Ninting taun raban bala pengajar deka ngintu Hari Pengajar kena 16 Mei. Nyadika taun tu tema Hari Pengajar iya nya Pengajar Penyungkak Transformasyen Pelajar Menua.
Enti belematika enggau silik tema tu, terang bendar nunjukka pengawa raban bala pengajar majak berat enti dibanding ari ke udah ngelama tu. Semua perambu pelajar ke udah dilanggurka perintah endang dilempaika ngagai bau raban bala pengajar ke nyadi penyungkak transformasyen pelajar menua. Reti nya sebarang pengawa ti udah diperambuka perintah ke nyadi penempa polisi endang patut dipejalaika enggau manah ngambika pekara ke disilup dalam tema Hari pengajar nya ulih dijapai.
Nya alai pengawa ke udah dilanggur sereta dipejalaika opis Menteri Pelajar baka KSSR, SPPK enggau MBMMBI patut bendar dipejalaika nitih chuan ke udah ditetapka perintah ngambika transformasyen pelajar ke nyadika juluk ati nya ulih dijapai. Baka nya mega pengawa ke bekenaka IT (teknologi penerang) enggau ICT (teknologi penerang enggau komunikasyen). Bala pengajar patut landik ngena IT enggau ICT ngambika tuju ke deka ngubah tauka transform pelajar menua ulih dijapai enggau naka pemanah.
Dalam hal ti baka tu, pengelala diri tauka identiti bala pengajar patut tinggi ngambika ulih nitihka rentak pengawa ke udah diperambu perintah dalam bidang pelajar. Enggau peluang tu aku meri pesan Selamat Hari Pengajar ngagai semua bala pengajar kelebih agi ngagai sida ke udah kala ngajar aku suba lalu ngagai sida ke kala sama-sama ngajar enggau aku suba lalu mega ngagai bala nembiak ke diajar aku suba ke diatu gawa nyadi pengajar.
Tiada ulasan:
Catat Ulasan