Unit 5 Raban Jaku Tugas

5.1   Pun Jaku           

Leka jaku tugas nya raban jaku ti semina bisi reti enti dikena dalam rambai jaku, klausa enggau ayat. Jaku tugas enda ulih meri reti menyana enti dikena kediri. Jaku tugas semina beguna nyadika sanding jaku nama, jaku pengawa enggau jaku adjektif. Jaku tugas tau dibagi ngagai raban baka dibaruh tu:

(i)         jaku penyambung ayat

                        (a)        jaku penyambung tunggal

                        (b)        jaku penyambung berentayan

(ii)        jaku pra klausa

(iii)       jaku tekenyit

(iv)       jaku tanya

(v)        jaku perintah

(vi)       jaku pun ayat

(vii)      jaku pra rambai jaku

(a)        jaku bantu

(b)        jaku penguat

(c)        jaku penekan

(d)        jaku sangkal

(e)        jaku pemadah

(f)         jaku penempat

(g)        jaku adap

(h)        jaku tiap

(i)          jaku partikel

(j)          jaku pengenap tesa

5.2   Jaku Penyambung Ayat

Jaku penyambung ayat nya jaku ti dikena bekaitka unit jaku baka leka jaku, rambai jaku, tauka ayat awak ke nyadi siti unit ti lebih besai sereta ngembuan   konsep kediri. Iya nyambung ayat awakka  ayat ke pandak nyadi siti ayat turu ti menyana.   Jaku penyambung tau dibagi ngagai dua iya nya; jaku penyambung tunggal enggau jaku penyambung berentayan.

5.2.1  Jaku Penyambung Tunggal

Jaku penyambung tunggal jaku penyambung ti semina ngena siti leka jaku aja, baka leka jaku sereta, enggau, lalu, laban, semadi, tang, lebuh, maya, enti, ti, enggau ti bukai.

Chunto:

1. Sereta iya datai dia, hari pan ujan munyi ke diruruk.

2. Jang enggau apai iya nemuai ke Kedumpai.

3. Igat nyabak laban pedis perut.

4. Endun mandi lalu bebasu gari.

5. Kami duai betemu lebuh ke sama-sama nurun ke Nanga Lutak.

6. Aki tebatuk maya makai.

7. Enti nuan enggai, tau enda ibuh meh enggau kami

8. Semadi tak berunding ke kaban, kami ulih datai ditu.

9. Aku deka ngulai kupi tang nadai gula.

5.2.2  Jaku Penyambung Berentayan

Jaku penyambung berentayan nya jaku penyambung ti digaga ari dua leka jaku baka : tang lalu, taja pan, nambahka nya, taja pia, agi mega, udah nya, nangkan nya,  keterubah iya, entudi nya, ukai semina, nya alai.

Chunto:

10. Kami agi majakka pejalai taja pan kami lelak.

11. Iya ukai semina tuai bulu pala aja, tang mega mayuh penemu.

12. Hari ujan mesi-mesi taja pia Ujang terus nangkal getah.

13. Igat tabin nya alai iya enda nurun kereja.

14. Rawing enda semina ngajar nembiak ngereja pengawa ngena jaku aja tang lalu nunjuk  ngagai sida chara ngereja pengawa nya.

       

5.3   Jaku Pra Klausa

Jaku pra klausa nya jaku ti dikena sebedau klausa baka jaku tekenyit, jaku tanya, jaku perintah, jaku pemendar enggau jaku pun ayat.

5.3.1  Jaku Tekenyit    

      

 Jaku tekenyit nya jaku ti dikena nerangka asai ati ti tekenyit, rawan, irau, takut. Chunto:

15. Akai, pedis amat kaki aku!

16. Apo, besai amat baya nya!

17. Eh, aku enda arap ke jaku nuan!

5.3.2  Jaku Tanya

   

Jaku tanya nya jaku ti dikena nanyaka berita tauka pekara.

Chunto:

18. Ari ni kita datai pagi tadi?

19. Berapa rega baju nya?

20. Sapa nama nembiak nya?

21. Ni  pemanjai Sungai Rejang?

22. Baka ni gaya pemutus peresa iya?

23. Dini endur sida Endun diau?

24. Kati bisi nuan mai rengka sekula?

25. Nama kebuah chuik mati meraka jalai?

5.3.3   Jaku Perintah

Jaku perintah nya leka jaku ti suah disebut maya ngasuh tauka nagang orang ngereja sesebengkah pengawa.

Chunto:

     

36. Anang ngachau barang tu.

37. Lalu mih niki.

38. Arap ke kita sampal datai.

39. Minta semua kita anang inggar.

40. Uji tusun baru bup ti udah dibacha.

5.3.4  Jaku Pengamat

     

Jaku pengamat nya jaku ti dikena ngamatka pekara.

Chunto:

41.Amat, kami mih beban perau nya.

42.Ya, Jang mih ke pengabis jegak ditu.

43.Tau, terus kereja mih pengawa nya sampai tembu.

       

5.3.5  Jaku Pun Ayat

       

Jaku pun ayat nya jaku ti suah disebut dikena ngepunka ayat, kelebih agi ba jaku randau.

Chunto:

44. Nyadi, sebedau aku ngemanjaika jaku, dulu aku meri tabi enggau basa ngagai semua kita.

45. Nya alai, semua kitai serumah dipinta datai magang.

46. Kenu ku cherita, manah bendar guchi ke upah Manang Entayang belianka Raja Baya.

47. Ku sida iya, nuan mih ti pemadu landik belagu.

     

5.4   Jaku Pra Rambai Jaku

Jaku pra rambai jaku nya raban jaku ti dikena sebedau rambai jaku nama,rambai jaku pengawa tauka rambai jaku adjektif. Sekeda bengkah jaku pra rambai jaku nya

(i)         jaku bantu

(ii)           jaku penguat

(iii)          jaku penekan

(iv)         jaku sangkal

(v)          jaku penunjuk

(vi)         jaku penempat

(vii)        jaku adap

(viii)       jaku tiap

5.4.1  Jaku Bantu

Jaku bantu nya jaku ti nyadi penyukung dalam rambai jaku pengawa, rambai jaku adjektif enggau rambai jaku penempat. Jaku bantu tau di bagi dua raban:

(i)         jaku bantu aspek

            (ii)        jaku bantu gaya

5.4.1.1  Jaku bantu aspek

Jaku bantu aspek nya jaku bantu ti nerangka maya siti-siti pekara nyadi. Chunto:

   

48. Bala nembiak sekula udah pulai ke rumah.

49. Kami apin  makai.

50. Jang benung berubat di hospital.

5.4.1.2  Jaku bantu gaya

Jaku bantu gaya dikena meri penerang ke gaya asai ti bekaul enggau pekara ti  dikereja.

Chunto:

51. Kami deka nurun nginti ke Sungai Kara.

52. Kitai tau nurun ke padang diatu.

53. Nuan ulih pulai ke menua maya peremisi

  

5.4.2  Jaku Penguat

Jaku penguat nya jaku ti dikena nerangka maya, chara enggau gaya jaku ti dikuatka iya. Jaku penguat tu bisi dua bengkah, iya nya jaku penguat berentayan enggau jaku penguat meali-ali.

Jaku Penguat	Jaku Penguat Berentayan
	Jaku Penguat Meali-ali
	Jaku Penguat  Sebarang Tempat

                                                                                                                                                                                                                     

Jaku Penguat tau dikena dalam tau dikena dalam tiga chara nitihka penuduk iya   dalam ayat.

5.4.2.1   Jaku penguat berentayan

Jaku penguat berentayan enda ulih nerangka reti ti nyentuk enti enda dikena enggau jaku ti dikuatka iya.

Chunto:

54  Amat landik Jimbun ngajat.

55  Endang pandai nuan belagu.

56  Sigi nemu Mensan beramban.

       

5.4.2.2  Jaku penguat meali-ali

Chunto:

57. Peliman bejalai giu-giu.

58. Lama bendar Salang ngulihka buah dabai nya.

5.4.2.3  Jaku penguat sebarang tempat

Chunto:

59. Kemerah amat indai tuai orang nya.

60. Amat nemu nembiak nya ngaga selabit.

5.4.3  Jaku Penekan

Jaku penekan nya leka jaku ti dikena ngamatka pekara ti dikejaku baka  mega,endang,agi,lah,nya,ga, da,gi,meh,deh,neh,jara enggau ti bukai. Chunto:

61. Nya mih penemu ti manah.

62. Penusah ti baka tu mih ke dikenggaika aku.

63. Aku mega bisi enggau dia.

64. Endang enda bula jaku nuan nya.

65. Nama utai dianti agi?

66. Nya lah munyi penemu kita.

67. Mimit da agi datai jengkau aku.

68. Kitu gi semua kita ke duduk di baruh dia.

69. Aram mih kitai sama-sama sereta angkat.

70. Nama pengawa nuan dia dih?

71. Amat munyi ku jaku nuan nih.

72. Iga ga kita enda tetemuka utai nya.

73. Amai pan jara.

74. Nemu gi aku ngena komputer ari iya.

   5.4.4  Jaku Sangkal

Jaku sangkal nya leka jaku ti dikena nyangkal sesebengkah penerang tauka dikena ngayanka penemu ngena penerang ti negatif baka ngena leka jaku ukai enggau nadai  ti selalu agi dikena.

Chunto:

75. Jaku aku ukai deka ngemedis ati kita.

76. Ukai  aku ngumbuk nuan ke Mukah.

77. Pengerindu aku nadai limpang ke bukai.

5.4.5  Jaku Pemadah

Jaku pemadah nya jaku ti dikena nganti nama utai ti dipadah baka leka jaku iya nya.

Chunto:

78. Penulis bup cherita Kelimbak Darah iya nya Jimbun Tawai.

79. Penemu ti betul iya nya semua nembiak patut ngasika jaku ajar pengajar.

80. Mata ginti ke pemadu manah dikena nginti baung iya nya mata ginti temaga.

5.4.6  Jaku Penempat

Jaku penempat nya leka jaku ti dikena dulu ari jaku nama. Jaku penempat nya baka ba, di, ke, ngimbai, nengah, apak, senentang, neresa, nuju, ngusung, ngagai, suh, sendi, atas,baruh, san, pam, entang.

Chunto:

81. Kitingan datai ari Sabah.

82. Pinsil aku dalam kandi.

83. Sida bemalam ba kerangan.

84. Kami memarin ngagai tebing tasik.

85. Orang ke bejalai kaki mesti  nengah tisi jalai sepiak kanan lebuh bejalai di jalai  raya.

  

5.4.7  Jaku Adap

Leka jaku adap tu jaku nama ti madahka endur, adap tauka tunga utai. Iya disebut dulu ari jaku nama ti diterangka iya. Chunto jaku adap nya baka  timur, barat, selatan, utara, ulu, ili, barat daya, timur laut,  enggau ti bukai.

Chunto:

86. Opis Pengeregista Bansa nya  muak ke selatan pasar Batu Kawa.

87. Menua Jipun muak ari timur Malaysia.

88. Rumah kami ari ili  sekula.

89. Tembawai nya ari ulu rumah panjai kami.

90. Menua Berunai muak ke utara  bagi menua Limbang.

5.4.8  Jaku Tiap

Jaku tiap nya leka jaku ti dikena nesa penyampau utai. Dua bengkah jaku  tiap, iya nya jaku tiap nemban enggau jaku tiap enda nemban.

Chunto:

5.4.8.1  Jaku tiap nemban

dua lima enam keterubah kepenudi

sebagi sesuku tiap-tiap satu per lima dua pertiga

5.4.8.2  Jaku tiap enda nemban

semua mimit mayuh suah selalu

jarang-jarang ketebal agi kadang-kadang sekeda kira-kira

5.5   Jaku Partikel

Partikel nya leka jaku ti nyukung reti leka jaku bukai. Sekeda ari guna enggau chunto partikel nya baka: dih, mih, pen, pan, tak, ga, lah, nih.

(i)            dikena nanya: Kati nih?

(ii)        dikena ngayanka asai ati ti enda senang:  Merinsa mih nuan  

            tu dih!

(iii)          dikena nerangka pekara ti dikeberatka: Nuan pen nurun.

5.6   Jaku Pengenap Tesa

Pengenap tesa nya leka jaku ti nerangka tukuh jaku nama lalu mesti  dikena  bekaling enggau jaku nama. Iya tau dikena dulu tauka dudi ari leka jaku nama, bepanggai ba gaya ayat. Tusun rambai jaku ti mai pengenap tesa nya baka tu:

Jaku Tiap + Pengenap Tesa + Jaku Nama

Jaku Tiap	Pengenap Tesa	Jaku Nama
lima        tiga        sembilan empat dua se enam dua se	igi iku igi pasang lambar labuan agih kupuk pating	tajau manuk sabung telu kasut kulit buk tawak sayur kemiding telu bungai

Chunto jalai ngena rambai jaku ti mai pengenap tesa dalam ayat nya baka tu:

         91. Sida Mensan bisi ngembuan lima igi tajau lama.

92. Manang Jarah beupahka tiga iku manuk sabung lebuh iya belian.

93. Indu manuk sida Medan meram semilan igi telu.

94. Pemain nya bisi ngembuan empat pasang kasut kulit.

95. Manjan meli enam agih sayur kemiding.