Nyatup Taun 2010 Ti Penuh Enggau Penguji

-->

15 hari kitai udah ba taun 2010 nyau puas ga aku ngiga pekara ke deka ditulis aku ba blog sekali tu. Puas ke tegenung baka empelekung mabuk ambuh, ngetu baka puyu mabuh keruh dia bisi tekuing ga anak runding deka nulis senentang peragam ati aku senentang pekara ke deka disatupka kitai ba taun 2010 ti penuh enggau penguji.

Sepemanjai sejarah pengidup mensia dia kitai beratika kitai mensia enda ulih rari ari berumpak begigaka pengaya enggau kuasa. Pelaba aku kitai udah ninga tauka macha sereta sempat meda sekeda ari bala mensia sanggup beperang sereta betisaka pangan diri, disimpan ba rumah pasung tauka bebunuhka pangan diri ketegal reta tengkira dunya.

Sekeda ari sida tu sanggup ngena sereta besalahgunaka nama Petara ketegal pengingin diri empu ke kuasa politik. Mayuh raban minoriti elit mensia ba mayuh bengkah menua di dunya balat bendar bekuasa atas orang bukai sereta begumpulka reta dikena ngayaka diri empu. Sida tu sanggup merintah menua ngena chara nyeraraka mensia mayuh belalauka bansa tauka pengarap. Dalam proses tu ayan mih agenda ke dipelalaika iya nya jarak kaul entara orang kaya enggau miskin majak jauh ninggalka pangan diri.

Diatu kitai udah masuk lumur 10 sepengudah ke ngelebus lumur 90. Lantang mih asai ati laban kitai ulih idup dalam timpuh sepuluh taun ke udah. Taja pia penusah enggau penanggul tetap diteresaka kitai dalam kitai neruska pengidup kitai di dunya tu. Lebuh ke betatika utai ke udah nyadi pelaba aku nadai salah alai aku nguji melabaka utai ti deka nyadi dalam taun 2010 tu ila.

Pekara keterubah ke deka bai aku perati kitai sebuat nya senentang ekonomi. Ekonomi dunya tauka ekonomi global kemaya hari tu dipeda nadai bebida enti dibanding enggau gaya hari global. Penumbuh ekonomi ke enda stabil mai empas negatif mega ngagai gaya hari dunya. Bejuta-juta iku mensia di dunya majak lesi bebadi ketegal lapar pungkang sereta ketegal penyakit.

Kedua nya bekaul enggau pengaya. Raban mensia elit ke minoriti majak agi kaya ari majoriti mensia mayuh ke bukai. Orang ke kaya nyau majak kaya. Majoriti mensia mayuh balat agi deka ngasaika pemedis ketegal sistem ke balat agi nguntungka orang kaya. Orang ke jelan penatai pemisi enggau orang ke seranta deka bebendar agi bekereja dikena neruska pengidup diri. Sekeda ari sida tu mih baka biru ambika sap, baka kerukup ambika bap.

Ketiga nya ari sukut militari. Menua ke besai-besai baka Amerika, China, Russia, Europian Union enggau Latin Amerika majak bekempit enggau pangan diri ba pengawa ekonomi kelebih agi berebutka rizab minyak ke nyau deka abis. Ketegal pekara nya engka sida dipelabaka deka majak nambahka perambu belanja ba senyata perang ngambika ulih bekuasa agi ari orang bukai.

Pelaba aku keempat tu bisi kaul enggau rampa menua. Penanggul gaya hari sechara global deka majak nyadi ketegal gaya enggau ulah pengidup mensia mayuh. Ulah ke balat bendar ngemeratka pekara ti bekaul materialistik tau ngujungka penanggul ba sistem ekologi. Kerita majak betambah ari sehari ke sehari. Uras majak mayuh dibuai seberang endur, sungai majak kamah.

Kelimpah ari nya mega, tikas stress ke diasaika kitai deka balat agi nyadi ari ngelama tu. Pengidup chara moden kemaya hari tu balat amai mai penusah stress. Mensia mayuh udah nadai hari dikena belelak tauka merindangka ati. Kampung jerung enggau palan alai merindangka ati udah diganti enggau kompleks komersial. Penanggul sereta penusah rama baka kes ngerumpak, penyakit gian dadah enggau penusah bukai majak nyadi ketegal diansak ngulihka pengidup ti nyamai agi ari selama. Bala ama mensia enggau ama nengeri mega majak mayuh lalu deka nyadika pun mayuh macham penanggul.

Pengidup bekomuniti mega majak lenyau ari gaya idup mensia mayuh. Kaul entara diri sebilik majak lumpak laban semua orang kiruh enggau pengawa diri empu. Raban mensia mayuh mega nyau jarang bebalas baka nebas, beduruk baka nutuk. Jeman digital kemaya hari tu majak nyerara mensia mayuh ari betemu mua enggau pangan diri. Taja pan media digital diatu mansang amat tang iya mega tau ngujungka bala mensia mayuh agi ke ngatika diri ari ti nampil orang besosial. Engka jarang agi mih kitai meda bala betunga duduk betimpai, besendi sama berimbai bai di ruai tauka ba dini-dini endur. Sida deka balat agi berandau nengah arus internet.

Pelaba aku ke nangkanka tu nya bisi kaul enggau trend ti liberal bekaul enggau chukai korporat. Chukai korporat enggau chukai penatai pemisi dipelabaka majak dikurangka dipelabaka deka mantu bala rayat. Tang tu tau ngujungka perintah kurang penatai pemisi. Tang taja pia, sistem chukai ke bukai baka General Service Tax tauka chukai servis rama deka dipejalaika lalu mayuh agi subsidi deka dikurangka. Pekara tu engka tau ngenusahka mensia mayuh kelebih agi sida ke suntuk penatai pemisi. Sida ke betiangka banjang enggau beatapka senggang deka balat agi ngasaika pekara tu.

Nambahka nya, penyampau mega corporation majak betambah sereta deka lebih bekuasa ari kompeni ke mit-mit. Corporation ke bebesai tu deka balat agi nguing runding sereta ngubah daya idup mensia mayuh. Iklan enggau promosyen dipelabaka terus nyadika daya pengidup kitai. Sida tu mega ila dipelabaka deka mega bekuasa ba pengeraja asal sereta ba servis ke berat baka ai paip, bidang pelajar enggau pengerai.

Rizab minyak dipelabaka dudi hari ila mega majak kurang. Tu tau mega ngenataika penusah ngagai mensia mayuh laban iya tau ngurangka jarin pengelikun sosial jemah ila.

Pelaba aku kepenudi tu bisi kaul enggau sentimen ngeringka bansa enggau pengarap diri empu. Sentimen ngeringka bansa enggau pengarap diri empu deka balat agi ngenusahka pengidup mensia mayuh. Pekara tu engka deka balat nyadi ketegal bala orang ke ngembuan juluk ati politik ke pandak deka balat agi nguing runding orang mayuh lalu marit sida ngerejaka pengawa ti enda manah.

Nya alai enti utai ke dipelabaka aku balat bendar beserapun sereta ngenyinuka ati, kebuah iya endang nadai bukai laban iya endang sigi baka nya. Nya alai ukai ngajihka rangkang ngachuk mata, ngajihka babas nipas mua, kitai sama bela ngarapka kitai semua enda ngira pengarap mupuk berunding bekerejasama dalam siti semengat dikena ngulihka juluk ati ti alternatif ke ngembuan pengerindu, pengasih enggau pengamat ke sama. Tu mih maya kitai berunding nyadi siti perugu baka munti, siti menua sama seai ngambika kitai baka bukau ke siti tembung lebuh maya tusah sama-sama mih betulung.