-->
Mayuh ari bala kitai sebuat pechaya tauka ngembuan perspektif ke ngasaika fenomena pengawa makai suap ba menua kitai udah datai ba tikas ke ngirauka ati bala mayuh. Menua kitai chukup untung laban kaya enggau pengeraja asal baka minyak, gas, kayu ramu enggau aktiviti ekonomi ba bidang industri begagaka barang sereta servis.
Ngena pengaya ke bisi tu mih perintah ngasilka sereta ngagihka iya pengaya nya ngagai rayat. Taja pan udah bisi prosedur enggau undang-undang dikena ngaturka pengawa tu tang iya kekadang enda tentu dititihka belalauka undang-undang ke ludas, beetika sereta beakauntabiliti.
Nya mih kebuah kemaya hari itu fenomena makai suap majak nyadi ke ngujungka perintah numbuhka siti gerempung ke dikumbai Suruhanjaya Pencegahan Rasuah Negara (SPRM) dikena mutarka penyakit makai suap ke diatu tau dikumbai kitai nyau udah ba tikas riman ngantika lesi dibai hari da agi.
Ni naka pemesai rampa fenomena makai suap tu? Kati amat sereta serius kini penusah makai suap tu ba menua kitai?
Nitihka ripot Tuai Audit Menua bagi taun 2008 madahka RM28 bilion belanja bisi tiris sereta nyadi ba sekeda opis menteri, jabatan, syarikat enggau agensi dipegai perintah. Reti nya bisi nyadi kes salahguna kuasa enggau pengawa ngeruaka duit rayat.
Pengawa makai suap tu dipelabaka endang lama udah nyadi kelebih agi enti kitai beratika maya perintah Sultan Melaka suba ke ngujungka Melaka ulih diambi Portugis. Pengawa tu nyadi enti nadai mekanisma dikena mutar tauka ngurangka penusah tu.
Bisi orang madahka pengawa tu udah datai ba tikas ke raya amat laban kenu ku sida nama-nama aja utai kemaya hari tu ulih dibeli, bisi orang ulih nguing runding sekeda akim laban bisi akim udah kena tangkap ketegal tu. Tusah amat enti kitai udah baka manuk ke udah buya umpan. Undang-undang ke bisi diatu enda tentu ulih nawa orang ke bisi kaul enggau orang ke bekuasa semadi mih orang nya bepangkat baruh.
Kelimpah ari nya mega, pengawa ke ngemeranka sistem patronage entara orang ke meri enggau orang ke nerima sereta nyukung sida ke meri nya mih ke nyadika pengering ti ngasuh pengawa tu majak nyadi sereta mar diputarka. Malaysia udah dirintaika dalam ranking ke baruh entara menua ke bisi penusah pengawa makai suap tu, nitihka pansik ke digagaka Transparency International’s Corruption Perception Index. Nitihka pansik 2009, Malaysia diengkah ba penuduk ke 56 ari 190 buah menua.
Nya alai ba penemu Pengerusi Majlis Penguam ke suba, Ambiga Sreenevasan madahka langkah ti keterubah ke patut diperatika iya nya ngayanka ulah sereta komitmen enggau pengingin politik (political will) ke amat-amat deka munaska pengawa tu. Kitai patut enda ngeletakka nama-nama pekara tauka syarat enti deka ngemunaska penusah tu.
Siti ari chunto ke patut diteladanka nya baka utai ke nyadi ba Hong Kong suba. Dalam taun 1974 perintah menua Hong Kong udah numbuhka siti gerempung dikena munaska pengawa makai suap tu. Gerempung nya dikumbai Independent Commision Against Corrpution (ICAC). Hong Kong sebedau ke numbuh gerempung tu endang tebilang di dunya ketegal pengawa makai suap.
Nyadi Malaysia udah nguji ngambi chunto model gerempung lalu ngemasukka iya ba SPRM. Utai ke midaka gerempung dua bengkah tu iya ICAC tu 100 peratus ngatika diri sereta mesti ngeripot terus ngagai parlimen. Sepengudah tiga taun ditumbuh, gerempung tu udah nawa 247 pengawai tauka orang ke bepangkat besai nyengkaum 143 pengawai polis ke bisi ditemu enggau orang makai suap. Hong Kong nya teladan cherita ke mujur munaska pengawa makai suap. Nya alai sepengudah 36 taun gerempung tu ditumbuhka dia pemesai sida berani madah enggau temegah ati ngumbai Hong Kong diatu siti ari menua ke nadai agi ngemeranka pengawa makai suap. Nyadi di Malaysia, SPRM tu suba dikumbai BPR tauka Badan Pencegah Rasuah. Ketegal nama ke berubah nya bisi mega orang nyema iya baka tuak lama ke diatu disimpan dalam butul baru.
Enti pengawa makai suap majak nyadi lalu rayat lalu empai ulih nguing runding perintah ngambika sida neritka agi atur engka iya deka mai empas negatif ngagai kitai semua. Reta sereta pengaya menua deka terus dipunggah ngagai orang ke enda patut ketegal ke ngemeranka pengawa makai suap tu. Uji kitai betatika nama utai ke deka nyadi enti sema rizab minyak kitai abis dalam timpuh ti enda lama da agi, kampung jerung ba beberapa buah nengeri majak ditebang ke ngujungka menua nyau baka padang, sereta duit rayat ke disimpan dikena ngemansangka menua enggau rayat majak lenyau. Ba penemu aku tentu mayuh ari kitai sebuat setuju menua kitai ketegal nya ila deka anchur lela baka ambun maya pagi.
Nya alai sama-sama mih kitai berunding baka ni kitai tau mutar sereta ngemunaska pengawa tu. Pelaba aku, kitai sama-sama bisi runding enggau akal semina ngati maya enggau endur utai tu nyadi diputarka. Sama-sama mih kitai besendi pangan diri, bebantu diri menyadi, semenua sama seai ngambika pengawa tu tau mujur diketuka.
Tiada ulasan:
Catat Ulasan