Empas Halo

KALA tauka enda kitai napi fenomena lebuh kitai enda rinduka sesebengkah pekara ti bisi ba orang bukai nya, nambahka nya kitai mega enda rinduka pekara bukai ke bisi ba iya? Tauka, lebuh ari pun kitai udah enda rindu enggau orang nya, sampai dudi hari pan kitai sigi enda rindu ke iya?

Tauka, maya kitai ngisi pom nisih prestasi kereja orang ari baruh kitai, enti ungkup penerang keterubah nya kitai meri mark B. Udah nya mayuh agi penerang bukai ti baka nya pan diberi kitai mark B mega?

Pakar psikologi bisi bepikir dikena nentuka sekeda bansa penyilap bepikir ti betukuh ari pengelabuh ulah mensia. Penyilap bepikir bansa tu digaga semua orang, enda ngira iya nya nyadi tuai tauka siku ari orang tukang narit becha. Penyilap ti digaga tang enda ditemu kitai reti nya penyilap ti nyadi ukai ketegal kitai senaja deka ngaga penyilap nya. Penyilap bansa tu bepun ari pengelemi mensia nya empu kelebih agi lebuh kitai ngaga persepsyen.

Siti ari penyilap persepsyen ti selalu digaga kitai dikumbai orang ngena istilah 'empas halo'. Leka jaku halo nya nama penampak ti terang ke suah dilukis ba atas pala gambar-gambar raban wali tauka orang sante Kristian.

Kala kitai ninga orang madah munyi tu;

* ''Nembiak nya pandai amat. Iya tentu bagas belajar. Ba universiti pan iya ila deka nyadi mahasiswa lati.''

* ''Nembiak nya seruran pas dalam jaku Iban di sekula. Iya tentu bagas belajar. Ba peresa perintah pan iya ila deka nyadi pas enggau lati.''

* ''Iya bagas datai kereja tumu. Udah tentu iya nya pengereja pengawa ti manah.

* ''Iya tuai pengarap ti imun. Budi basa iya nadai alai mantah. Enda patut iya deka ngereja pengawa makai suap. Orang dalam parti iya mega enda makai suap.''

* ''Iya pas ba ijazah ekonomi enggau lati. Tentu iya deka nyadi siku ari raban ekonomi ti badas. Udah nya iya deka nyadi menteri ekonomi enggau menteri besai ti manah.''

Jaku baka ke disebut di atas ngayanka kitai berengkah ngaga siti tisih positif ngagai sesebengkah pekara. Nangkanka nya, kitai seruran meri tisih bukai positif ngagai pekara nya. Ambika banding, lebuh kitai udah ngaga siti tisih positif ngagai siku orang, tentu kitai mega deka suah agi meri tisih bukai ti positif mega ngagai orang nya.

Ambika banding, ba ayat (a) Nembiak nya pandai ngayanka tisih ti positif Bagas belajar nya tisih ti positif. Mahasiswa lati amega siti tisih positif mega.

Runding ti baka tu ngundan penyilap empas halo. Ba pekara tu, penyilap kitai iya nya, ba dalam dunya ke amat, nembiak tu pandai tang enda mesti iya bagas belajar, lalu nembiak ke bagas belajar bedau tentu pandai. Indah nembiak ke pandai maya agi di sekula bedau tentu temu iya ulih nyadi mahasiswa lati maya iya di universiti.

Tauka kala tauka enda kitai madah: ''Nembiak nya enda tentu pandai dalam kelas. Kada enda kelalah belajar iya nya. Enti udah besai dini iya ulih nyadi orang ke mujur dalam pengidup''?

Baka nya mega aku suah ninga bala pengajar madahka nembiak iya pandai ba pelajar jaku Iban maya peresa sekula. Sida tu suah madah nembiak sida iya sigi gerenti bulih A ba peresa perintah, enda patut enda bulih A.

Aba dunya ke amat, nembiak ke enda tentu pandai enda mesti iya kelalah tauka buruk belajar. Mayuh nembiak ke enda bulih mark tinggi iya ke bendar sida tu bagas belajar.

Mayuh nembiak enda tentu pandai maya sida agi ba sekula tang udah nya tau tak nyadi orang ke mujur amat dalam pengidup. Baka nya mega mayuh ari sida ke lati dalam pelajar sida maya ba sekula tang ujung-ujung nyadi orang ''selama tauka biasa aja'' pengulih sida lebuh udah ngangkat diri bujang.

Fenomena empas halo madahka, lebuh sekali kitai udah ngembuan persepsyen positif ngagai orang bukai, nama-nama pan pengawa ti digaga orang nya, tentu kitai suah nisih iya chara positif mega, nyengkaum pekara-pekara ti enda ditemu kitai senentang iya.

Ambika chunto, kitai suah ngaga penyilap empas halo lebuh kitai madahka munyi tu sentang orang nya ''Iya siku pengereja pengawa ti rurus ati,'' nya alai kitai tentu berani mega madah ''Iya tu  tentu siku laki ti rurus ati mega,'' tang ke bendar kitai nyangka enda nemu ulah iya ke amat lebuh iya udah nyadi laki orang.

Empas halo ukai semina nyadi ba pekara positif aja. Iya mega nyadi ba sukut negatif. Tu nyadi lebuh kitai sekali agi udah bisi ngembuan anggap negatif senentang siku-siku orang. Enggau nya, kitai seruran ngaga anggap negatif ngagai semua utai ti digaga orang nya. Indah ari pekara nya, ari orang nya ke enda ditemu kitai pan kitai deka nisih iya nengah chara negatif. Ambika chunto, lebuh kitai madah, ''Iya jelungan nyadi tuai ba ruang bilik iya.'' kitai mega berani nyebut ''di opis pan iya enda ulih nyadi tuai''. Tauka kitai madah munyi tu: ''nguring asi pan enda nemu,'' lalu udah nya kitai pan berani madah ''katika iya ulih muka  restoran.''

Fenomena empas halo ulih mai pangka tauka implikasyen ti serius ngagai orang ke dipersepsyenka kitai. Ambika chunto, lebuh siku tuai ngaga tisih ti positif amat senentang sesebengkah pekara bekaul enggau orang ari baruh iya, dia iya seruran nisih pekara bukai senentang orang nya enggau chara positif mega. Baka nya mega enti dikalih ngagai negatif.

Ambika banding, lebuh siku tuai nya nganggap kerani iya siku ke landik ngaga pengawa kerani, dia iya mega suah nganggap kerani iya nya tadi landik mega ngereja pengawa tuai kerani. Asil iya lebuh bisi pengawa puang nyadi tuai kerani, dia tuai ofis tu tadi lalu nikika pangkat kerani nya nyadi tuai kerani. Tang ari sukut realiti pengawa nyadi tuai kerani bisi bebida enggau pengawa kerani. Nya alai bedau tentu temu kerani ti landik ngereja pengawa kerani mega landik ngaga pengawa kerani kanan tauka tuai kerani. Baka nya megai enti dikalihka.

Empas halo ngasuh tisih ti digaga kitai ngagai mayuh macham aspek senentang siku-siku orang nya endang bisi kaul ti sama tinggi tauka sama baruh.  Ambika chunto, lebuh kitai nisih siku-siku  orang nya manah aba budi basa, dia kitai mega nisih orang nya badas ba sukut ulah iya, budi, nilai iya, pemai ulah, disiplin diri enggau mayuh agi ke bukai.

Tisih ti baka tu suah amai salah. Ambika banding, orang ke manah amat budi basa sereta kemerah enggau orang bedau tentu amat iya manah lebuh ditisih ari sukut bukai. Fenomena empas ti keterubah iya nya pun ngagai sebansa agi penyilap persepsyen ti seruan ditapi kitai. Lebuh kitai ari pun udah berengkah rindu tauka begedika orang nya dia kitai seruran rindu tauka begedika orang nya belama-lama. Fenomena empas keterubah tu mega bisi mai empas ti serius ngagai orang ti kitai tisih. Nama orang nya udah dichap kitai manah tauka jai lalu selama jaga mih kitai ngumbai iya manah tauka jai.

Baka nya mega enggau fenomena empas halo ba palan kerja. Fenomena tu ulih ngasuh  kitai ngaga tisih ti enda rentang amat ba orang ke ari baruh kitai. Taja pan pengawa nisih prestasi orang ari baruh endang siti ari pengawa berat raban pengatur pengawa tang suah agi lebuh kitai nisih siku-siku orang, kitai enda nisih prestasi iya bepelasarka prestasi iya aja. Tang kitai nisih orang nya bepelasarka empas keterubah ti ditapi kitai maya kitai terubah bekelala enggau iya.

Suah bendar prestasi siku-siku orang nya ke bendar udah mansang manah tang pemansang iya enda dipeda tuai iya ketegal tuai iya nya agi bepegai ba tisih ti keterubah ke bepelasarka empas  terubah maya iya berengkah bekereja. Penyilap empas keterubah mega ulih bekalih, ke alai siku-siku tuai nya ngaga tisih positif bepelasarka empas keterubah iya. Taja pan prestasi pengereja pengawa nya udah berengkah nurun tang tuai iya nadai meda penurun pengawa nya. Fenomena empas keterubah ukai reti iya ulih dipeda enggau terang. Pansik ti digaga Dougherty enggau bala raban iya madahka mayuh bengkah penyilap empas keterubah ke mit bendar diperatika. Pansik sida madahka lebuh tukang interbiu nya meri tisih ti tinggi ngagai chalon-chalon maya sida baru nisih pom peminta lalu asil uji sida, raban tukang interbiu diperatika bisi nerima chalon-chalon nya enggau positif agi.

Analisis pita video ti ngerikodka interbiu ngayanka chalon-chalon ti mujur ngaga empas keterubah ti positif ba mata tukang interbiu diterima enggau positif agi sepemanjai maya sida diinterbiu.

Nya alai enti kitai nyadi tuai ruang bilik, tuai rumah panjai, tuai kontrektor, tuai ba opis, pengajar tauka pemeresa keretas peresa dia kitai patut enda ngaga penyilap sereta enda mudah tekuing runding enggau empas halo lebuh kitai nisih pengawa orang ke ari baruh tauka dijaga kitai. Anang mudah amat deka ngechap orang nya manah belama tauka enti iya udah jai nadai jalai iya tau nyadi manah. Orang ke ngena tupi beludu ninting hari pan bedau tentu temu iya nya imun sereta alim lalu baka nya nya mega nembiak ke bulih A belama ba keretas peresa jaku Iban di sekula mega bedau tentu bulih A maya peresa perintah.