Unit 2 Raban Jaku Nama

2.1   Pun Jaku

Jaku nama nya leka jaku ti nyadi pugu ke rambai jaku nama. Jaku nama nya jaku ti dikena nyebut nama orang, nama jelu, nama tempat, nganti nama,  enggau nama utai bukai.

2.2   Raban Jaku Nama

Jaku nama dibagi ngagai tiga bansa iya nya jaku nama rama, jaku nama tetap enggau jaku ganti nama. Leman jaku nama nya baka ke diterangka ba grafik tu:

jaku nama	jaku nama tetap
	jaku nama rama
	jaku ganti nama

Grafik tu nunjukka bengkah jaku nama

2.2.1  Jaku Nama Tetap

Jaku nama tetap nya tukuh jaku ti dikena nyebut nama ti diberi ngagai mensia, tempat, jelu, pekakas, gerempung, pangkat enggau ti bukai. Tukuh jaku tu ditulis bepun ngena urup besai enda ngira endur penuduk iya dalam ayat. Jaku nama tetap mega kala disebut jaku nama menyana tang dalam bup tu iya disebut jaku nama tetap. Jaku nama tetap tau dibagi ngagai dua bengkah, iya nya jaku nama tetap idup enggau jaku nama tetap ukai idup. Jaku nama tetap idup tau dipechahka ngagai dua, iya nya jaku nama tetap idup mensia enggau jaku nama tetap idup ukai mensia. Bagi pechah jaku nama tetap nya tadi, iya nya baka ke diterang ngena grafik ti nangkan tu:

           

jaku nama tetap
1. idup	2. ukai idup
·         mensia
·         ukai mensia

                                                                    

Grafik tu nunjukka bengkah jaku nama tetap

2.2.1.1  Jaku nama tetap idup mensia

Jaku nama tetap idup mensia nya dikena nyebut nama mensia.

Chunto:

Entingi

Jantang

Jugah

Kendawang

Garan

Jaku nama tetap idup mensia baka ke di atas nya tau mega digembar gelar nama.

Chunto:

Pengajar Entingi anak Balang

Senator Janting anak Medang

Tun Jugah anak Bareng

Datuk Kendawang anak Kinyang

Penghulu Garan anak Gana

2.2.1.2  Jaku nama tetap idup ukai mensia

Jaku nama tetap idup ukai mensia dikena nyebut nama malikat, antu, jelu, utai tumbuh enggau ti bukai.

Chunto:

ukui	Sengkalan, Sempar, Ribis, Kungkung
mayau	Kuring, Sabit
manuk sabung	Ijau Kunchit, Biring, Bejalak
antu manah	Sengalang Burung, Semarugah, Simpulang Gana
antu jai	Antu Raya, Antu Buyu, Antu Buau, Antu Abu
nama kayu	Hevea Brasilia (getah), Ananas Comosus (nanas), Manihot Utilissima (empasa)

2.2.1.3  Jaku nama tetap ukai idup

Jaku nama tetap ukai idup nya leka jaku nama ti dikena nyebut nama gerempung, nama menua, nama tempat, nama bansa mensia, nama jaku, nama pangkat enggau ti bukai.

Chunto:

gerempung                        – Gerempung Dayak Iban Sarawak

tempat                               – Singapura, Kuching, Sungai Anap

bansa                                – Iban, Bidayuh, Melayu, India

jaku                                   – Jaku English, Jaku Korea, Jaku Latin, Jaku

                                            Jipun

pangkat                             – Datuk Patinggi, Pehin Seri, Datuk Sri, Tun

chap barang dagang        – Proton, Adidas, Parker, Acer

nama pekit main               – Piala Malaysia, Piala Thomas, Piala Dunya

2.3   Jaku Nama Rama

Jaku nama rama dikena nyebut sesebengkah utai rama baka nama bansa utai. Jaku nama rama tau dibagi ngagai mayuh bengkah baka ti ditunjuk ngena grafik  tu:            

                               

		mensia
	idup
		ukai mensia
jaku nama rama
		institusi
	ukai idup
		ukai institusyen

                                                             

Grafik tu nunjukka bengkah  jaku nama rama

   

       

2.3.1  Jaku Nama Rama Idup Mensia        

Jaku nama rama ti baka tu dikena nyebut nama ti nerangka bansa pengawa mensia.

Chunto:

                  

penulis

pengajar

polis

doktor

soldadu

2.3.2  Jaku Nama Rama Idup Ukai Mensia

Jaku nama rama ti baka tu dikena nyebut bansa utai idup rama ti ukai mensia.

Chunto:

ular

manuk

ukui

burung

            tekura

2.3.3  Jaku Nama Rama Ukai Idup Institusyen

Jaku nama rama ti baka tu dikena nyebut nama institusyen.

Chunto:

sekula

hospital

gerempung

universiti

tadika

 2.3.4  Jaku Nama Rama Ukai Idup Ukai Institusyen

Jaku nama ti baka tu dikena nyebut tempat ti ukai institusyen.

Chunto:

sungai

kedai

langkau umai

jalai

padang

2.4   Jaku Ganti Nama

Jaku ganti nama dikena nganti jaku nama. Guna jaku ganti nama nya dikena nyeliahka kitai nyebut nama orang, utai tauka tempat dua tiga kali lebuh bejaku. Jaku ganti nama tau dibagi ngagai mayuh bengkah baka ti ditunjuk ngena grafik ti nangkan tu:

           

jaku ganti nama	orang
	penunjuk
	tempat
	adap

Grafik tu nunjukka bengkah jaku ganti nama

2.4.1  Jaku Ganti Nama Orang

Jaku ganti nama orang tau dibagi ngagai jaku ganti nama orang kesatu, jaku ganti nama orang kedua, jaku ganti nama orang ketiga enggau jaku ganti nama orang pengempu.

Chunto:       

Bansa Jaku Ganti Nama	Penerang enggau chunto
Jaku ganti nama orang kesatu	Jaku dikena nganti nama orang ti  bejaku baka aku, kami, kitai
Jaku ganti nama orang kedua	Jaku dikena nganti nama orang ti enggau kitai berandau baka nuan, dek, kua, seduai, kita
Jaku ganti nama orang ketiga	Nganti nama orang ti dikenang lebuh orang  berandau baka iya, sida
Jaku ganti nama orang pengempu	Dikena nganti nama orang ke ngempu baka engku, engkami, engkita, engkitai

Langkar kereja tu ngayanka bengkah jaku ganti nama orang

2.4.2  Jaku Ganti Nama Penunjuk

     

Jaku ganti nama penunjuk dikena  nganti nama utai tauka pekara ti ditunjuk.

Chunto:

            tu, nya, nyin

Leka jaku ganti nama tu dikena nunjuk ke utai ti semak sereta ulih tegu. Leka jaku ganti nama penunjuk nya nganti nama utai ti enda berapa jauh ari orang ke bejaku. Jaku ganti nama penunjuk nyin dikena nganti nama utai ke ditunjuk ti jauh ari orang ke bejaku. Penuduk jaku ganti nama penunjuk tu iya nya nyadika subjek ayat.

Chunto:

1. Tu  buah sibau.

2. Nya kasut Nantai.

3. Nyin buah dabai.

Tang enti iya nentuka siti-siti pekara, jaku tu tau mega diengkah ba belakang jaku nama.

4. Buah sibau tu manis.

5. Ikan nya agi baru.

6. Rumah nyin  chundung.

2.4.3  Jaku Ganti Nama Tempat

Jaku ganti nama tempat dikena nganti nama endur ti ditunjuk.

Chunto:

       ditu, dia, din

Ditu nya ganti nama ti dikena nganti endur ti semak orang ke bejaku.

Chunto:

7.   Ditu  bisi nyual manuk panggang.

8.   Aku teterap ditu suba.

9.   Kemari kami duai betemu ditu.

Leka jaku dia  dikena nyebut  endur ti enda bangat jauh ari orang ti bejaku.

Chunto:

10. Dia  bisi bejual ai irup.

11. Sida dia bisi begawai.

12. Kami serumah endang semakai enggau sida dia.

Leka jaku din  dikena nunjuk ke tempat ti jauh.

Chunto:

13. Din  bisi sarang gamang.

14. Sida din nadai nemu berita nya.

15. Pesan apai Dom nadai datai din.

2.4.4  Jaku Ganti Nama Adap

Jaku ganti nama adap dikena nganti nama utai ti nemu mindah tauka deka nyadi dipindah baka kitu, kia enggau kin.

Kitu nya nunjukka adap ti  semak enggau orang ti bejaku lalu ulih tegu orang ke bejaku. 

Chunto:

16. Kitu nuan Endun.

17. Aram kitu  bala kita.

18. Lalu mih, duduk ke atas kitu.

Kia reti nya nunjukka adap ti enda bangat jauh ari orang ke bejaku.

Chunto:

19. Kia tunga rusa nya rari tadi.

20. Anang kia kita bemain.

21 Jugah nadai kala nemuai kia.

Kin  nya nunjukka tempat ti jauh ari orang ke bejaku.

Chunto:

22. Kin kita begiga.

23. Lagi kin bala kita.

24. Sehari tu iya enda ulih kin.

2.5   Atur Ngaga Jaku Nama

Jaku nama tau diperatika ari tukuh ti baka tu:

(i)    jaku nama tunggal

(ii)   jaku nama tumbuh

(iii)  jaku nama turu

2.5.1  Jaku Nama Tunggal

Jaku nama tunggal tu jaku nama ti semina dipenyadi ari seleka jaku.

Chunto:

 

keli duit tanah burung

rumah indu selapuk kampung

2.5.2  Jaku Nama Tumbuh

Jaku nama tumbuh nya jaku nama ti nyadi ari proses meri penambah ngagai urat jaku. Sekeda ari penambah ti nukar kelas jaku ngagai jaku nama tumbuh nya baka penambah pun jaku ke-, pe- enggau se- sereta penambah selit -le-.

2.5.2.1  Penambah pun jaku

Penambah peN-

Chunto:

pe-	pen-	peng-	peny-
pejaku pejalai pelayar pekain pechunggai	penemu peninga	pengasu pengingat pengereja pengerai	penyenang penyedai penyelak penyarut penyarang

penge-	pem-	pel-	per-
pengerindang pengeraja pengelama pengebam pengelap	·                 pemerani ·                 pemenchi ·                 pemacha ·                 pemisi ·                 pemendar	·                 pelajar	·                 peranak

Penambah ke-

Chunto:  kedua, ketiga, keempat, kelima

Penambah se-

Chunto:  serumah, semenua, sejalai, sepuluh

2.5.2.2  Penambah selit  jaku nama

Penambah  -le-

Chunto:

selempepat (sempepat)

kelebembang (kebembang)

kelemayang (kemayang)

selempandai (sempandai)

selempetuh (sempetuh)

Penambah selit –le- nadai ngubah reti  jaku tang iya bisi dikena ba sekeda endur.

2.5.3  Jaku Nama Turu

Jaku nama turu ngundan dua tauka lebih leka jaku ti lalu meri siti unit reti.  Jaku nama turu tau dibagi ngagai empat bansa, baka:

(i)  Jaku nama turu meali-ali

Jaku tu dipenyadi ari dua tauka lebih leka jaku ti meali-ali.

Chunto: 

tuai rumah

balai raya

tengah hari

sumpit lachau

tai lalat

tinga pelanduk

(ii)  Jaku nama turu gelar nama orang

Jaku nama turu tu diberi rasmi tauka dipenyadi ngena chara rama       

Dikena nunjukkapangkat tauka status sosial.

Chunto:

Orang Kaya Pemancha

Datuk Patinggi

Profesor Diraja

Penghulu Dalam

Leftenan Jeneral

(iii)  Jaku nama turu penemu

Jaku nama turu ti dikena nerangka konsep dalam siti-siti penemu.

Chunto:

segi empat sama

pos laju

ujan asid

pengidup siga

tepung pengembai

(iv)  Jaku nama turu besilup

Jaku nama turu ti mai reti besilup baka jaku sempama.

Chunto:

aum juak

ati hari

batu tungku

buah jari

pala banta

kumang menyarung