Kaul Pascamoden enggau Budaya sereta Seni Mensia Mayuh Kemaya hari tu

Pemuka Kenang

Tiap-tiap jeman bisi ngembuan penanggul iya empu. Iya enda ulih rari ari filosofi abad ke 20 ti udah ditempa bepelasarka pengerenjan daya bepikir. Pekara tu nyadi enti diperatika ari reaksyen ngagai bidang nya ba abad ke sebedau tu.

Batang Kenang

Bisi beberapa kelai ti ngasuh bala raban pemikir abad ke diatu ngaga simpul penemu sida senentang sistem filosofi ti udah diungkupka jeman tu. Simpul penemu sida nyengkaum krisis tikas peninggi sereta pemanah mensia sepengudah Perang Dunya I enggau II, penanggul ekonomi sereta penatai teknologi tinggi arus informasyen. Simpul penemu raban filosofi bepelasarka hal baka fenomenologi, positivisme-logik, vitalisme, ekstensialisme, filosofi analitik, pragmatisme enggau ke baru nya dikumbai pascamodenisme.

Jean-Francois Lyotard, siku ari pemikir sereta raban filosofi Peranchis kala nulis bup ti dikumbai iya “The Post Modern Condition: A Report of Knowledge (1979)”. Nitihka penemu Jean, iya enda besetuju enggau atur pemikir modenisma, iya nya jeman sepengudah Renaissance datai ke pun abad ke 20. Ku iya, abad maya nya dikelaika enggau pemansang teknologi pemadah lalu amat relevan (ngena) enggau realiti (sengala) kemaya hari tu tauka realiti kontemporari.

Mayuh orang enda ngasaika era moden tu jauh tinggal enti diperatika ari sukut pemansang. Jeman tu berubah lebuh mensia mayuh tebal agi ngemeratka pengidup sosial enggau ekonomi. Nya kebuah sida tau dikumbai mensia pasca-industri iya nya mensia ti balat begunaka barang sereta bepakaika mayuh macham pemakai kemaya hari tu. Sida tau mega digela konsumerisma tauka penguna segala macham utai.

Ba abad kediatu mega  kitai ulih meda penatai komuniti media, kapitalisma multinasional enggau mayuh macham teknologi informatik ti baru sereta ti bisi kaul enggau komunikasyen.

Pengkritik pascamoden Amerika, Fredrick Jamerson dalam bup iya “Postmodernism: On the Cultural Logic of Late Capitalism (1984)” madahka pekara ti berubah tu ngenataika tukuh format baru dalam budaya enggau seni mensia mayuh.

Leka jaku pascamodenisma disebut enggau terang dalam bup Rudolf Pannwitz, “The Crisis of European Culture (1947)” ti nyaraka penemu senentang tukuh khas modeniti ti nyereminka pemenang ngagai pengachau ti nyadi.

Leka jaku ti sama mega dikena Arnold Tonybee dalam karya kedut iya ti dikumbai “A Study of History (1947)”. Nitihka Arnold, reti pascamoden nya nerangka reti jeman politik ti berubah ari daya bepikir belalauka menua ngagai runding nengah chara interaksyen global.

Penulis sereta tukang kritik sastera menua Amerika baka Irving Howe dalam esei iya “Mass Society and Postmodern Fiction (1959)” ngena leka jaku ti sama dikena midaka teks pascamoden enggau litericha besai moden.

Nya alai, pascamoden ukai nandaka peninggi budaya baru sepengudah era moden tang iya nandaka budaya ti deka tusur luya dudi hari ila.

Ba bidang litericha, arus pascamoden deka ngerapitka kaul entara budaya ti tinggi enggau budaya ti popular lalu ngemunaska bida di entara kedua-dua bengkah pekara nya.

Penulis pascamoden dikumbai penulis ke ulih nguasa mayuh bengkah bidang sereta teleba enggau relialiti teknologi. Sida udah besedia matau mayuh bengkah mitos sereta dimensyen erotika. Empas ari penatai pascamoden ulih dipeda ari penatai raban feminisme sereta enggau peminta tauka hak ti pukul rata enda ngira lelaki tauka indu.

Karya-karya seni  baka “The Second Sex (Simone De Beauvoir), Sexual Politics (Kate Millet), Feminine Mystic (Betty Frieden), The Mermaid & Minotour (Dorothy Dimerstein) nya sekeda ari karang ti bisi besaraka penemu pasal feminisme enggau hal ti nadai bebagi-mida antara indu enggau lelaki. Pengawa tu majak nyadi di menua Eropah asil ari timpuh pascamoden. Kelimpah ari nya mayuh agi karya ti mandangka peminta ti sama.

Dalam hal ti bekaul senentang pekara seni, budaya enggau bansa kitai kelebih agi Malaysia tauka bansa Iban mar amat dipejuraika ketegal empas pascamoden. Tang kitai kemaya hari tu nyau nyadi barang konsumer ti dipedagangka orang nengah arus hedonisme televisyen enggau media. Tanda tauka evidens tu ulih diperatika ari program ti kenataika di kacha televisyen lalu kitai mayuh sechara enda sengaja nyadi orang ti ngeluluka cherita nya.

Penutup Kenang

Budaya sereta seni mensia mayuh kemaya hari tu balat bendar ngembuan kaul entara pangan diri dalam era paskamoden. Filosofi ditempa bepelasarka pengerenjan daya pikir ngujungka kitai mayuh semampai nyadi penguna barang tauka nyadi ejen konsumerisma.