Siti ari utai idup ti tau diempa lalu mayuh ditemu ba menua Sarawak iya nya matar tauka tinduh. Matar tauka nama sainstifik iya Rhynchophorus Rerruginenus nya sebengkah ari bansa ulat ke mirah pala.
Matar tu diau ba dalam batang baka batang sawit, aping enggau pantu seraban ari bansa pun palma ti nyau deka sebaka enggau pun mulung semina mayuh duri ba pun iya.
Matar tu ngidupka diri makai upa dalam batang nya sebedau iya besai sereta bebali nyadi indu matar ke tau terebai enti udah besai.
Nitihka pansik matar tu ngembuan mayuh amat protein, sereta tau bendar nyadi pemakai kena nambahka pengering tubuh.
Matar berega amat ba menua Sarawak lalu rega iya tau manggai ngagai bepuluh ringgit sekilogram. Enti dijual enggau iku, siku nya berega antara RM0.50 nyentukka RM2.
Mayuh orang madahka, matar nya nyamai amat diempa kelebih agi enti dipansuh. Bisi sekeda orang berasai geli mimit meda tinduh tu maya iya agi idup laban ke nyau kidu-kidu lebuh iya engkebut tambah mega tubuh iya lembut sereta tebal.
Tang enti udah dipansuh, manah amat mega bau ngesuh ari buluh nya sereta tau ngasuh orang tetenguk deka nyepi asai iya. Maya ke makai lalu ngunyah matar nya, kitai ulih ngasai pemanis ai pansut ari tubuh iya sereta berasai nyamai amat.
Ba menua tu, matar nya dipanduk enggau mayuh macham chara baka diguring begulai enggai kichap sereta digaga baka sate. Pemakai baka tu balat amat dikerinduka mensia mayuh. Ba Papua New Guinea sida dia benung ngemansangka mayuh bengkah pemakai ti bekaul enggau matar tu. Siti ari nya iya nya sate matar. Iya mega disumai sida enggau tepung sagu.
Tiada ulasan:
Catat Ulasan