Basa ti tinggi dikena ngenangka sereta pengeras raban indai nyaga sereta ngibun bala anak sida iya diintu ninting taun. Komuniti ba 46 buah menua nyengkaum Malaysia milih hari minggu kedua dalam bulan Mei alai ngintu Hari Indai.
Taun tu, Hari Indai diintu kena 9 Mei. Entara menua bukai ke sama milih hari minggu kedua bulan Mei nyadika hari dikena ngintu Hari Indai nya nyengkaum Amerika Syarikat (AS), Australia, Kanada enggau Singapura.
Kelimpah ari nya bisi mega menua bukai ke milih hari bulan bukai alai sida ngintu Hari Indai, baka menua Sweden ke ngintu Hari Indai ba hari minggu ke penudi dalam bulan Mei, Norway kena hari minggu kedua bulan Februari lalu Poland milih pengerami Hari Indai kena 26 Mei.
Hari Indai ke keterubah iya diintu di AS dalam taun 1914. Tradisyen ngintu Hari Indai lalu ngerekai ngagai beberapa buah menua ke bukai. Taja pia budaya ngintu Hari Ibu ba sesebengkah menua nya bebida entara menua belalauka gaya pengidup raban komuniti ba menua nya empu.
Taja pan chara ngintu Hari Indai di serata dunia enda tentu sama tang idea iya endang sebaka iya nya dikena ngenataika asai ati ti kasih, sayau, basa sereta terima kasih ketegal pengasih enggau penyayau indai ngagai bala anak.
Maya nyadi indai nya maya ti chukup manah sereta ngembuan peneleba ke pengabis badas dalam pengidup orang indu. Taja pia, kemaya hari tu agi bisi raban orang indu ti bedau besedia sereta enda bebasaka peneleba nyadi indai. Raban ke enda besedia nyadi indai nya tentu bisi kebuah kediri empu. Nya alai ari berita ke didinga tauka ke dibacha mayuh bendar ngenataika ripot pasal indai ke kempang nisa tauka malu, muai tauka munuh anak diri empu ke baru ada. Bisi mega kes indai ke udah sarak ngelakka anak indu sida begulai enggau pangan lelaki sida dataika anak iya ditisa sampai mati.
Nya alai Menteri Pemansang Orang Indu, Diri Sebilik enggau Mensia Mayuh, Datuk Seri Shahrizat Abdul Jalil bisi kala ngelalau raban orang indu kelebih agi sida ke udah sarak sereta bisi gawa enda ngelengka tanggung pengawa sida ngagai bala anak sida.
Kelimpah ari meri pengasih enggau penyayau ngagai bala anak, indai mega ngembuan tanggung pengawa ngajar, ngelalau bala anak senentang pekara ti tau dikereja sereta pekara ti enda tau digaga. Enti pekara tu bisi dikereja bala indai tentu bala anak sida deka nyadi orang ke ngembuan tanggung pengawa sereta ulih berunding enggau dalam lebuh sida udah angkat bujang tauka dara jemah ila.
Nambahka nya mega, dalam zaman moden ke mayuh penguji tu, bala indu ke agi biak patut nanya diri empu enti sida udah besedia mandang sereta meri pengasih lalu besedia nyadi indai ngagai anak sida. Enti sida bedau besedia tentu sida semina ngenusahka diri empu sereta anak sida aja.
Pia mega ngagai bala indai ke gawa tentu tanggung pengawa sida berat agi enti dibanding enggau bala indai ke enda gawa. Sida indai ke gawa patut nimbang pengawa enggau bala anak sida. Kelimpah ari nya sida mega tentu nyekat aktiviti sosial sida. Aspek-aspek ke dikereja nya nyengkaum nyaup kereja sekula bala anak, ngajar sereta narak nilai-nilai manah ngagai sida patut bendar dikemeratka indai. Pengawa baka tu patut dikereja laban anak nya aset ke pengabis beguna ngagai indai.
Nya alai kaul ti rapit entara indai enggau anak endang patut amat ngambika bala anak ulih beterus-terang sereta bekungsi sebarang penanggul enggau indai sida. Enti bala anak enda berani nusui penanggul sida ngagai indai sida tentu sida minta jaku lalau ari pangan ke rapat enggau sida, lalu enti lalau ti salah diterima ari pangan sida nya mih ke ngujung nyadi penanggul kemaya hari tu.
Nya alai tiap-tiap indai patut meri pengasih enggau penyayau lalu nyadi peninga enggau tawing ke manah ngagai bala anak ngambika iya mereti utai ke dikedeka bala anak. Langkah rapat ti baka tu tau bendar ngerapitka kaul entara indai enggau anak lalu ngujungka peransang nilai pengasih enggau penyayau dalam mensia mayuh nyadi budaya semua. Enggau peluang tu aku meri Selamat ngintu Hari Indai ngagai semua bala indai.
Tiada ulasan:
Catat Ulasan