-->
Apin lama ti udah menteri besai Malaysia bisi madahka 39,046 peranak menua India nadai temu tunga sepengudah sida datai nemuai ke menua Malaysia. Pengawa begigaka peranak menua bukai ke lenyau ba menua tu ukai pekara baru. Pengawa tu keterubah dipejalaika dalam taun 1970an. Pengawa nya dipekuh Tracking Unit ari opis imigresen. Unit tu endang dipaduka ngereja pengawa tu aja.
Opis imigresen udah nengkebang data masuk enggau pemulai temuai belalauka penerang temuai ke bisi ayan ba kad masuk ti dichop pegawai imigresen ba pintu penama. Ketegal ke bisi kereban komputer kemaya hari tu pengawa nya ulih dikereja enggau mudah, nemban sereta jampat. Taja pia iya enda munyi ke disebut sereta didinga kitai.
Kebuah pia laban penanggul majak nyadi sereta pedis diputar lebuh temuai udah datai di menua tu lalu diau lebih ari timpuh ti patut. Pengawa sida ke bebini ngambi orang menua tu sereta beranak deka nambahka agi penanggul tu. Baka ni ku status anak sida tu ila? Sida mega engka enggau bala rayat bukai menua tu ngena perengka rama ke endang enggau peluang kereja ke udah disediaka perintah ngagai rayat menua tu.
Enti kitai di Kuala Lumpur singgah mih ba restoran India, dia kitai deka tepeda sereta betemu enggau penempara tauka pelayan bansa India ke enda nemu bejaku Melayu seleka. Enda patut sida tu peranak menua Malaysia. Enti sema sida tu temuai, nama kebuah sida gawa ba restoran?
Nitihka pansik, penanggul pengelenyau peranak menua India tu nyau majak amat nyadi. Sida ukai semina gawa ba restoran aja tang bisi mega bala indu sida nyadi indu sempit nyundal tubuh diri.
Penyalahguna visa temuai mega nyengkaum temuai ari menua China. Pekara ke midaka dua bansa tu iya nya penyampau temuai ari China ke lenyau apin dipadahka perintah. Nyau deka ninting hari kitai ninga tauka macha ari dada surat kabar ke madahka bala temuai indu china bisi ditangkap polis ketegal ngelalai diri nyadi temuai tauka nembiak universiti.
Siti agi raban bansa ke ditemu mayuh masuk ngagai menua kitai enda beradat tauka nyalahkena pas tama nya sida ari Afrika. Sida tu tebilang enggau pengawa black money lalu kemaya hari tu sekeda ari sida suah bendar ngumbuk bala indu dara Malaysia nyadi drug mule tauka ulun mai dadah ngagai luar nengeri. Enti sema sida tu temuai tauka nembiak universiti, tang nama mih kebuah sida dipeda dedayau sebelah pasar sereta ba genturung pendiau orang bejualka sementing, kerepai enggau jam tangan?
Kekadang bisi ga asai ati deka betanya katika penatai bala sida tu tadi ngagai menua kitai endang bisi agenda belalai ti tau nguntungka orang bukai kini? Uji kitai meratika utai ke nyadi ba menua Sabah suba kira-kira 20 taun ti udah bisi penanggul enggau penatai bala ari Filipin enggau Indonesia ke ngujung mayuh amat bala sida ngembuan kad pengelala menua tu lalu ulih ngerijista diri nyadi pengundi. Diatu sida tu udah nyadi sebagi ari peranak menua Sabah lalu penyampau tubuh rayat menua Sabah maya nya nyulut jampat ari kira-kira logik. Nadai kitai nemu enti sema sida bisi udah mujur bulih status peranak tetap menua tu.
Laban sekeda ari sida ke diau lebih ari timpuh lebuh ke ditanka polis tauka imigresen endang negmbuan permit kereja enggau kad pengelala mirah ke diberi sida ke nadai betanggung pengawa sereta orang ti enda taluk ke menua diri.
Nitihka jaku menteri besai, raban sida tu enda ulih disidi ari rekod imigresen sereta dipelabaka udah ngemulaika diri ke menua asal tauka baka bala bansa ari India udah gawa ba restoran India. Katika penerang nya munyi ke mai reti rekod sida tu udah dipadam ari komputer opis imigresen.
Penyampau sida tu ke mayuh diatu tau bendar ngenataika penusah ngagai pemaik menua. Penemu ke madahka penyampau sida ke salah ngena visa on arrival (VOA) tu bedau chukup laban pekara bukai mega patut dipikirka baka penunga sida diatu lalu pengawa ke dikerejaka sida.
Pengirau ati bala rayat ke bisi ngembuan tanggung pengawa enggau angkun ke menua endang enda ulih dipelalaika lebuh tetiap kali pekara baka dadah ketamin ti dirampas baikka iya ba padang bilun tauka ba palan penyangkai kapal endang semua iya datai ari India. Katika sida ke lenyau tu bisi kini kaul enggau dagang dadah ke endang udah diperambu enggau manah?
Mekanisme ti dikena agensi mutarka penanggul tu mudah amat dimanipulasika sida ‘temuai’ enggau ‘pelajar’ baka sida ke ari China enggau Afrika.
Nya alai sekeda pekara ke patut dipejalaika dikena mutarka penusah tu nyengkaum ngelintungka lis (blacklisted); enda ngasuh sida sangkai ba menua tu; tauka dirintaika ba lis orang ke patut ditan sepengudah ke datai ditu (arrest on arrival). Universiti enggau kolej patut mega ngiga chara mutarka penusah laban mayuh nembiak ari menua Afrika ke belajar ditu ditemu udah ngelenyauka diri.
Amat mih ripot ari opis menteri temuai madahka penatai temuai ke menua tu lumur dua ari pemayuh penyampau temuai ke Korea lalu penyampau tubuh sida ke datai dipelabaka 23.65 juta ba pengujung taun tu. Nitihka menteri nya, angka tu deka ngelui Penunjuk Prestasi Utama (KPI). Semia pekara ke mida iya enggau Korea nya temuai ke datai ngagai Korea nadai udah diripot lenyau baka temuai ke nemuai ngagai Malaysia.
Nya alai opis menteri temuai patut meratika penatai temuai ukai semina ari penyampau tubuh temuai ke datai tang mega ngira ungkus belanja opis menteri bukai mutarka penyakit rama ke dibaik bala temuai ke menua kitai.
Kuris udah berubah nyadi riman. Chara belalauka jaku dalam English prevention is better than cure patut dikemeranka dikena mutarka penanggul tu ari majak nyadi. Empas negatif balat agi ninggang pengidup rayat Malaysia. Penyakit kelia baka Malaria, Chikukunya enggau Meningitis ke pegari ba menua Afrika udah ngerekai ngagai menua kitai.
Amat mih kitai besetuju ngelama tu kitai ngarapka penatai temuai ngagai menua tu tau mai penatai pemisi ngagai menua tang ketegal ekonomi dunya kemaya hari tu nyau mambam ditambah mega enggau gaya politik menua diatu kitai tauka perintah enda ulih enda berunding ari sukut pengelikun menua. Ukai bangat tusah enti amat deka ngiga sida ke lenyau tu. Enti ba bukit, palik ke tanah tinggi Cameroon, enti ba emperan perati mih ngagai Lempa Kelang lalu enti ba tebing tasik timpai mih ngagai Port Dickson enggau Pelabuhan Kelang.
Tiada ulasan:
Catat Ulasan