Tempalai kenang sekali tu nguji ngenang enggau ngelansa siti agi utai tumbuh ti bisi kaul rapit enggau pengidup raban bansa Iban. Sebedau tu pengarang udah ngenangka pasal buah engkabang tang sekali tu utai ti dikenang nya bekaul enggau Terung Dayak. Terung tu kira ke udah nyadika ikon orang Iban laban nyadi siti ari ukir pantang orang Iban. Nadai enda orang Iban nemu buah tu semadi mih sida nya nembiak rebak baru ke ada di nengeri sereta enda kala meda tauka makai buah tu. Artikel tu nguji ngenang enggau ngelansa pasal terung dayak tauka Iban besereta enggau penerang teknologi terung dayak tu belalauka bacha sereta penyanding penemu bukai.
TERUNG DAYAK (Solanum ferox Linn) nya sebansa terung ti bisi tumbuh di Malaysia. Terung tu dipasukka dalam raban ke dikumbai Solanaceae. Terung Iban mega disebut ngena nama Terung Pasai (Brunei),Terung asam; Cung Bulu(Indonesia), Terung Dayak; Terung Iban; Terung Asam(Malaysia), khua-khon (Laos), tabanburo;
tagatum(Filipina), sinkade (Myanmar), mapu;yongkuidi (Vietnam) dan muuk (Thailand).
Raban Terung (Solanaceae) didunia ngembuan lebih ari 1,500 species ti tumbuh mayuh ba endur tropika enggau sub-tropika. Ari penyampau nya 25 ari spesis bisi ditemu tumbuh ba Asia Tenggara lalu ari penyampau nya semina 5-7 spesis aja ke tau diempa (edible) sereta ditanam (domesticated).
Terung Dayak tu nadai ditemu asal penatai tang terung tu tak tumbuh ba babas nadai ditanam di Asia Tenggara, Papua New Guinea enggau Amerika Selatan. Terung Dayak bisi bebuah tang buah iya masam amat lalu suah diempa nyadika engkayu tauka sayur. Bisi orang nyumai ikan ke digulai enggau terung tu lalu bisi mega diulam; iya nya digulai enggau sambal udah direbus. Terung tu mega tau disumai kari lalu di Thailand engkayu Terung Dayak ke disumai nya dikumbai "nam prek". Di Indonesia Terung Dayak disumai enggau asi ngambika asi nya lemi kelimpah ari ke nambahka penyamai ngagai asi nya.
Igi Terung Dayak mega diguna nyadika ubat dikena ngurangka pemedis ngeli. Igi nya tadi dipasukka dalam daun pisang (setengah rangkai) udah nya lalu digulung. Tunu daun nya tadi lalu sintak baka ke ngisap ruku dataika nyau enda agi pedis. Nitihka penemu tradisional, urat terung dayak tau mega dikena ngubat telih, rajai, gatal-gatal lalu bisi orang madah tau mega dikena ngubat Penyakit Syphilis!
Terung ditanam nadai tentu kebuah semina ketegal pengerindu aja. Iya ditanam ngelingi rumah tauka rumah panjai sereta ba kebun enggau umai. Terung Dayak mayuh ditanam ba Sarawak enggau Sabah lalu mimit aja ke ditanam ba Malaya baka di Pahang, Johor enggau Selangor. Enti kitai ke pasar Satok, Kuching Sarawak tauka pasar di Serian dia kitai meda mayuh amat buah terung Dayak ke agi baru, dijual enggau rega ke numbas iya. Seagih tiga ngagai lima igi nya dijual enggau rega RM 2.00 - RM 4.00 bepanggai ba saiz, chura enggau maya.
Nitihka bup PROSEA : Plant resources of Asean vegetables, tiap-tiap 100 gramme buah Terung Dayak ngundan nilai pemakai baka ai (89g), protin (1.4 g), gemu tauka lemak (1 g), serat (1.5 g), Ca (13 mg) enggau tulang tauka tenaga 168 kJ. Buah tu mega ngundan bahan kimia ke dikumbai solanine iya nya alkaloid ti enda tentu berachun lalu diguna nyadika barang saponin dalam darah. Terung Dayak enda ulih diempa mata laban kelalu masam.
Pun Terung Dayak ngembuan dan sereta peninggi pun tu dataika semeter. Batang iya bechura gadung sereta bebulu lalu betukar setengah kering enggau bechura gadung choklat. Daun mega bechura gadung lalu tukuh iya baka ovate. Pemanjai daun iya 5-40 cm panjai x 3-40 cm pemesai sereta suah agi iya bisi 4-6 sukut tajam ti bisi bulu. Bungai iya bisi 5 kerupak bechura burak lalu ba tengah iya nyau deka kekuning mimit. Buah terung dayak tu segala ina tang bisi mega ke segala sereta kepih. Iya bechura gadung enti agi mata lalu betukar ngagai kuning oren mirah lebuh udah chukup mansau. Saiz sigi buah terung nya entara 5-6 cm lalu ukurngelingi x 7-8 cm panjai. Setangkai pun terung bisi pukul rata ngeluarka entara 1-2 igi buah. Buah ke kelalu mansau enti enda diambi tau labuh kediri.
Terung dayak ditanam ari igi ke chukup tuai. Pilih igi ke manah lalu jembui. Semai iya lalu deka tumbuh dalam timpuh 1-2 minggu. Rendam igi nya tadi ba ai beresi sepengelama 24 jam sebedau nyemaika iya dikena mechahka 'seed dormancy'. Terung tu mega ulih ditanam nengah chara ngerat kulit batang iya enti bisi teknologi enggau pengelandik ti chukup tang iya bisi deka mar mimit dikerejaka. Anak benih ke udah bisi dua lambar daun tauka peninggi iya entara 1.5 - 1cm tauka baru 2-3 minggu udah patut maya iya dipindah ke kebun tauka ke dalam pasu. Tanam anak benih di dalam pasu tauka ba bakut lalu penyarang entara sepun ngagai sepun nya 0.6 m x 1.0 m bepanggai ba pematut.
Terung dayak mudah amat diserang Penyakit Layu Bakteria (Pseudomonas solanacerum) ti ngujungka pun kayu iya layu lalu mati. Urat iya mega mudah diserang Ulat Nematod (Meloidogyne arenaria). Tu tau ngasuh urat iya beikil-ikil sereta ngujungka pun iya buruk. Kelimpah ari nya indu utai tau mega ngasuh pun Terung Dayak kurang ngeluarka asil. Penanggul tu ulih diputar enti sema iya ditanam ba alai ke nadai nematod. Buai sereta tunu pun iya ke udah layu. Pun terung patut selalu diperatika pemansang iya.
Baja tauka sum ke ditabur ba pun terung tu nya sum organik. Penyampau sukat iya entara 60-100g sepun sereta ditambah enggau sum NPK entara 15-20g sepun. Rumput ti tumbuh ngelingi pun mega patut dibantun sereta dibuai. Terung Dayak berengkah bebungai 3-4 bulan udah iya ditanam. Gaya hari ke angat enggau mambam maya pagi deka ngasuh bungai nya ngerembai (2-3 hari) lalu manyi deka datai nulung mantu proses pendebungaan. Pun terung berengkah bebuah entara 2-3 bulan udah proses pendebungaan dataika iya chukup tuai alai iya patut diambi, iya nya lebuh buah nya udah bechura kuning oren sereta bekilat. Belalauka sekeda penyanding penemu madah pengalama terung dayak tu idup nya dalam timpuh setaun enti diintu enggau manah sereta nadai diserang penyakit Layu Bakteria. Potensi asil terung dayak bebuah dataika 15 igi sepun sekali idar musin iya. Buah Terung Dayak mesti diempa enti udah diambi lalu iya tan disimpan semina 1-2 hari aja. Buah Terung Dayak ti disimpan dalam peti ais dalam penyelap 10 celsius tan disimpan dataika 6-7 hari.
Terung Dayak ulih dikemansangka enti bisi pansik senentang nanam (plant breeding), ngatur promosyen, teknologi pemeroses sereta kereja ngerembai sereta nyualka buah nya enggau teratur. Jemah ila nyangka kitai ulih ngasaika jus terung dayak, teh, snek, krim , tablets, tepung, puree enggau mayuh ke bukai. Promosyen pemanah asai MASAM ulih digaga pansik senentang guna iya dalam pemakai tauka guna pengerai.
Penyanding Penemu
Tiada ulasan:
Catat Ulasan