empu aja. Iya ukai semina meri empas ngagai fizikal tang mega mental. Pekara ti pengabis patut digaga, ngetu enggau lengkas sereta netapka taka bekenaka komputer. Anang nesal enti tubuh nyau majak bungkuk lalu maya nya kitai digela anti sosial laban enggai nanam inisiatif deka berubah.

Enti sigi udah gian, uji sekali tu netapka taka bemain komputer. Ambika banding, enti udah masai bemain lebih ari enam jam, uji tetapka ngaga satu jam aja sehari. Nyangka iya asai ke sekejap tang enti udah teleba nyangka makin mudah alai kitai ngemeranka pengawa nya. Anang enda ingat empas dalam timpuh ti panjai balat agi nganu.

Enti maya benung duduk, seliahka diri ari nunga skrin kelalu semak. Sekali dua besenam dikena ngurangka pemedis urat. Udah nya, tentuka bisi awak keluar enggau orang ke sama enggau ba opis ari ke nembuka jam nunga komputer aja. Tubuh mensia patut mindah kin kitu sereta besenam. Nya alai anang sekali-kali duduk nadai ngaga utai.

Ba raban nembiak ke rindu besosial di Internet, iya nyangka dipeda ngerinduka ati tang pechaya mih dalam timpuh ke panjai iya ukai utai ke mai penyamai. Kitai suah agi ngasai deka diau kediri baka bunsu bubut sereta tusah deka nampil orang sereta pengidup realiti enti majak dilakka baka nya aja. Kena mih awak sekejap tauka maya malam hari berandau enggau bala tawing ba dunya siber. Maya lemai ungkupka awak alai besenam lalu anang enda ingat bekomunikasyen enggau bala tawing.