Hari Pengereja Pengawa

Hari Pekereja nya diintu ninting taun kena 1 Mei . Hari tu mega disebut Hari Pekerja Antarabangsa tauka International Labour Day. Iya diintu dikena ngingatka pemujur ekonomi enggau sosial bala gerempung pengereja pengawa. 1 Mei dipilih laban dalam taun 1884,Persekutuan Persatuan Pekerja dan Buruh, ti ada ari pemujur Parti Labour 1872 di Kanada ke minta lapan-jam gawa di Amerika Syarikat, berengkah dipejalaika kena 1 Mei, 1886. Tu ngujungka lalu bisi mogok rama enggau Mogok Haymarket dalam taun 1886, tang jam bekereja lapan-jam nya lalu belinsur dikena.

Idea ngelantangka ati ngena pengerami kemisi proletariat nyadika chara dikena minta hari bekereja lapan jam, bepun ba menua Australia. Bala pekereja maya nya mutuska penemu dalam taun 1856 deka ngaturka hari sehari berenti gawa lalu ngaturka aum enggau pengawa pemerindang dikena nunjukka sida dekaka pengelama bekerja semina lapan jam. Asal dulu menya pekereja Australia nya semina ngaturka hari nya diintu semina dalam taun 1856. Tang ketegal pengerami keterubah tu mai empas ke balat amat ngagai raban proletariat Australia ngujungka sida mutuska penemu deka ngaturka pengerami nya baru ninting taun. Nya alai, idea ke ngintu hari proletariat diterima enggau jampat, lalu ari Australia pengawa nya terus nyepar ngagai menua bukai ke ngujungka nyau nyadi ba serata dunia proletariat.

Di Amerika Syarikat, pengerami Hari Pekereja ti keterubah diaturka Pusat Kesatuan Buruh kena 5 September, 1882 ba bandaraya New York dikena sida ngingatka pengulih sereta pemeri bala pengereja pengawa. Taja pia mayuh agi gerempung pengereja pengawa ke lebih radikal minta hari 1 Mei nyadika hari pengereja pengawa. Nya alai dalam taun 1886, sida mutuska penemu 1hb Mei patut nyadika hari berenti gawa antarabangsa. Maya nya suba, 200,000 pekereja ninggalka tempat bekereja lalu minta hari gawa lapan jam. Nya alai ketegal nya raban polis enggau perintah lalu nagang bala pekereja dalam timpuh beberapa taun ari ngulangka pengawa mandangka diri ringat. Dalam taun 1887, Presiden Grover Cleveland milih hari satu keterubah dalam bulan September lalu ukai 1 Mei nyadika hari pekereja di AS laban irauka bala pekereja ngingatka hari sida mandangka diri ringat ke nyadi dalam taun 4 Mei 1886. Nya alai dalam taun 1894 Presiden Grover ngerahka enggau rasmi hari satu keterubah dalam bulan September nyadika hari pekereja.

Di Eropah, raban pekereja mayuh bendar udah ditumbuhka lalu regas amat bejalaika peminta ngagai orang ke ngaji sida. Pengasai ati ti pengabis kuat bisi kala dikenataika maya Kongres Pekereja Internasional dalam taun 1889. Maya Kongres tu, bisi empat ratus pengari ke bisi ngulu kongres tu lalu sida mutuska penemu minta hari gawa lapan jam nyadika peminta ti patut dikenataika ngagai orang ke bekuasa. Nya alai, pengari ari gerempung-gerempung Perancis, pekereja Lavigne ari Bordeaux, meri tuduh penemu ngambika peminta tu mega dikenataika di semua menua nengah pengawa ngemaduka pengawa antarabangsa. Pengari ari pekerja-pekerja Amerika lalu mutuska penemu deka mogok kena 1hb Mei, 1890, lalu Kongres mega mutus deka ngaturka pengerami proletariat antarabangsa maya hari tu mega.

Dalam kes tu baka ke udah nyadi tiga puluh taun ke udah ba Australia bala pengereja pengawa semina mikirka mandang diri tauka ngaturka demonstrasyen nya sekali aja. Pia mega Kongres mutuska penemu ngasuh semua pengereja pengawa ari semua menua sama-sama ngaturka demostrasyen kena 1hb Mei 1890 ngambika bekereja semina lapan jam. Taja pia nadai siku maya nya bejaku minta kemisi nya diintuka baru maya taun-taun bukai. Endang nadai siku orang nyangka idea nya kelalu jampat diterima bala pengeraja pengawa ke ngujungka pengerami hari pengereja pengawa diintu ninting taun.

Nya alai ari sukut sejarah, satu haribulan Mei nya hari ke minta gawa lapan jam sehari. Tang taja pia udah juluk ati ke minta gawa lapan jam sehari udah dijapai pengerami Hari Mei lalu enda mega diketuka. Nya mih kebuah peminta raban pengereja pengawa ngagai borjuasi enggau kelas pemerintah majak diteruska seagi semua utai ke dipinta bedau dijapai sida, lalu Hari Mei deka terus nyadika hari ninting taun alai bala pengereja pengawa ngenataika peminta sida.