Kepayang nya sebansa kayu ke tumbuh tinggi jejentam ba emperan menua Asia Tenggara baka menua Indonesia, Malaysia enggau Papua New Guinea lalu ngeluarka buah ke dikumbai buah kepayang. Pendiau buah kepayang nya baka buah bol Amerika lalu bisi ngundan rachun ke semina ulih ditawar nengah chara fermentasyen. Ba raban bansa Iban, bisi bansa buah kepayang ti dikumbai kepayang lenga ke bebuah lemak sereta tau diempa.
Buah kepayang dalam bidang saintifik dikelaska ba baruh kategori Pangium edule lalu dulu suba dipasukka dalam Flacourtiaceae . Pun kepayang tu ngambi maya ke lama baru tuai lalu igi iya diambi ari iya ke tumbuh ba dalam kampong nya alai kepayang tu enda tentu ngenataika ekonomi ngagai kitai ke deka nguji nanam buah tu. Taja pan berachun ngagai mensia, buah kepayang nyadi pun pemakai babi kampong tauka babirusa.
Buah enggau igi kepayang ngundan asid sianida dalam konsentrasyen ke tinggi. Enti semak diempa enggau mayuh tau ngasuh kitai mabuk. Bisi chara dikena kitai muai rachun ari buah kepayang nya. Igi kepayang nya nitihka sekeda orang direbus dulu lalu udah nya dilamun enggau abus, daun pisang lalu ditumbak dalam tanah sepengelama 40 hari. Dalam timpuh tu igi nya tadi lalu bebali ari burak bebetau nyadi cokelat tuai tauka chelum ngelintum. Chara tu bepanggai ba fakta ke madahka asid sianida nya ulih tebuai nengah chara panduk enggau fermentasyen ketegal iya nya belai sereta mudah dibuai.
Ba Malaysia enggau Singapore, igi kepayang nya dikena nyadika rempah dikena ngulaika lauk baka dagin manuk enggau babi, kelebih agi pemakai bansa Iban enggau bansa Peranakan. Igi iya tau diempa enti udah direbus sereta direndam dulu. Di Indonesia, kulit igi kepayang nya ditutuk nyadi tepung sereta dikumbai rawon lalu tau dikena ngulaika lauk. Nya alai ba Indonesia bisi pemakai ke tebilang dikumbai asi rawon enggau sambal rawon. Kelimpah ari nya mega, tepung kepayang nya tau mega dikena ngulai lauk ikan, dagin tauka sayur.
Pun kayu kepayang tu munyi ke disebut dulu tadi endang yau ke tumbuh tinggi jentam-jentam, iya nya kira-kira 30 meter peninggi tauka lebih ari nya. Rachun ke bisi dalam igi kepayang nya mega tau digaga nyadika rachun mata panah.
Dalam budaya bansa Iban, buah kepayang tu besai bendar reti laban suah bendar disebut dalam jaku tuai. Uji perati sekeda chunto jaku tuai senentang buah kepayang tu:
1. Kepayang bulat tauka kepayang banggar nya pun kepayang dalam leka sabak ti kena pansa semengat orang ke mati pulai ke Mandai enti hari ujan nyerumba hari iya ke mati.
2. Baka kepayang ngadaka dilah nya reti iya orang ke semuti mansutka jaku aja tang enda ngereja ka pengawa laban ngandalka orang.
3. Baka minyak kepayang nya jaku dikena nyemaka penyiru ai amat.
4. Mang ari kepayang rendam sehari nya ngambarka orang ke tajam ati tauka berani.
5. Ngerang kepayang nya jaku sema dikena nyemaka pemanah batu kerangan ti ngenying baka kerang leka kepayang.
6. Mabuk kepayang nya ulah orang ke udah mansau beambai.
Tiada ulasan:
Catat Ulasan