TEKUK

Aku tak luba-luba dipeda orang ngenangka mayuh macham pekara tang enggai enda laban niat ati ke udah deka mantu bala pemacha jaku Iban kelebih agi bala nembiak ke di sekula ke bisi ngambi pelajar Bahasa Iban baka sida ke endang bisi internet di rumah lalu selalu ngelawa laman web jaku Iban dikena nambahka kereban bacha dalam jaku Iban.

Nyadika pekara ke deka dikenangka aku sekali tu nya penyakit tekuk. Aku ingat bendar menya lebuh agi ba Skrang Skim B selalu bendar meda bala indai tuai Iban tak bisi mengkul ba baruh dagu, ba rekung sida. Nyadi maya nya niang ini aku madah sida nya tekuk. Aku enda nemu enti diatu agi bisi kini bala indu ke kena tekuk. Maya nya suba nadai udah kala meda orang lelaki ke bisi tekuk, semua nya tak indu aja. Nyadi sekali tu aku deka ngenangka utai ke dikumbai tekuk nyangka mayuh bala nembiak rebak baru nadai kala meda utai ke dikumbai tekuk. Nyadi penerang tu semina ngelansa sereta diambi aku ari opis pengerai.

Kebuah Tekuk Nyadi

Tekuk tau nyadi ari ketegal tubuh kitai mensia ke enda ngundan chukup iodine. Virus ke ngasuh tekuk tu nyadi dikumbai RNA Paramyxovirus. Igi bawai batang rekung beguna bendarka iodine lalu enti nadai nya tekuk deka nyadi. Tekuk iya ke bendar endang igi bawai ke kembai lalu mansang besai-sebesai makin kitai tuai. Sebedau pemansang vaksin enggau penatai vaksin tekuk, penyakit tu suah agi ngerekai ngagai anak mit lalu suah nyadi ba serata dunya, lalu agi mengkang nyadi penanggul pengerai ba menua dunya ketiga.

Orang Dirampit Tekuk

Semua mensia ke kurang makai pemakai tauka ai diirup ti ngundan iodine deka kena laban penyakit tekuk. Orang ke diau semak tebing tasik lubah agi kena laban tekuk enti dibandingka enggau orang ke diau di ulu laban sida makai mayuh agi pemakai ti bisi ngundan iodine. Tekuk ngerampit ari siku ngagai siku lebuh lendir seput ari ai liur orang ke dirampit. Lebuh orang ke tekuk nya batuk tauka engkasi, dia titik ke tesembur tau tama ke dalam mata, idung, tauka mulut orang bukai. Tekuk mega ulih berampit enti kitai bekunsi pemakai, ai irup lalu besium enggau pangan diri. Sida ke dirampit tekuk mudah ngerampit dalam kandang enam hari sebedau bisi dipeda tanda-tanda tauka simptom dataika semilan hari udah simptom berengkah.

Utai Ti Ngundan Iodine

Ikan, undang enggau bansa rumput tasik endang ngundan mayuh iodine. Sekeda tanah bisi mega ngundan iodine lalu sayur ke ditanam ba tanah nya bisi mega ngundan iodine. Sebengkah agi utai ti ngundan iodine nya Garam Gadung. Garam tu endang bisi dijual ba kedai. Rega enggau asai Garam Gadung tu sama baka rega enggau asai garam bukai mega. Garam tu patut diguna kena ngulai lauk tauka diempa pia aja. Orang ke enda teulihka pemakai ke ulih ari tasik, iya nya baka ikan, undang enggau utai bukai patut begunaka garam gadung tu kena nyaga diri ari penyakit tekuk.

Jalai Nyaga Diri Ari Tekuk

Kitai tau nyaga penyakit tekuk tu nyadi ba diri sebilik enti kitai makai garam gadung genap hari. Orang ke endang udah kena laban tekuk patut mega diasuh makai garam gadung nya ngambika tekuk sida enda mansang besai.