Unit 10 Ayat

10.1     Pun Jaku

Unit tu ngundan penerang ngelansa pasal mayuh bansa enggau tusun ayat jaku Iban. Semua ayat ti penuh bisi ngundan elemen klausa ti  digaga ari rambai jaku lalu rambai jaku nya digaga ari leka jaku. Bekenangka pasal ayat, mayuh bendar macham nama konsep ti mesti  dikena beulang-ulang. Nya alai dikena ngelimat ruang, sekeda ari nama konsep nya dipuntangka baka ke diterangka dalam langkar tu:

Tanda	Reti
*	Ayat ti dikelai ngena tanda tu nya  ayat ti enda menyana.
RJN	Rambai Jaku Nama
RJP	Rambai Jaku Pengawa
RJA	Rambai Jaku Adjektif
RJPt	Rambai Jaku Penempat

Semua chunto ayat dalam unit  tu mega bisi diberi lumur beripih ngambika ayat nya nyamai disidi.

10.2     Ayat

Ayat nya, unit sebut ti bisi reti. Iya tau digaga ari seleka jaku tauka rintai beberapa leka jaku ti disebut nitihka rentak sebut ti menyana.

            Ayat penuh ditulis bepun ngena urup besai lalu ditutup ngena tanda pengujung jaku baka tanda titik (.), tanda tekenyit (!) tauka tanda tanya (?). Tanda ti dikena nya bepanggai ba bansa ayat ti ditulis kitai.

           

            Dalam atur jalai jaku, ayat tu duduk ba tingkat ti pemadu tinggi. Udah nya ditangkanka klausa, enggau rambai jaku. Lalu, leka jaku nya tingkat ti pemadu baruh baka ke dipandangka dalam langkar  tu:                       

AYAT	nembiak nya benung mandi.
KLAUSA	nembiak nya benung mandi
RAMBAI JAKU	nembiak nya		benung mandi
LEKA JAKU	Nembiak	nya	benung	Mandi

            Ayat tau dibagi ngagai dua raban, iya nya ayat pelasar enggau ayat tumbuh. Proses ngubah ayat pelasar nyadi ayat tumbuh iya nya:

ngerembaika ayat

nganti elemen ayat

ningkilka elemen ayat

nusun baru konstituen ayat pelasar  

           

Elemen ti nentuka bengkah ayat nya dikumbai klausa. Enti ayat semina ngundan siti klausa, ayat nya dikumbai ayat tunggal. Enti ayat nya ngundan lebih ari siti klausa, iya dikumbai ayat turu.

Chunto:

     1.   Medang pengajar.

     2.   Iya benung makai.

     3.   Melan ke pasar.

     4.   Buah rian nya besai amat.

Chunto:

     5.    Medang pengajar tang menyadi iya polis.

     6.    Iya benung makai lebuh temuai nya datai.

     7.    Melan ke pasar lalu meli sayur ke lauk.

     8.    Buah rian nya besai sereta lunak nya alai rega ia mar agi.

10.3     Klausa

Klausa nya siti unit tusun leka jaku ti ngundan subjek enggau predikat. Klausa tau dibagi ngagai dua bansa, iya nya klausa meali-ali enggau klausa bejantil. Klausa meali-ali nya klausa ti ulih bediri meali-ali kediri, bisi ngundan subjek enggau predikat sereta ulih nyadi ayat penuh enti disebut ngena intonasi ti betul.

Chunto :

        9.  iya landik

      10.  aku deka datai

      11.  sida ngetu

      12.  kami udah ngirup

                       

Ba chunto (9) di atas, klausa iya landik nya bisi ngundan subjek iya enggau predikat landik. Enti klausa nya disebut nitihka intonasi ti betul, dia iya tau nyadi ayat penuh: Iya landik.

Klausa meali-ali mega ulih nyadi sebagi ari ayat kompleks baka ke dikena ba chunto ayat tu:

13. Iya pandai laban rajin belajar.

14. Aku deka datai enti nadai penanggul.

15. Sida ngetu lalu ngirup kupi.

16. Kami enda aus agi laban  udah ngirup.         

Ba chunto (13), klausa iya pandai nya klausa meali-ali lalu laban iya rajin belajar nya dikumbai klausa bejantil. Klausa bejantil enda ulih bediri meali-ali kediri nyadi ayat tunggal. Ambika banding, jarang-jarang kitai ninga orang nyebut ayat ti munyi tu:

17. * Laban iya rajin belajar.

18. * Enti nadai penanggul.

19. * Lalu ngirup kupi.

20. * Laban kami udah ngirup.

10.4     Rambai Jaku 

Rambai jaku nya unit jaku ti digaga ari dua tauka lebih leka jaku. Taja pia, dalam konteks ayat, seleka jaku mega tau dikumbai rambai jaku enti leka jaku nya deka nyadi dikerembaika ngena chara nambahka penerang ngagai leka jaku nya.

Rambai jaku bebida ari klausa laban iya nadai ngundan subjek enggau predikat. Dalam atur jalai jaku, semua rambai jaku tau magang dikena ngaga klausa. Peratika rambai jaku ti dichelak chundung dalam ayat tu:

21. Ansa nya nyemerai ba pegung.

22. Anak mit nya benung tinduk jenak dalam nyut.

23. Seduai iya baru udah melah pinang.

24. Penyamun nya belalai ba gua.

25. Rumah batu nya didirika di atas bukit.

Dalam konteks ayat, semua leka jaku ti ditusun baka ke di baruh tu tau magang nyadi rambai jaku.

Rambai Jaku

burung burung empitu siku burung empitu siku anak burung empitu siku anak burung empitu lelaki

Kaul rambai jaku ti belalau ke chunto di atas baka ke diterangka ngena diagram tu:

siku      anak    burung       empitu

                                                                        RJ

                                                           

RJ

 

                                                RJ

 

10.5   Leka Jaku

Leka jaku tu sebansa morfem meali-ali. Morfem meali-ali nya morfem ti ulih bediri kediri sereta bisi reti menyana. Ambika banding baka leka jaku kami, rumah, bai, manah, perau. Semua leka jaku tu dikumbai jaku tunggal lalu sida enggai nyadi dipechahka ngagai unit ke lebih mit agi ari nya. 

Sebengkah agi ari bansa morfem nya dikumbai morfem bejantil. Morfem bejantil tu dikumbai penambah. Semua morfem bejantil enggai nyadi dikumbai leka jaku laban sida nadai ngundan reti penuh enti dikena meali-ali. Chunto penambah nya baka di-, be-,ke-, pe-, se-, te-, -ka enggau ti bukai. Semua morfem bejantil bisi reti menyana enti bejantil enggau urat jaku (root word) tauka pugu leka jaku (base word).

Bepelasarka tuju enggau guna iya dalam Sistem Jalai Jaku Iban, tiap-tiap leka jaku tau dibagi ngagai beberapa bengkah ti baka tu:

jaku nama

jaku pengawa

jaku penerang pengawa

jaku adjektif 

jaku tugas

Peratika chunto leka jaku dalam ayat tu.

26. Rumah/ nya/ rumah/ batu.

27. Anggan/ nyala/ undang/ di/ pegung.

28. Ukui/ nya/ tinduk/ di/ atas/ lesung.

29. Anak/ mit/ nya/ gemu/ amat.

30. Buah/ nya/ dalam/ bakul.