Taun 2011 tu taun ke besejarah ngagai menua Sarawak laban dalam bulan April tu kitai ke peranak menua Sarawak ke udah ngerijistaka diri enggau Suruhanjaya Pilihanraya diberi peluang ngundi milih pengari ke deka ati. Dalam buah kenang sekali tu, pengarang nguji ngeruga runding bala nembiak rebak baru senentang kebuah sida patut ngundi.
Ngundi ngasuh kitai lantang ati laban kitai ngasaika diri udah enggau dalam proses demokratik ke mandangka undi kitai nya dikira lalu jaku kitai didinga; tambah mega iya nya sebagi ari tanggung pengawa kitai peranak menua.
Iya ti bendar kitai endang teleba tauka masai bendar enggau pengawa ngundi tu. Kitai endang udah kala enggau ngundi kenyau ari kitai agi biak maya di sekula kitai ngundi laban deka milihka tuai kelas, tuai nembiak tauka presiden ba Majlis Universiti, sekeda ari kitai mega enggau milih tauka ngundi idol ke dikerinduka kitai baka ba program realiti TV.
Tang taja pia lebuh datai ba pengawa bepilih dalam pengawa bepilih besai nengeri tauka sitak parlimen kitai meratika agi mayuh raban mensia enggai kiruh nurun tauka enggai ibuh deka enggau ngundi.
Pengawa bepilih tu elemen ke chukup berat dalam dunya demokratik. Ba Amerika Syarikat dalam Dekleresyen Hari Merdika US, dia Thomas Jefferson (Presiden ke tiga Amerika) bisi nulis: “Governments are instituted among men, deriving their just Powers from the Consent of the Governed.” Reti dalam jaku mudah; perintah bekuasa ketegal kitai ke nyadi peranak menua meri sida ke dipilih nya kuasa merintah tauka megai menua. Nya ditandaka enggau siti agi rambai jaku ke chukup tebilang ti dikenataika Abraham Lincoln (Presiden US ke 16): “ Democracy is the government of the people, by the people, for the people.”
Di Malaysia, Artikel 119 ba Federal Constitution nyamin semua peranak Malaysia hak ngundi dalam pengawa bepilih enti (a) iya udah manggai umur 21 taun; (b) diau mendam ba sitak bepilih tauka enti ukai iya nya pengundi ke enda datai ngundi; lalu (c) iya udah ngerijista diri nyadi pengundi endur iya diau semadi mih iya nya enda dikemendar ba baruh undang-undang.
Kitai benasit amat laban hak kitai dijamin Federal Constitution; taja pia bisi mega sekeda ari kitai enda beterima kasih ke hak sida ke tau ngundi. Nitihka ripot agi bisi 4.3 juta orang ke patut ngundi lalu empai ngerijistaka diri enggau Suruhanjaya Pilihanraya. Mayuh ari sida tu nya orang ke agi rumpas umur, sida ke agi biak lalu baru udah manggai umur 21 taun (The Star, Ogos 3, 2010). Nyadi tu penyampau ke tau bendar ngenakutka kitai laban penyampau pengundi ke udah ngerijista diri ba Malaysia nya 11 juta. Bisi berita angin ke madah pengawa bepilih besai ke 13 dipelabaka tau nyadi barang maya; nyadi enti nya amat tentu mayuh amai orang kelebih agi sida nembiak rebak baru enda ulih enggau ngundi.
Nama kebuah bala nembiak patut ngundi?
Ngundi tu meri peluang ngagai bala nembiak redak milih pengari tauka parti ti tau merintah menua. Ngundi nya meri kuasa ke setimbang, kuasa ngenataika asai ati sereta kuasa jaku ke dipansutka kitai didingaka perintah. Mayuh orang komplin madahka jaku sida nadai dipending, nadai dikemuningka bala pengari tauka perintah tang sida tu enda ingat sida udah diberi peluang ngenataika hak sida nengah keretas undi.
Ngundi nya reti iya kitai nyukung sistem demokrasi, nya alai dikena ngemujurka sistem nya kitai patut angkun bepegai ba prinsip demokrasi. Nadai enggau ngundi reti iya kitai udah muntanka pengawa demokrasi lalu tu tau bendar nyimaka ati bala aki ini kitai ke betunggang lupung berambunka nyawa nyaga enggau ngemataka menua ke merdika sereta ngetanka sistem demokrasi.
Pengawa bepilih nya meri peluang ngagai kitai milih pengari ke lurus sereta beresi ari pengawa ke enda manah ngambika sida ke patut dichirika megai menua sereta ngembuan tanggung pengawa ngagai bala rayat tauka anak buah iya. Semina tu mih maya kitai ulih ngubahka kuasa nengah chara ke likun sereta betamadun.
Mayuh bendar isu pengawa bepilih ngembuan empas ke chukup nyata dalam ngagai pengidup mensia mayuh kelebih agi ngagai bala nembiak redak rebak baru. Isu baka pelajar, pengerai, pengawa, kes jenayah, pengawa makai suap, rega minyak, rampa menua nya sekeda isu ke balat sereta terus meri empas ngagai pengidup sida ke biak.
Nya alai, sida ke agi biak patut ngasaika peluang ngundi nya peluang ke alai sida ulih bejaku ngarika diri empu. Ngundi nya teladan sereta chuan ngagai orang bukai ke enggai ngundi tang semina ngembuan ulah baka kepayang ngadaka dilah aja.
Orang Malaysia rindu bendar bejaku senentang politik. Ninting hari di kedai kupi, di opis enggau ba media massa kitai ninga tauka macha berita pasal politik. Taja pia bejaku aja tang pala patung enda nyaut nadai mai kitai kini-kini. Ngundi nya mih chara ke pengabis manah dikena madahka ngagai pengari nya kitai mega kiruhka menua kitai lalu deka meda baka ni menua kitai diperintah; baka ni duit rayat diguna enggau dipelanja; lalu kitai deka meda pemansang ke positif ngagai menua kitai.
Bisi mitos ke madahka “siti undi nadai mai sebarang reti ngagai pengawa ngundi nya”. Tu ukai jaku ke amat. Enti sema semua orang berunding baka nya lalu enda nurun ngundi tentu pengujung iya sistem demokrasi deka runtuh laban rayat udah nadai ngembuan pengarap ngagai sistem nya tadi. Pengari ke dipilih mega nyangka ukai ngarika majoriti mensia mayuh. Tu tau bendar mai penusah laban utai ke nyadi jemah ila udah dilempaika kitai ba pengari ke ukai dipilih kitai lalu kitai ngemendarka sida ngaga pemutus penemu ngarika kitai ngujungka meri empas ngagai pengidup kitai.
Enti nitihka realiti,tiap-tiap iti keretas undi nya dikira lalu sejarah suah bendar didinga madahka bisi sekeda pengari semina menang enggau majoriti ke chukup mimit.
Ngundi kemaya hari tu nyau udah nyadi trend pengawa mensia mayuh. Kitai ke udah ngundi tau enggau temegah ati ngeposka status kitai ba Facebook enggau Twitter lalu madah ngagai dunya; “Aku udah ngundi” tauka kitai tauka nulis dalam blog pasal Hari Pengawa Bepilih.
Kelimpah ari nya, ngundi mega mai pengelantang dalam ati laban kitai nemu kitai udah enggau dalam proses demokratik; reti nya undi kitai nya dikira sereta jaku kitai didinga.
Nya alai anang enda ngerijistaka diri. Enti kitai udah rijista, diau enggau penuh pengelantang lalu ngantika maya kitai nyunting “X ba keretas undi jemah ila. Hari Pengawa Bepilih ukai sebagi ari hari diau. Iya hari ke semina datai sekali dalam timpuh empat tauka lima taun lalu maya nya mih nuan ngasaika nyadi orang ke pemadu beguna sebaka enggau orang bukai laban undi nuan mega setimbang enggau enggi sida. Nya alai anang enda nurun ngundi maya Pengawa Bepilih. Ngundi nya ukai semina hak tauka kuasa tang mega tanggung pengawa kitai peranak menua.
Tiada ulasan:
Catat Ulasan