Tanggung pengawa ruang bilik nagang pengawa salah nembiak redak

KEMAYA HARI TU, kitai suah bendar tekanyat ninga mayuh macham berita bekaul enggau jenayah. Tu tau ngujungka mayuh orang nangi nama agi enti penyalah nya bisi kaul kes penyalah juvana. Statistik dalam taun 2013 madahka bisi 7,816 kes juvana diripot lalu 1,632 ari kes nya bisi kaul enggau nembiak sekula. Penyampau statistik kes jenayah juvana ti majak niki nya ngayanka penanggul sosial tu majak nyadi-senyadi ba raban nembiak di menua kitai tu.

Entara kes jenayah nya nyengkaum kes bunuh, bepakaika dadah, majau indu, nyerungkai rumah, belumba enda beradat ba jalai raya ngena motosikal, samun, ngeruntun beg sereta enggau jenayah ti bisi kaul enggau dunya siber. Penyampau kes jenayah nembiak majak mayuh-semayuh ninting hari. Tu mih ti ngirauka ati bala sekeda ari kitai, baka perintah, NGO, sekula enggau apai indai. Nya kebuah kitai patut meratika pekara ti nyadi tu siti pekara ti serius. Kebuah pia, laban nembiak redak kemaya hari tu mudah bendar tepawah enggau nilai negatif ti dianggap sida sebengkah pekara normal ke ulih dikerejaka sida.

Iya ti bendar, pekara tu betukuh devian lalu salah ari sukut undang-undang. Pun kebuah penanggul sosial nembiak redak tu nyadi patut ditemuka dulu sebedau raban ti betanggung pengawa nya bejalaika inisiatif dikena nagang sida ari terus teparit ngereja pengawa ti salah.

Siti ari kebuah pekara tu nyadi bepun ari polisi transform perintah ngagai menua ke bepaksika penerang sereta pengawa ti bekenaka Internet enggau enda betagang. Pemansang  teknologi kemaya hari tu balat bendar dikena ba mayuh bengkah bidang ambika banding dikena berinteraksyen, bulihka penerang sereta bepedaka media nengah Internet. Penerang enggau kereban media ti bisi dalam Internet nya enda ditapis lalu ulih diakses enda milih sapa-sapa. Tu mih maya raban nembiak redak deka nguji sesebengkah pekara baru lalu mudah teparit enggau pekara baru.

Nembiak redak kelebih agi sida ke baru angkat bujang mega benung nengah proses belajar dikena sida ngelala chara pengidup. Maya tu mih sida balat ngaga penyilap laban enda ulih ngaga timbang penemu ti engkeman kelimpah ke mudah teparit enggau pekara negatif ketegal faktor rampa pengidup ti ngelingi sida.

Diri sebilik mega bisi tanggung pengawa kediri enti dikait enggau pemansang pengidup nembiak redak tu. Institusyen ruang bilik ti udah pechah-belah mega entara kebuah sekeda nembiak ngelaban orang tuai lalu ngujungka sida berengkah ngaul diri enggau aktiviti jenayah. Apai indai kemaya hari tu kelalu balat ngemeratka pengawa diri empu ngujungka sida nadai awak bekualiti dikena sida bekungsi enggau bala anak. Empas ari tu, anak-anak nya tadi deka ngasaika diri enda dikibuhka lalu sida berengkah ngereja pengawa ti ulih ngemuaska ati sida empu. Kurang perati ari apai indai mega ngasuh bala nembiak redak tu betawing enggau sengapa orang. Enda alit ati enti sida teparit enggau mayuh bengkah pengawa sosial ti negatif.

Ripot ninting taun Program Transformasyen Perintah 2014 (GTP) bisi ngeripotka tikas indeks jenayah di menua tu ti bisi nurun kira-kira 12.6 persin. Taja pan statistik nya dipeda manah tang perintah enda patut guyang kaki lalu beperagam penyampau jenayah enda betambah jemah ila. Perintah patut nejuka aja statistik nya laban rayat di menua tu agi nadai pengarap sereta berasai takut meda tikas pengelikun ba menua tu ti bepun ari pemayuh kes jenayah kelebih agi ti bisi kaul nembiak ninting hari. Perintah patut ngena langkah rapat ti moden enggau kontemporari agi lebuh nagang nembiak ari ngaul diri enggau pengawa salah.

Apai indai enggau pengajar mega patut meri perati sereta ngiring nembiak laban sida nyamai amat teparit enggau runding sereta pengawa ti enda manah ketegal umur ke agi biak ti alai sida agi begigaka identiti sida empu ke bendar. Apai indai enggau pengajar mega patut ngasaika diri bisi betanggung pengawa ngagai pelajar bala anak dikena nentuka sida nemu norma sosial ti patut dititih.

Jenayah ti nyadi ba raban nembiak redak kemaya hari tu ketegal mayuh macham faktor tang mayuh macham chara mega ulih dipraktikka dikena nagang kes jenayah tu.  Iya ti patut dikemeratka bala nembiak nya ngembuan tanggung pengawa ngagai diri empu, diri sebilik, bansa enggau menua dikena nagang diri ari tepawah ke dalam penanggul sosial. Semua chara ti udah dipejalaika nya nyadi nadai beguna enti sida nembiak nya empu enggai berubah sereta nadai ngembuan ulah ti deka ngenyauhka diri ari pekara sosial ti negatif.