Pemanah Peremisi Sekula

Peremisi sekula tauka peremisi semesters suah bendar dianti ukai semina bala nembiak sekula enggau universiti aja tang mega bala apai indai kelebih agi peremisi ujung taun. Timpuh peremisi ti panjai nyedia jam dikena ngaga mayuh macham aktiviti ke enda sempat digaga lebuh maya hari besekula tauka maya licha.

Taja pia enti peremisi ti baka tu enda diperambu enggau manah, dia bala nembiak redak nyangka berasai leju sereta enda nemu utai digaga. Bisi sekeda nembiak balat agi ngabiska jam iya meda televisyen, ngelayar internet tauka bemain computer games.

Endang enda salah enti nembiak kelebih agi sida ke baru ngangkat diri bujang tauka dara ngetu belelak sepengudah ke bendar besekula tauka ningaka licha. Taja pia chukup rugi enti mayuh awak ke bisi lebuh maya peremisi nya dikena enggau chara ke bemain aja. Nembiak patut nemu pemesai guna maya lapang enggau bekualiti.

Lebuh maya peremisi tu, peluang dikena nembiak enggau apai indai ngangkatka pemanah diri ti nyengkaum aspek pelajar enggau pekara bukai ti enda sempat digaga lebuh maya besekula. Siti ari chunto nya, apai indai merambu sekeda aktiviti dikena ngangkatka pemanah ulah sereta pekara ti bisi bekaul enggau pengarap tauka daya idup. Proses belajar enda patut berenti semina ba peringkat sekula tauka licha aja tang semampai diteruska dataika tuai.

Ngisi maya lapang enggau aktiviti ti patut nya sebagi ari pelajar sepemanjai idup tauka continuous learning. Apai indai nembiak ulih ngiri bala anak sida enggau penemu ti enda formal.

Timpuh peremisi ti panjai mega meri peluang ngagai bala nembiak milih sereta enggau masuk kus intensif tauka kelas belajar mayuh macham pekara ti dikerinduka sida. Ari nya sida ulih nambahka penemu enggau pengelandik sida.

Mayuh amat kus intensif ti ulih dititihka bala nembiak ke bekaul enggau teknologi pemadah baka web application, pengelandik teknikal baka bejait enggau belajar ngangkatka pemanah pendiau diri baka belajar bejaku ba mua mayuh tauka kem motivasyen. Penemu ti dikauk ulih meri nilai tambah ngagai sida lebuh sida nyambung pelajar ba peringkat universiti tauka lebuh minta pengawa.

Kus jaku baka kus jaku English beguna amat dikena ngangkatka pengelandik nembiak bejaku English. Ngagai bala sida ke deka ngambi peresa taun tu, sida tu mega ulih ngambi tuisyen intensif maya peremisi ngambika sida ulih mujur dalam peresa. Ngagai sida ke bepengarap tau mega nambahka penemu sida dalam pengarap sida enggau dalam agi. Adat asal mega patut diajar ngagai nembiak lebuh maya lepa ti baka tu ngambika sida ulih neruska daya idup asal bansa sida empu. Program ke baka tu tau narak nembiak nyadi orang ke manah ulah sereta temegah enggau adat bansa diri.

Peremisi ti panjai mega tau dikena nembiak nanam pengerindu macha. Sida tau milih siti tauka lebih bup ti bekualiti dibacha sampai abis timpuh peremisi. Pengawa ti baka tu ukai semina ngisi maya lepa aja tang mega nambahka input penemu sida ari bup ke dibacha.

Kelimpah ari nya, nembiak mega ulih nemuai ngagai librari tauka kedai bup lalu nimpai sereta macha bup ke baru sereta mayuh macham bansa. Ulah ke baka tu tau bendar nanamka pengerindu nembiak macha.

Bisi mega sekeda nembiak milih deka bekereja. Bekereja nya siti ari bidang pelajar iya nya matih diri nitihka disiplin kereja. Tu nyengkaum aspek pemanah pendiau diri, pemanah kaul enggau orang bukai sereta pengulih sida nitihka etika kereja.

Upah tauka gaji ke diterima asil ari pengelelak diri empu tentu balat ngemuaska ati sereta besai bendar reti. Ngagai sida ke pintar agi, sida ulih nyimpan duit lebih gaji sida ngambika bisi dikena lebuh belajar ba universiti ila. Nitihka pansik, siku pelajar ba kolej prebet begunaka belanja ti enda kurang ari RM10,000 bagi tiap-tiap semester. Nya alai pekara ti baka tu patut ulih ngenchelakka mata sida ke nerima upah tauka gaji ngambika sida balat agi bekelimat enggau duit awakka bisi dikena dudi hari ila.

Aktiviti bukai baka nemuai tauka makai angin ngagai tebing tasik ulih nuchi runding sereta meri pengering ngagai nembiak. Kelimpah ari nya mega, aktiviti ti baka tu tau ngerapitka kaul apai indai enggau anak sida.

Nemuai ngagai kaban belayan nya siti ari aktiviti ti tau diatur lebuh maya peremisi sekula. Nemuai ngusung kaban belayan ukai semina lebuh maya bisi pengerami aja. Enti nemuai maya peremisi tu jam dikena betemu enggau bala kaban belayan mega mayuh agi.

Nya alai peremisi sekula meri ruang ti penuh ngagai nembiak milih aktiviti ti patut digagaka sida. Nembiak patut pandai merambu ngambika peremisi sida ulih dikena enggau manah. Perambu peremisi ti diatur begulai enggau apai indai ulih nyamin aktiviti diatur nya bekualiti sereta ulih meri penguntung ngagai sida sebilik.